Traducción del Nuevo Mundo Bibliapita quechuaman tikratsishqa textokuna

Éxodo 14:2, 3: Israelpa tsurinkunata parlapë, kutimurnin Pihahirotpa puntanchö jamayänampaq, Migdolwan lamar tinkoqchö, Baal-zefonpita rikänachö. Tsëpa frenten lamar kuchunchömi jamayänëki. Tsëmi faraonqa Israelpa tsurinkunapaq këta ninqa: ‘Pantashqa y mëpapis ëwëta mana puëdermi patsachö purikäyan. Mana imapis kaqchö wichqakashqa cuentam këkäyan’.

Éxodo 14:19, 20: Tsëmi israelïtakunapa puntanta ëwaq Diospa angelninqa qepankunaman churakärirqan, y columnanö pukutënam, puntankunapita qepankunaman churakärirqan. Tsënömi egipciokuna y israelïtakuna këkäyanqampa chowpinman churakärirqan. Juk lädopaqa paqasyätseq pukutëmi karqan. Juknin lädopanam, paqasta atsikyaraq pukutë karqan. Y kë grüpoqa manam tsë paqas juknin grüpoman witirqantsu.

Deuteronomio 15:7: Täranqëki markachö o Jehová qoshunqëki markachö mëqan markamayikipis waktsayaptinqa, manam waktsayashqa wawqikiwan chukru shonquqa, ni michaqa kanëkitsu.

1 Samuel 1:4-6: Y juk junaqmi Elqanäqa sacrificiota rurarqan, tsëmi warmin Peninäta y llapan ollqu y warmi wamrankunata qararqan; pero Änataqa pëpaq tinkullatam qararqan. Tsënö kaptimpis, pëqa Änatam más kuyaq, y Jehoväqa, qolloq kanantam jaqirqan. Y chikeqnin warmiqa, qolloq kananta Jehová jaqinqampitam llakitsirnin tukïnöpa piñatseq.

Salmo 34:18: Shonqunkunachö nanatsikïkaqkunapa lädonchömi Jehoväqa këkan, y espïritunkunachö pasëpa llakishqa këkaqkunatam salvan.

Salmo 55:12-14: Porque manam chikimaqnïtsu noqapaq mana allita parlarqan; tsënö kaptinqa aguantämanchi karqan. Manam paqwë chikimaqnïtsu noqapa conträ shärirqan; tsënö kaptinqa pëpita ratakömanchi [tsinkakömanchi] karqan. Sinöqa qammi karqëki, noqanö wanoq nuna, familiänö y reqishqä këkarnin, noqantsikqa ishkantsikmi imatapis willanakur karqantsik; Diospa wayinmanmi wakinkunawan yëkoq kantsik.

Salmo 56:8: Kikikim willakurqunki qatikachashqa purinqäta. Wëqita qarapita rurashqa poronguïkiman winëkullë. ¿Manaku librïkichö llapan këkan?

Salmo 139:1-3: Oh Jehová, qamqa chipyëpam rikämarqunki, y reqimankim. Qamqa rikëkämankim jamakuptï y sharkuptïpis. Karullapitanam imata pensanqätapis musyarqunki. Mëpa ëwanqäta y mëchö jitaranqätapis qamqa tupurqunkim, y llapan nänïkunatam paqwë reqinki.

Salmo 139:23, 24: Dioslla, paqwëpa rikëkallämë, y shonqöta reqï. Alli rikëkallämë, y yarpachakatsimaq pensënïta reqï, y rikëkullë mä noqachö kankush mana alli rurëkuna, y pushamë mana ushakaq alli kaq nänipa

Proverbios 4:23: Imapitapis masqa shonqïkita täpë, porque tsëpitam kawënikiqa kanqa.

Proverbios 8:30, 31: Tsënam obra ruraq maestronö lädonchö këkarqä, y Pëwan kaptïmi llapan junaq kushishqa karqan, y noqapis llapan tiempom Pëpa lädonchö kushishqa këkarqä, jina kë patsachö imëka wayoqta rikarpis alläpam kushikurqä, nunakunatapis pasëpam kuyarqä y pëkunarëkurmi kushishqa karqä.

Proverbios 16:9: Nunapa shonqunqa më nänipa ëwanampaqpis patsätsita puëdenmi, pero mëman japanampaq kaqtaqa kikin Jehovämi patsätsin.

Habacuc 2:3: Kë revelación shamoq tiempopaqraq kaptimpis, chämunqam, manam ulikuntsu. Tardeyämuptimpis mäkoq mäkoq rikachakurllana këkë; rasumpam chämunqa. Manam tardetsu chämunqa.

Malaquías 2:14, 16: Y qamkunanam niyarqunki: ‘¿Imarëkur?’ Kërëkurmi: Jehovämi rikashqa joven këkar casakunqëki warmikita traicionanqëkita, yanapashoqniki y contrato rurayanqëki warmiki këkaptin. Pëqa chikishqam divorciakïta −nishqam Israelpa Diosnin Jehová−; [...] shonqïkikuna munanqankunapitaqa cuidakuyë, y manam traicionëroqa kayänëkitsu.