Jehoväpa Sirveqninqa noqantsikrëkurmi wanorqan

“Hutsantsikrëkurmi tuksïkäyarqan; qoyï qoyïmi maqayarqan [...], heridankunarëkurmi librashqa karqontsik hutsantsikkunapita.” (ISA. 53:5.)

1. ¿Imakunamantaq yarpashwan Jesuspa wanïninta celebrarqa? Y ¿Isaías libropa mëqan capïtulontaq yanapamäshun këta más alleq musyanapaq?

CADA watam ëllukantsik o qorikantsik Jesuspa wanïninta yarpänapaq, y tsëmanqa ëwantsik wanïnin y kawarimïnin imëka allikunata apamonqanman yarpänapaqmi. Kë celebracionqa yarpätsimantsik Jehovälla autoridadyoq, ciëlota patsata gobernaq kanqanta y shutin santo kanqanta, llapan munënin rurakanqanta, y salvamaqnintsik kanqantapis. Jesuspa wanïnin imakunata apamonqantapis más alleq musyanapaqqa, Isaías 53:3-12 nenqanta leinqantsikmi yanapamäshun. Kuchumpita kuchunyaqmi profeta Isaiasqa qellqarqan Jesus wanïninyaq tukï mana allikunapa pasananta. Hinamampis tsë wanïninwan ciëlota ëwaqpaq kaqkuna y Patsachö quedaqpaq kaqkuna bendicionkunata chaskiyänantapis qellqarqanmi (Juan 10:16).

2. ¿Profeta Isaías qellqanqan imatataq rikätsimantsik y tsëpita yachakï imapaqtaq yanapamäshun?

² Qanchis pachak watakuna Jesus yurinampaq pishikaptinmi, Jehová profëtan Isaiaswan qellqatserqan akrashqa Sirveqnin tukïta rurëkäyaptimpis wanonqanyaq alli tsarakunanta. Tsënöpam Jehová rikätsikorqan Tsurinman pasëpa markäkonqanta o yärakonqanta.  Profeta Isaías qellqanqanta yachakonqantsikmi yanapamäshun, shonquntsikpita patsë Jehová Diosman más markäkunapaq o yärakunapaq.

Despreciarmi mana kaqpaq churayarqan

3. a) ¿Imanirtaq Jesusta shumaq chaskiyänan karqan? b) ¿Pero judiokuna imanötaq chaskiyarqan?

³ (Lei Isaías 53:3.) Jehová Diospa hapallan tsurimpaqqa manachi fäciltsu karqan, Teytanta haqirir kë patsaman shamïkur hutsapita y wanïpita nunakunata salvananrëkur wanïqa (Fili. 2:5-8, NM). Unëqa animalkunata pishtëkurmi Diospaq kayayaq hutsankunapita perdonta chaskiyänampaq, tsënö rurarpis manam chipyëpaqa hutsankunapita perdonta chaskiyaqtsu. Pero Jesus wanunqanwanqa chipyëpam hutsankunapita perdonta chaskiyänan karqan (Heb. 10:1-4). Tsëta ruranampaq kaqta musyëkarnimpis nunakunaqa manam shumaqtsu chaskiyarqan Jesus shamuptin. Judïokunallapis Pëta shuyëkarnenqa kushishqachi chaskïkuyanman karqan, pero manam tsëtatsu rurayarqan (Juan 6:14). Cristutaqa pasëpam ‘despresyayarqan’, Isaías qellqanqannöpis ‘mana kaqpaqmi churayarqan’. Apóstol Juanmi kënö qellqarqan: “Marca mayincunaman chëcamuptinpis, manam pecunallapis chasquiyarqantsu” (Juan 1:11). Apóstol Pedrunam Judiokunata kënö nerqan: “Une awiluntsic Abraham, Isaac y Jacob adorayanqan Diosnintsicmi permiterqan sirweqnin Jesusta nunacuna alabayänanpaq. Petam qamcuna mana reqeq tucushpa autorida Pilatuman entreguecuyarqequi. Cacharita munaptinpis, manam munayarqequitsu. Y Dios mandacushqancunata ruraq y jutsannaq nuna quecaptinpis, pe libri cananpaqqa manam mañacuyarqequitsu” (Hech. 3:13, 14).

4. ¿Imanötaq Jesusqa ‘qeshyë imanö kanqantapis musyarqan’?

