Imëka sasakunapa (ajakunapa) pasarqa kallpannaqmi tikrarintsik y manam imaman pensëta ni imanö këta puëdintsiktsu. Sasakunapa pasarmi David tsënö sientikurqan. ¿Imanötaq alli tsarakurqan? Salmu libruta qellqanqanchömi respuestata tarintsik, pëmi kënö nirqan: “Yanapamänampaqmi Jehoväman qayakurqä, tsapëkamänampaqmi Jehoväman rogakurqä. Llapan yarpachakïnïkunatam pëta willëkarqä, llapan llakikïnïpitam parlapëkarqä, kallpannaq tikrariptïmi, purina nanïta reqirirqëki”. Awmi, Davidqa Jehoväpa yanapakïnintam humildäwan mañakurqan (Sal. 142:1-3).

Juk Salmuta qellqanqanchönam kënö nirqan: “Jehoväpa wayinchö llapan kawënïchö täränäpaqmi Jehoväta mañakurqö. . . y tsëtam ashishaq; tsënöpa Jehovä yachanëpaq kanqanta rikänäpaq y templunta kuyanäpaq” (Sal. 27:4). Pensarishun tabernäculupa patiunman David rikarëkanqanta, tsë tiempuchöqa tsëchömi ëllukäyaq Diosta adorayänampaq. Levï kastapita mana karninmi waqtallapita rikan. Tsënö kaptimpis, agradecikurninmi llapan junaqkuna tsëchö këta munan, tsënöpa “Jehovä yachanëpaq kanqanta” rikänampaq.

Jehovä yachanëpaq kaptinmi, sirweqninkuna imanö adorayänampaq Jehovä patsätsinqanta kuyakïwan Davidqa imëpis rikaq. ¿Tsënöku noqantsikpis kuyakïwan rikantsik?

Kanan witsankunaqa manam juk wayipitaraqtsu dependin Diosta adorë, sinöqa Dios ruranqan templupitam, tsë ninanqa, imanö adoranapaq kaqta Jehovä patsätsinqanmi. * Dios ruranqan templuta kuyarqa, noqantsikpis Davidnöllam “Jehovä yachanëpaq kanqanta” rikäshun.

Tabernäculupa puntanchö këkaq ofrendakunata kayayänan altarpaq parlarishun (Ex. 38:1, 2; 40:6). Tsë altarqa Jesus nunakunapaqrëkur wanunqanta, Dios listu chaskinampaq këkanqantam rikätsikoq (Heb. 10:5-10). ¿Këqa yanapamantsiktsuraq? Apostul Pablum kënö qellqarqan: “Contran quecashqapis tsurin Jesucristu wanonqanrecurmi Dioswan amishtarqontsic” (Rom. 5:10). Jesus noqantsikrëkur wanunqanman markäkurqa, Jehoväpa rikënimpaqmi alli kashun y mana mantsakushpam pëman witishun, tsëmi kuyë, amïgun mas kanapaq yanapamäshun (Sal. 25:14).

Jutsantsikunapita perdonamashqam, “alli cawaquichona” Jehoväwan kantsik (Hëch. 3:19). Jutsayoq kanqantsiktaqa igualaratsishwan, juk nuna wanunampaq condenashqa këkarnin, ruranqankunapita arrepentikur chipyëpa cambianqanwanmi. Tsëta rikarmi, juk llakipäkoq juezqa wanunampaq kaqpita perdonarin. ¡Imanö kushishqaraq sientikun jutsallakoq nunaqa! Jehoväqa tsë jueznömi, porqui shonqupita patsë jutsankunapita arrepentikoqkunataqa wanunampaq kaqpitam perdonan.

Diosta adorayänampaq imëkata rurayanqankunatam Davidqa Jehoväpa wayinchö rikarqan. Tsëchö jatun reunionkunapaq ëllukäyanqanta, Leyta leyiyanqanta y yachatsikuyanqanta, inciensuta kayayanqanta, y sacerdötikunawan Levï kastakuna Diosta sirwirnin imanö rurayanqanta (Ex. 30:34-38; Nüm. 3:5-8; Deut. 31:9-12). Kanan witsampis, tsënöllam rurantsik.

“¡Imanö alli y kushikïpaqmi wawqikuna y panikuna juntu kawakuyanqan!” neq palabrakunaqa  unënöllam kanan witsampis rasunlla (Sal. 133:1). Entëru Patsachömi atskaq wawqikuna y panïkuna mirayashqa (1 Pëd. 2:17). Reunionnintsikkunachömi Bibliata leyiyämun y yachatsikäyamun. Y Jehoväqa markantam utilisan Bibliapita yachatsimänapaq. Jina familiachö o japallantsik yachakunapaqmi publicacionkuna atska kapamantsik. Jehoväpa Testïgunkunata Pushaqkunapita jukninmi kënö nin: “Jehoväpa Palabranman yarpachakunqä, ima ninan kanqanman pensanqä, yachaq y tantiyaq këta ashinqämi Diospa kaqchö rïcu y kushishqa kanapaq yanapamashqa”. Awmi, ¡yachaq këta ashinqantsikqa kushitsimantsikmi! (Prov. 2:10.)

Unënöllam, sirweqninkunapa mañakïninkuna Jehoväman cada junaq chan. Tsë mañakïkunaqa shumaq pukutaq (mushkoq) inciensunömi pëpaq (Sal. 141:2). ¡Humildäwan mañakunqantsikta Jehovä wiyanqanta musyanqantsikqa kallpatam qomantsik!

Moisesmi kënö nir mañakurqan: “Noqantsikchö këkutsun Jehovä Diosnintsikpa yachanëpaq kënin, y rurayanqäkunaman bendicionnikita churëkamï” (Sal. 90:17). Pëpita yachatsikunqantsiktam Jehoväqa bendicin, porqui shonqupita patsëmi tsëta rurantsik (Prov. 10:22). Itsa rasun kaqta reqinampaq pillatapis yanaparquntsik, o atska watakunapa alli tsarakurquntsik yachatsikunqantsikta mana wiyëkäyaptin, qatikachëkämashqa, qeshyakunawan o yarpachakïkunawan këkarpis (1 Tes. 2:2). Tsënö kaptimpis, “Jehovä yachanëpaq” kanqanta y puëdinqantsikmannö ruranqantsikkunapita kushikunqantam rikarquntsik.

Davidmi kënö cantarqan: “Jehovämi tocamaq kaq herenciäqa. Shumaq vendiciontam qomarqunki. Noqataqa mas allim kaqmi tocamashqa” (Sal. 16:5, 6). Pëqa agradecïdu sientikoq ‘tocanqan’ kaqpitam, juk parlakïchöqa, Diosta sirwinqampita y rikënimpaq alli kanqampita. Itsachi Davidnöpis mëtsika llakikïkunapa pasashun, peru pënöllam atska bendicionkunata chaskirquntsik. Tsëmi, rasumpa kaqchö imëpis këkäshun, y imanö adoranapaq kaqta Jehovä patsätsinqankunata imëpis kuyashun.