YANAQÏ Evelyn Trabert-tawan noqatam Watchtowerpa Galaad Escuëlaman invitäyämashqa kayarqan, y tsëpitam Santa Äna markaman yanapakoq kachayämarqan. Peru 29 watapa misionëra kanqäta manaraq willayarniki puntataqa willariyashqëki imanir tsënö sirwinäpaq akranqäta.

1923 watachömi Spokane (Washington, Estädus Unïdus) markachö yurikurqä. Luteränu këkarpis teytäkunaqa infiernupaq yachatsikuyanqanta manam creiyaqtsu. Manam aceptayaqtsu kuyakoq Dios infiernuchö nunakunata sufritsinqanta (1 Juan 4:8). Teytäpaqa tanta rurëmi trabäjun karqan. Juk kutichömi, trabajaq mayin nirqan infiernuchö nunakuna jipayanqanta Biblia mana yachatsikunqanta. Tsëpita ichik tiempullatanam teytäqa Jehoväpa testïgunkunawan yachakur qallëkurqan, y wanurishqa ima pasamanqantsiktam rasumpa kaqta yachakurqan.

Isqun watayoqllaran karqä, peru yarpämi teytäkuna imanö kushishqa yachakuyanqanta. Masran kushikïkuyarqan Diospa jutin Jehovä kanqanta y kima Dios jukllëllachö mana kanqanta musyarirnin. Tsë llapantam shonqöman peqäman  churarirqä y tsënöpam Juan 8:32 textu ninqannöpis libri quedarirqä. Manam Bibliata estudië ajayëpaq kanqantaqa ni imëpis rikashqätsu, sinöqa alläpa kushikïpaq kanqantam. Wakinwan parlëtaqa alläpam mantsëkoq kä, peru tsënö kaptimpis teytäkunatam yachatsikoq yanaqaq kä. Pëkunaqa 1934 watachömi bautisakuyarqan y noqanam 1939 watachö. Tsë watapaqqa 16 watayoqmi këkarqä.

1940 juliu killapaqqa wayïkunatam teytäkuna rantikuriyarqan, y tsënöpam Coeur d’Alene (Idaho) nishqan markata ëwakuyarqä precursornö kimä mas yachatsikuyänäpaq. Cärrukunata altsayanqan juk tallerpa segundu pïsunchömi wayïkuna arrendariyarqä. Tsëchömi reunionkunata rurayaq kayä. Tsë watakunapaqqa manam Yachatsikuyänan Wayikuna karqantsu, tsënöpam cäsi llapan cristiänukuna wayinkunallachö o ichikllam localkunallachö juntakäyaq.

1941 watapaqqa, San Luis (Misuri) markachömi juk asamblëapaq juntakäyarqä. Domingu “wamrakunapa junaqnin” kaptinmi, 5 watapita 18 watayaq kaqkunata puntaman täkuyänäpaq niyämarqan. Discursunta ushanampaq ichikllana pishikaptinmi turi Joseph Rutherfordqa llapäta kënö niyämarqan: “Wamrakuna, qamkuna Jehoväta y Rey churanqanta wiyakïta akrashqa karninqa, sharkayämï”. Llapäkunam sharkuyarqä. Y tsëmi niyämarqan: “¡Rikäyë 15.000 nunakunapitapis mas Testïgukuna!”. Tsë höram precursöra imëyaqpis kanäpaq akrarirqä.

Tsë asamblëa pasariptin juk ishkë killakunallatanam Californiapa sur kaq lädunchö Oxnard markaman ëwakuyarqä. Mushoq congregaciontam tsëchöqa patsätsita munayarqä. Ichikllan puritsina wayi juk cämayoqllachömi täräyarqä. Puntataqa kikïpaq juk cuartömi karqan, peru kananqa llapan paqaskunam mësallachö “cämä” alistayaq kayä.

7 de diciembri 1941 watapaqqa, Pearl Harbor (Hawai) markatam bombakunawan Japon ushakätsishqa karqan, y waräninnam Estädus Unïduspis Ishkë kaq Jatun Guërraman yëkurirqan. Tsëmi California markata ëwakuyarqä. Japones submarïnukunam tsë markapa costankunaman yëkamushqa këkäyarqan, tsëmi autoridäkuna mandakuyarqan ampikunapa (tsakaykunapa) llapan luskunata upitsiyänäpaq. Paqwë ampi kaptin ni imata disparëta mana puëdiyänampaq.