⁴ Hina Isaiasqa qellqarqanmi “qeshyë imanö kanqantapis musyanmi” Diospa sirveqninqa nishpa. Pero Bibliaqa Jesus utirqanmi nirpis manam qeshyarqanmi nintsu (Juan 4:6). Tsëpenqa, ¿imanötaq musyarqan ‘qeshyë imanö kanqantapis’? Tsëtaqa musyarqan yachatsikoq ëwanqanchö qeshyaq nunakunata imanö hipayanqantapis rikarninmi, y tsëmi llakipäkoq kar kachakätserqan (Mar. 1:32-34). Tsënöpam cumplerqan kënö qellqarëkaq profecïata: “Llapan qeshyantsikkunatapis pëmi aparqan, nanatsikïnintsikkunatapis aparqanmi” (Isa. 53:4a; Mat. 8:16, 17).

“Dios castiguëkaqnömi karqan”

5. ¿Imanötaq wakinkunaqa rikäyarqan Jesus wanonqanta, y imanötaq këqa alläpa llakitserqan?

⁵ (Lei Isaías 53:4b.) Jesuspa tiemponchö nunakunaqa wakin wakinllam musyayarqan Jesus imarëkur hipar wanonqanta. Y wakin nunakunaqa Diosmi castiguëkan niyarqanmi (Mat. 27:38-44, NM). Judïokunaqa, Diospa contranmi parlan niyarqanmi (Mar. 14:61-64; Juan 10:33). Tsënö niyaptimpis Jesusqa manam ni ima hutsatapis rurarqantsu. Sinöqa Teytanta kuyarmi wanunan karqan, tsënö kaptimpis imaraq shonqunchö nanatsikorqan mana alli nunanö wanunampaq kaqta musyar. Imanö kaptimpis, listom këkarqan Teytampa munëninta ruranampaq (Mat. 26:39).

6, 7. a) ¿Tsurinta imata rurayänantaraq permiterqan Jehová? b) ¿Imanirtaq Isaiaschö nin, wambranta hipaqta rikarninmi Jehová kushikorqan?

⁶ Isaías qellqan profecïachöqa, manam nunakuna Diosmi castiguëkan nishpa parlayanqanllapaqtsu willakun, sinöqa ‘kikin Jehovämi wambran hipaqta rikarnin kushikorqan’ ninmi (Isa. 53:10). Pero Jehoväqa wambranta kuyarninmi  kënö nishqa karqan, “¡Rikë! ¡Sirveqnïta, [...] Pëtam noqa akrarqö! Përëkurmi kushikö”. Tsënö nikarqa, ¿imanötaq kushikunman karqan tsurin wanoqta rikar? (Isa. 42:1.) ¿Imaninantataq ‘kikin Jehovämi wambran hipaqta rikarnin kushikun’ nin Isaiaschö?

⁷ Këta musyarinapaqqa Satanás ruranqanman yarpärishun, Diospa contran churakarninmi, Satanasqa nikarqan, Diospa sirveqninkuna kë patsachö y ciëlochö këkaqpis Dios servita haqiriyänanta (Job 1:9-11; 2:3-5). Wanonqanyaq tsarakonqanwanmi Jesusqa rikätsikorqan Satanás mana allita, nunakunapaq y Jehoväpaq parlanqanqa mana rasumpa kanqanta. Tsurinta chikeqninkuna hipatsir wanutsiyänantam permiterqan. Y alläpa llakikïkarpis Jehoväqa kushikorqanmi wanonqanyaq alleq tsarakonqanta rikarnin (Pro. 27:11). Hina wambrampa wanïninman markäkoq o yärakoq nunakuna salvakuyänanta musyarnimpis kushikorqanmi (Luc. 15:7).

Hutsantsikrëkurmi wanorqan

8, 9. a) ¿Imata tarinapaqtaq yanapamantsik Jesus wanonqan? b) ¿Këpaq parlarnin imataq nerqan apóstol Pedru?

⁸ (Lei Isaías 53:6.) Oqrakashqa üshanömi, purerqantsik Adan hutsata rurarnin qeshyaman, wanïman qarpamanqantsikpita libre këta ashirnin (1 Ped. 2:25). Hutsasapa karninmi, Adan oqranqanta ni mëqantsikpis kikintsikllapitaqa tarita puëderqontsiktsu (Sal. 49:7). Tsënö kaptimpis kuyakoq karninmi Jehová Diosqa permitishqa tsurin Jesucristupa wanïninwan, Adan oqranqanta tarinantsikpaq. Kikin Jesucristupis tsarir wanutsiyänantam permiterqan, hutsantsikrëkur y noqantsikrëkur huk qeruchö wanurninmi hutsantsikta apakorqan.

