Jesuspa yachatsikïninkuna

Dios wiyanqan mañakïkuna

Jesusqa mana pï kanqanchöpis mañakoqmi y qateqninkuna tsënölla rurayänampaqpis yachatserqanmi. Bibliam kënö nin: “Juc cutim Diosman Jesus mañaquicarqan. Mañacur ushariptinnam, jucnin caq disipulun queno nerqan: Teyta Jesus, Diosman mañacuyänäpaq, noqacunatapis yachecatsiyämë [...]. Jesusnam nerqan: Mañacurnin queno niyanqui: ‘Sielucho quecaq Dios Yayalläcuna, jutillequi allapa respetuwan alabashqa catsun’” (Lucas 5:16; 11:1, 2). Tsënömi yachatsikorqan Teytan Jehovällaman mañakunapaq. Pëllam Kamamaqnintsik y “mañakïkuna Wiyaq” (Salmo 65:2).

¿Llapan mañakïtatsuraq Dios wiyan?

Kaqllata kutin kutin rezakïqa manam Diosta kushitsintsu. Tsëmi Jesuspis Diosman mañacorqa ‘juc parlayashqequillata cutïcuryan ushepa ushar parlacuyanquitsu’ nerqan (Mateo 6:7). Tsëmi Diosmanqa llapan shonquntsikwan mañakunantsik. Hutsallakur wanakoq nunapa mañakïninta Dios chaskenqantam Jesus yachatsikorqan, pero huk orgulloso nuna, religionnimpa costumbrenllata qatir mañakonqanta Dios mana chaskinqantapis yachatsikorqanmi (Lucas 18:10-14). Tsëmi mañakïnintsikta Dios wiyananta munarqa, humilde kanantsik y pë munanqanta rurëta tïranantsik. Kikin Jesuspis këtam nerqan: “Cuentata qocuriyanqui [...] quiquïllapita imatapis mana rurashqäta, sinoqa [...] pe gustanqantam noqaqa imatapis siempri rurä” (Juan 8:28, 29). Y Diosman mañakurmi kënö nerqan: “Noqa munashqänoqa ama callatsuntsu, sinoqa qam munashqequino quecullätsun” (Lucas 22:42).

 ¿Imakunapaqtaq mañakushwan?

Diospa shutinta mana respëtowan rikashqa kayaptinmi, Jesus kënö nerqan: “Qamcunaqa queno[mi] mañacuyänequi: Sielucho quecaq Dios Yayalläcuna, jutillequi allapa respetuwan alabashqa catsun. Llapan nunacuna mandadiquicho catsun. ¡Sielucho caqcuna qam mandaconqequita rurayanqannolla, que patsachopis nunacuna rurayätsun!” (Mateo 6:9, 10). Hinamampis Diospa Gobiernon shamunampaqmi mañakunantsik. ¿Imanir? Tsë Gobiernonwanmi Diosqa llapan munanqanta ruranqa ciëlochö y Patsachöpis. Hina Jesusqa nerqanmi: ‘Kada junaq tantäkuna qoykayämey’ nir mañakunapaq, tsënö nerqa yachatsikïkarqan, uryapaq o aruypä, wayipaq, röpapaq, sano kanapaq, y wakin wananqantsikkunapaqpis mañakunapaqmi. Y hutsapita perdonta mañakunantsik alläpa precisanqantapis nerqanmi (Lucas 11:3, 4, QKW).

¿Wakin nunakunapaqpis allitsuraq mañakushwan?

Awmi, Jesuspis rurarqanmi. Huk kutim “nunacuna ñushpi wamrancunata Jesusman apayarqan bendisirnin, Diosta mañacunanpaq” (Mateo 19:13). Hina apóstol Pedrutapis kënömi nerqan: “Noqam rowakurqö qampaq, kreyikiyniki mana pishinanpaq” (Lucas 22:32, QKW). Wakin nunakunapaq, y tukïta ruramaqnintsikkunapaq o noqantsikpaq lluta parlaqkunapaqpis mañakunapaqmi pëqa yachatsikorqan (Mateo 5:44; Lucas 6:28).

¿Imanirtaq Diosman mañakïta haqishwantsu?

Jesusqa tiempota tareqmi mañakunampaq y qateqninkunatapis yätsiranmi o willaparqanmi “imepis, mana qelanashpa Diosman mañacuyänanpaq” (Lucas 18:1). Jehoväqa nimantsik Pëman markäkunapaq o yärakunapämi, hina yarpachakurnin mana punïta tarirpis pëman kutin kutin mañakunapaqmi nimantsik. Mana haqishpa “¡imatapis mañacuyaptiqueqa, Dios qoyäshunquim!” nerqanmi Jesusqa. Këchöqa nikan, kuyaqninta y respetaqninta ciëlochö Jehová Dios wiyanqantam, pëqa llapan mañakonqantsiktam wiyan. Jesusqa kënömi nerqan: “Si qamcuna mana alli ruraq quecarpis tsuriquicunata allicunata qoyanqui, sielucho quecaq Dios Yayanäqa mas alli carmi, mañacoqcunataqa Santu Espiritunta qoyconqa” (Lucas 11:5-13).

Más yachakïta munarqa, Rasumpëpaqa, ¿imatataq Biblia yachatsikun? libropa 17 kaq capïtulonta rikäri. *

[Päginapa ura kuchunchö willakï]