Septiembri de 1942 watapaqnam, Cleveland (Ohio) markachö Asamblëaman ëwayarqä. Nathan Knorrmi discursamurqan “Yamë kawakï... ¿imëyaqpis këkanqallatsuraq?” nishqanta. Apocalipsis librupa 17 kaq capïtuluntam yachatsikamurqan, “mantsanepaq achachi” ima kanqampaq y ‘unemi cawarqan, y cananqa mananam cawannatsu; peru cawarimurmi, wanwanyarëcaq uchcupeq ullucaramonqa’ neq ima kanqanta (Apoc. 17:8, 11). Entienditsikamurqan ‘mantsanepaq achachiqa’ Sociedad de Naciones kanqantam y 1939 watachö ushakanqantam. Y Bibliaqa willakurqan jukwan trokashqa kanampaq kaqta y tsërëkur ichik tiempullapa yamë kawakï kanampaq kaqta. Y cumplikärirqanmi. 1945 watapaqqa Ishkë kaq Jatun Guërra ushakärirqanmi, y ‘mantsanepaq achachiqa’ yapëmi kawarirkamurqan, Nacionis Unïdas jutiyoqna. Tsëpita patsëmi  Testïgukunaqa atska nacionkunaman yachatsikur chäyashqa.

Tsë profecïam yanapamarqan Jehoväpa markanchö mëtsika rurëpaq kanqanta rikänäpaq. Tsëmi, shamoqnin wata Galaad escuëla qallanampaq kaqta willakarayämuptin, noqapis misionëra këta alläpa munëkurqä. 1943 watapaqqa precursöratanömi Portland (Oregon) markaman kachayämarqan. Tsë witsanqa tocadiscuwanmi yachatsikuyaq kayä. Juk discursutam wiyariyaq, y tsëpitanam Jehoväpa Gobiernumpita parlaq publicacionta akraratsiyaq kayä. Tsë tiempukunachöqa misionëra këllapaqmi yarparäkoq kä.

Kushikïpaqmi karqan 1944 watachö yanasä Evelyn Traberttawan noqata Galaad escuëlaman invitarayämaptin. Bibliata estudiëta valurayänäpaqmi maestrükuna yachatsiyämarqan. Humildäninkunapitaqa alläpam yachakuyarqä. Höraqa, pëkunam mësäkunaman mikïta sirwiyämaq. Y pitsqa killapa yacharatsiyämaptinmi 22 de enëru 1945 wata graduakuriyarqä.

Juniu killa 1946 watapaqmi, Evelynwan noqa y Leowan Esther Mahan, El Salvador nacionman chäyarqä. Tsëchöqa ellïpaq ‘chacracunacho miquicuna poqurishqa cuentam nunacuna quecayarqan’ (Juan 4:35). Tsëpita killakuna pasariptinmi, Santa Äna markachö ishkë junaq kaq asamblëata primëra vez rurayarqä. Llapan puëdiyanqätam invitayarqä, y 500 nunakunam shayämurqan. Tsëta rurayanqäqa sacerdötikunata alläpam piñëkatsirqan, tsëmi semäna pasariptinqa puntata willayanqaqnöpis wayïkunaman shamïkur imëkata rurayarqan. Tsënö kaptimpis, manam tsë markapita ëwakuyarqätsu. Masran munëkuyarqä alli shonquyoq nunakunata yanapëta. Sacerdötikunaqa manam munayaqtsu nunakuna Bibliata leyiyänanta y wakinllam rantitapis puëdiyaq. Tsënö kaptimpis, mëtsikaqmi rasumpa kaq yachatsikïta musyëta munayaq. Jina alläpam valurayaq español idiömata yachakuyaptï, Jehoväpita y shamoq tiempuchö imakunata kë Patsachö ruramunampaq kaqta yachatsiyaptïpis.

Rösa Ascenciu warmitam Bibliapita puntata yachatsirqä. Yachakur qallëkurmi juntaranqan nunapita rakikäkurirqan. Tiempuwanqa tsë nunapis Bibliapitam yachakur qallëkurqan. Tsëpitanam casakuriyarqan y bautisakuriyarqan. Santa Äna markachöqa Rösam puntata precursöra tikrarirqan. *

Rösapaqqa juk tiendanmi kapurqan. Yachatsikoq yarqunampaqqa Jehoväman markäkïkurmi wichqarkur ëwakoq. Yachatsikur usharir tiendanta kichariptinmi nunakuna juntariyaq. Tsëchömi rasumpa Mateu 6:33 textu cumplikanqanta rikärirqan, y wanunqanyaqpis Jehovätam sirwirqan.

 Tsë markapa sacerdötinmi juk kuti, wayita alquilayämaqta nirqan wayimpita mana qarquyämaptinqa, pëta y warminta tsë Iglesiapita qarquriyänampaq kaqta. Tsë nunaqa juk alläpa reqishqa nunam karqan, pëqa piñashqam këkärqan sacerdötikuna mana allikunata rurayanqampita, y manam mantsarqantsu imata niptimpis. Y Iglesiapita qarquptimpis mana ima qokunqantam nirqan, y wayinchö imëyaqpis quedakuyänäpaqmi niyämarqan.

San Salvador markachömi, Baltasar Perla inginiërupa warmin juk misionërawan yachakïkarqan. Pëqa alläpa alli nunam karqan, peru religionninchö imëka mana allikunata rikashqa karninmi Diosmanqa markäkoqnätsu. Manaraq Testïgu karpis, sucursalnïkunapa plänunkunata debaldilla ruramunampaqmi äniyämarqan.