⁹ Apóstol Pedrum kënö qellqarqan: “Tseno sufrinantsicpaqmi Diosnintsic qayamarqantsic. Jesucristu noqantsicrecur sufrishqa captinmi, musyantsic peno sufrinantsicpaq cashqanta. [...] [‘qeruchö’, NM] wanurmi, jutsantsiccunata quiquin apacorqan. Manam jutsata rurar cawanantsicpaqtsu jiparqan, sinoqa allillata rurarna cawanantsicpaqmi”. Y Isaías qellqanqantam yapë nirerqan: “Pepa eridanrecurmi Diosnintsic juclaya nunatana ticratsimarqantsic” (1 Ped. 2:21, 24; Isa. 53:5). Këmi yanaparqan hutsasapa nunakuna Dioswan amistayänampaq tsënöpa Pëwan alli këta tariyänampaq. Tsëmi apóstol Pedru nerqan: “Tsenomi Jesucristu jutsannaq quecarpis, juc cutilla wanorqan jutsantsiccunarecur, Diosnintsicman pushamänantsicpaq” (1 Ped. 3:18).

Achkastanömi wanutseq apayarqan

10. a) ¿Bautizakoq Juanqa ima nishpataq qayarqan Jesusta? b) ¿Imanirtaq alläpa alli karqan Jesusta tsënö qayanqan?

¹⁰ (Lei Isaías 53:7, 8.) Bautizakoq Juanmi Jesusta rikärir kënö nerqan: “¡Ricayë, taqemi Diospa achcasnin. Pemi jinantin munducho nunacunapa jutsancunarecur wanonqa!” (Juan 1:29). “Achcasnin” nerqa itsa bautizakoq Juanqa yarparqan Isaías kënö nenqanta: “Imëka achkastanömi wanutseq apayarqan” (Isa. 53:7). Hinamampis Isaías Jesuspaq kënömi nerqan: “Kawënintam qorqan wanonqanyaq” (Isa. 53:12). Y wanïninta yarpäyänampaq patsätsenqan paqasmi, vïnoyoq cöpata tsarirkurnin qorqan chunka huk apostolninkunata kënö nir: “[Këwanmi] mushoq contratu ruracärin. Noqam yawarnïta ramarnin, wanushaq atscaq nunacunapaq. Tsenopam jutsancuna perdonashqa canqa” (Mat. 26:28).

11, 12. a) ¿Isaac wanunampaq listo këkanqan imatataq rikätsimantsik Jesuspita? b) ¿Jehová imanö kanqantataq yarparänantsik Jesuspa wanïnin yarpëman ëwarnin?

¹¹ Abrahanpa, tsurin Isaacnömi Jesuspis listo këkarqan Teyta Diospa voluntadninta rurar wanunampaq (Gén. 22:1, 2, 9-13; Heb. 10:5-10). Isaacqa listom këkarqan wanunampaq, pero tsë sacrificiotaqa ruranan karqan kikin Abrahanmi (Heb. 11:17). Tsënömi Jesuspis listo këkarqan wanunampaq, pero Jehovämi kë sacrificio rurakänantaqa permiterqan. Këwanmi musyantsik Jehová Dios hutsasapa nunakunata alläpa kuyanqanta.

¹² Kikin Jesusmi kënö nerqan: “Que patsacho nunacunata allapa cuyarninmi, Dios jucllella tsurinta cachamorqan, peman marcäcoqcuna mana condenashqa cayänanpaq sinoqa wiñepa cawayänanpaq” (Juan 3:16). Y apóstol Pablunam kënö qellqarqan: “Jesucristum siqa jutsa rurellacho caquicashqa noqantsicpaq wanorqan. Tsenopam musyantsic Diosqa  allapa cuyamashqantsicta” (Rom. 5:8). Tsëmi cada wata Jesuspa wanïninta yarparnimpis, qonqanantsiktsu, Mayor kaq Abrahán Jehová kë sacrificio ruramonqanta. Jesuspa wanïnin yarpë celebracionmanqa ëwantsik kë sacrificio ruramonqampita agradecikurninmi.