Testïgukunawan trabajanqanchömi Baltasarqa rasumpa kaq religionta tarinqanta cuentata qokurirqan. Y 1955 wata 22 de julium bautisakurirqan, y tsëpa qepanllamannam Paulïna warmimpis bautisakurirqan. Ishkë wamrankunapis Jehovätam sirwiyan. Juknin kaq Baltasar wamranqa, 49 watapanam Estädus Unïdus Brooklyn Betelchö yanapakun. Y kananqa Sucursalta rikaqnömi yanapakïkan. *

San Salvadorchö jatun asamblëakunata rurayänäpaqqa, turi Perlam localta tariyänäpaq yanapayämarqan. Qallananllachöqa ichik kuchunllachömi täkuyaq kayä, peru Jehoväpa bendicionninwan mirarninmi, tsë localpis llapäkunapaq tinkurqannatsu. Bibliata noqawan yachakushqakunawanmi tsëchöqa kushikïpaq tarinakurqä. Alläpa kushikïpaqmi karqan, unë estudiatsinqäkuna kananqa willkä cuenta mushoq Testïgukunata reqitsiyämaptin.

Juk asamblëachö këkaptïmi, juk turi shamïkur jukta willamëta munanqanta nimarqan. Manam pëta ni ichikllapis yarparqätsu, peru kënömi nimarqan: “Santa Änachö këkaptiki wayikita  rumiwan qompayämoqkunachöqa noqapis këkarqämi”. ¡Alläpam kushikïkurqä pëpis kananqa Jehoväta sirwikanqanta musyarirnin! Tsëmi rikäratsimarqan Jehoväta llapan tiempuntsikwan sirwiqa imëkapitapis mas alli kanqanta.

El Salvador nacionchöqa 29 watakunapam misionëra karqä. Jina tsënöllam yanapakurqä Santa Änachö, Sonsonätichö, Santa Teclachö y San Salvadorchö. Peru teytäkunaqa edäna kar wanayämaptinmi, Jehoväman mañakurir 1975 wata Spokane markaman kutikurqä.

1979 watachömi papänï wanukurqan. Tsëpitaqa edäyashqa mamänïtam cuidarqä puwaq watapa, y 94 watayoqmi pëpis wanukurqan. Alläpa sasa tiempum noqapaqqa karqan. Alläpa utishqa y llakishqa sientikurmi herpes zoster, o culebrïlla nishqan qeshyawan qeshyarirqä. Peru Jehoväman mañakunqä, y pë kuyëpa cuidamanqanmi yanapamarqan tsë qeshyata y llakikïta vencinäpaq. Jehoväqa cumplirqanmi Isaïas 46:4 textuchö ninqanta. Pëqa ‘soquyënïchöpis’ cuidamarqan y yanapamarqanmi.

1990 watachöqa Omak (Washington) markatam ëwakurqä. Tsëchöqa español idiömata parlaq nunakunatam Diospita yachatsirqä, y tsëta ruranqäqa alläpam kushitsimarqan. Wakin yachatsinqä kaqkunaqa bautisakuyarqanmi. Tiempuwanqa Omak markachö wayïtaqa manam atiendita puëdirqänatsu, tsëmi 2007 wata noviembri killapaqqa Chelan markata ëwakurqä. Këchöqa noqallam mas ëdäyashqa Testïgu kä. Tsë congregacionchö cristiänu mayïkunaqa ëllukarkayämashqa awilankunatanömi. Noqapaq llapan rurayanqampitam alläpa agradikö.

Jehoväpaq masta rurëta munarmi, casakushqätsu ni wamräkuna kashqatsu (1 Cor. 7:34, 35). Manam llapan munanqantsiktaqa kë vïdachö katsita puëdintsiktsu, tsëmi Jehoväta llapan kawënïwan sirwinäpaq masqa churakarqö. Mëtsikaqtam rasumpa kaq yachatsikïta musyatsirqö, y pëkunaqa wamräkuna cuentam tikrayashqa. Mushoq Patsachöqa llapan rurëta munanqäkunatam rurëta puëdishaq. Salmu 145:16 textum alläpa gustaman, tsëchömi Jehovä änikun, ‘llapan kawaqta munayanqanchö bendicinampaq’ kaqta.

91 watayoqna këkaptïpis, salornïqa permitimanran precursöra kanäpaq. Tsëmi yanapamashqa jövinnö sientikunäpaq y musyämi imapaq kawanqätapis. El Salvadorman chänä witsanqa tsëran yachatsikïqa qallëkarqan. Satanas michäkïkaptimpis, kananqa 39.000 publicadorkunam tsë nacionchö kayan. ¡Tsëqa markäkïnïtam mas miratsishqa! Awmi Jehoväqa markanwanmi këkashqa.