Jehová Diospa sirveqninqa yanapan “nunakunatam Dioswan alli kayänampaq”

13, 14. ¿Jehoväpa Sirveqnin imatataq rurarqan nunakuna “mana hutsayoqnöna chaskishqa kayänampaq”?

¹³ (Lei Isaías 53:11, 12.) Jehovämi nerqan akrashqa sirveqnimpaq: “Sirveqnïmi allita ruranqa, atska nunakuna mana hutsayoqnöna chaskishqa kayänampaq”. ¿Imaninantaq tsëqa? Versículo 12 ushananchömi tantearatsimantsik kënö nir: “Mana wiyakoqkunapa favorninmi churakarqan”. Adanpita shamoq kaqqa llapantsikmi mana wiyakoq kantsik hutsasapa karnin, tsëmi wanïta chaskintsik llapan mana alli ruranqantsikpita (Rom. 5:12; 6:23). Tsëmi Jehová Dioswan alli këta ashinantsik. Isaías 53 capïtulochömi willamantsik imanöpis Jesus hutsasapa nunakunapa favornin churakanqanta. Kënömi nimantsik: “Mana alli rurënintsikrëkurmi hiparqan, heridankunarëkurmi librashqa karqontsik hutsantsikkunapita” (Isa. 53:5).

¹⁴ Hutsantsikrëkur wanurninmi Cristuqa “mana hutsayoqnöna chaskishqa” kanapaq yanapamarqontsik. Apóstol Pablum kënö nerqan: “Diosmi dispunerqan pe puedeq canqannolla Jesucristupis puedeq cananpaq. Jesucristu [...] [‘qeruchö’ NM] wanonqanrecurmi que patsacho y sielucho quecaqcunatapis, Dios, ‘Cananqa noqawan alli pasaquichonam cacushun’ nerqan” (Col. 1:19, 20).

15. a) ¿Pikunataq kayan ‘sielucho quecaqcuna’ nishpa Pablu qayanqan? b) ¿Pikunallataq tantata mikuyanman y vïnota upuyanman Jesuspa wanïnin yarpëchö y imanir?

¹⁵ ‘Sielucho quecaqcuna’ o ciëlopa ëwaqpaq kaq nunakunam, Jehová Dioswan amistayan, Jesucristu yawarninta ramanqanrëkur, y gobernayämonqa ciëlopitam kë Patsaman. Kë cristianokunatam hutsannaq nunatanöna Diosnintsik chaskin ciëlochö kayänampaq (Heb. 3:1; Rom. 5:1, 18). Tsënöpam Jehová Diosqa kë nunakunata tsurinkunatanöna chaskin. Tsëmi pëkunaqa akrashqa kayan Jesuswan paqta reynö y sacerdoteno gobernayämunampaq, y tsë “erensiata” chaskiyänantaqa santu espïritun musyatsin (Rom. 8:15-17; Apo. 5:9, 10). Tsënöpam espiritual kaq Israel marka këman chäyan, y yëkuyan mushoq conträtoman (Gál. 6:16; Jer. 31:31-34). Tsëmi tsë mushoq conträtoman yëkushqa karnin, pëkunaqa Jesuspa Wanïnin Yarpë celebracionchöqa tantata mikïta puëdeyan y vïnotapis upita puëdeyan, y tsë conträtoman yëkuyanqantaqa kikin Jesusmi kënö nerqan: “Que copacho quecaq binoqa yawarnï [“cuentam”, NM]; y tse yawarnïwanmi Dios mushoq contratuta patsacäratsin nunacunawan. Tsemi qamcunapaqrecur ramashqa canqa” (Luc. 22:20).

16. a) ¿Pikunataq kayan “que patsacho” kaqkunapaq Pablu parlanqan? b) ¿Imanöpataq Diosnintsik alli nunakunatanöna chaskin?

¹⁶ “Que patsacho” kaqkunapaq Pablu parlanqanqa kayan, kë Patsa huk shumaq huertaman tikraptin tsëchö kawaqpaq kaqkunam. Kë nunakunatapis Jesusqa yanapanmi alli nunakunatanöna Jehová chaskinampaq. Pëkunaqa Jesucristu wanonqanmanmi fëninkunata churayan, tsëmi “achcas yawarninta ramar wanininwan jutsancunapita  perdonashqana captinmi, ropancunapis yulaq püruna quecan”. Jehoväqa alli nunakunatanönam chaskin, pero manam espiritual wambrankunatanötsu, sinöqa amigonkunatanömi, y kë patsachö “imeca nacaquicunatapis” kawëkar pasayänampaqmi änin (Apo. 7:9, 10, 14; Sant. 2:23). Pëkunaqa manam mushoq conträtoman yëkuyantsu, sinöqa kë patsachömi kawayanqa y manam ciëlopaqa ëwayanqatsu, tsënöpam Jesuspa wanïnin yarpëchöqa mikuyantsu tantata ni upuyantsu vïnota. Tsënö kaptimpis tsë celebracionman ëwarqa rikätsikuyan respetakoq kayanqantam.

Jehová y sirveqnin Jesus rurayanqampita agradecikushun

17. ¿Imanötaq yanapamarqontsik Isaías qellqanqampita yachakonqantsik Jesuspa wanïnin yarpëman ëwanapaq?

¹⁷ Kë Isaiaschö Diospa sirveqnimpaq qellqarëkaqkunata yachakonqantsikmi, yanapamäshun listo këkänapaq Jesuspa wanïnin yarpëman ëwanapaq. Hinamampis yanapamarqontsikmi “Jesucristu imano cawanqantapis” maslla musyanapaq (Heb. 12:2). Këchömi yachakorqontsik Diospa tsurenqa llapanchö wiyakoq kanqanta. Y manam Satanasno ni ichikllapis munënin ruraqtsu, tsëpa rantenqa Teytan yachatsenqantam kushishqa yachakun, y alleqmi musyan Jehovälla llapampa hanampa Puëdeq y Mandakoq kanqanta. Yachatsikoq ëwanqanchömi Jesus rikätsikorqan kuyakoq y llakipäkoq kanqanta, tsëmi kachakätserqan atska nunakunata qeshyankunapita, y Dioswan alli këta tariyänampaqpis yanaparqanmi. Tsëta rurarmi rikätsikorqan kë patsaman gobernamurnin llapan ruranampaq kaqta (Isa. 42:4). Nacionkunapaq aktsi cuenta karnin llapan nunata yachatsenqanmi, noqantsiktapis yanapamantsik kushishqa yachatsikoq ëwanantsikpaq (Isa. 42:6).

18. ¿Imanirtaq kushitsimantsik Isaías qellqanqampita yachakonqantsik?

¹⁸ Isaías qellqanqanqa hina yanapamantsik Jehová Dios kuyë wambranta noqantsikrëkur sufrinampaq y wanunampaq kachamonqanta alläpa agradecikunapaqmi. Jehová Diosqa kushikorqan manam Wambram sufreqta rikarnintsu, sinöqa wanonqanyaqpis fiel kanqanta rikarmi. Jehovanöllam noqantsikpis kushikuntsik Jesus fiel karnin Satanás ulikoq o llullakoq kanqanta rikätsikonqampita, Teytampa shutinta allichö horqanqampita y pëlla mandakoq kanqanta rikätsikonqampita. Hinamampis Cristuqa noqantsikrëkur wanurmi libramarqontsik hutsantsikpita. Tsënöpam, ciëlopaq ëwaqpaq kaqkunata y kë patsachö quedaqpaq kaqkunatapis yanapashqa alli nunakunatanöna Jehová Diosnintsik chaskinampaq. Jesuspa wanïnin yarpëman qorikaq o ëllukaq ëwashqam shonquntsikpita patsë agradecikushun Jehoväwan fiel Sirveqnin Jesus noqantsikrëkur rurayämonqanta.

Yachakonqantsikta yarpärishun

• ¿Imanirtaq Isaiaschöqa ‘Jehovämi wambran hipaqta rikarnin kushikorqan’ nin?

• ¿Imanirtaq Jehová permiterqan hutsantsikrëkur Tsurin wanunanta?

• ¿Imanötaq Jehoväpa Sirveqnin yanapashqa atskaq nunakunata Diosnintsik alli nunakunatanöna chaskinampaq?

• ¿Imanötaq yanapamarqontsik Isaías qellqanqampita yachakonqantsik, Jesuspa wanïnin yarpëman ëwanapaq?

[Yachakunapaq kaqpa tapukïninkuna]

[26 kaq päginachö dibüju]

Maqayarqan y mana kaqpaqmi churayarqan

[28 kaq päginachö dibüju]

“Kawënintam qorqan wanonqanyaq”

[29 kaq päginachö dibüju]

Kë patsachö kawaqpaq kaqkunam, Jesuspa wanïnin yarpëman ëwarnin, Jehoväta respetayanqanta rikätsiyan