Alli kaq religionqa Biblia nenqannölla kawayänampaqmi yachatsikun

DIOSTA reqitsikoq religionqa, alli kaqkunaman pensanapaq y shumaq portakunapaqmi yachatsimantsik. Hina más alli nuna tikranapaqmi yanapamantsik y alli kaqta ruranapaqpis kallpatam qomantsik. ¿Imanötaq musyantsik këkunachö alli kaq religión yanapakonqanta?

Corinto (Grecia) markachö punta cristiänokunaman apóstol Pablu cartakonqanchömi tarintsik kë tapukïpa respuestanta.  Mana allikunallata rurayanqampitam tsë markachö nunakunaqa reqishqa kayarqan. Tsëmi Pablu kënö anyaran o willaparqan: “¿Manacu musyayanqui tseno mana alli ruraq nunacunaqa Diospa mandaquininman mana yecuyänanpaq caqta[?] Ama pensayëtsu jucwan jucwan pununacur cacoqcuna, imajincuna adoracoqcuna, majayoq quecar jucwan jucwan pununacoqcuna, warmi ricoqcuna [...], suwacuna, qellepaq erayashqacuna, borrachucuna, cuentusterucuna y ranchadorcuna [saqueakoqkuna], Diospa mandaquininman yecuyänanta”. Tsëpitanam kënö nerqan: “Tseno llutan ruraqmi waquinniquicunaqa qamcunapis puntataqa cacuyarqequi, peru cananqa Diosnintsicmi Teyta Jesucristurecur y Santu Espiriturecur, limpiu shonquyoqtana, pellapaqna cayänequipaq, y alli cayänequipaq ticrararatsiyäshushqanqui” (1 Corintios 6:9-11). ¿Cuentata qokurqunkiku? Mana alli rurëninkunata haqirïkur Diosta serviyänampaq y pë munanqannö kawakuyänampaqmi, Cristu yachatsikonqan religión tsë nunakunata yanaparqan.

¿Imanirtaq kanan nunakuna tsënö rurayantsu? Unëpitanam Bibliachö kënö willakorqan: “Chämonqam tyempu alli yachatsikiyta manam awantayanqatsu, sinowqa munashqanmannow wiyëyta munar, juntakäyanqa mayestrukuna kikinkunapa muneyninkunamannow” yachatsikuyaptin (2 Timoteu 4:3, QKW).

Y reqenqëki religionkunachöqa, ¿ima alli o mana alli kanqantapis Biblia nenqannöku yachatsikuyan? O, ¿Biblia willakonqanta mana kaqpaqnö churëkurku nunakuna ‘wiyëyta munayanqanllata’ yachatsikuyan?

Huk religión allita ‘wayunqanta’ o mana allita wayunqantaqa reqintsik Biblia nenqanwan rurëninkunata igualatsirmi. Qateqninchömi mëqan alli religión kanqantapis yachakurinki.

TEMA: Majayoqkuna.

¿IMA NINTAQ BIBLIA? “Ama jucwan jucwan pununacuyanquitsu. Antis tsepa rantenqa majequicunata respetar llutanta mana rurashpa pellapaq cacuyanqui, porqui mana majäcushpa jucwan jucwan cacoqtaqa, y casadu quecar majanta racchataqtaqa Teyta Diosmi cuentata mañanqa.” (Hebreus 13:4.)

TAPUKÏ: ¿Civilpa manaraq casakur kakoqkunata rikaräkuyanllaku religionnikichö?

TEMA: Juezkunaman ëwëkur rakikëkuna.

¿IMA NINTAQ BIBLIA? Rakikëpaq, Jesusta huk kuti tapuyaptinmi kënö nerqan: “Pipis warmin juc ollquwan mana yachecaptin jaqirir, juc warmiwan casacorqa jutsamanmi ishquirin” (Mateo 19:9).

TAPUKÏ: Majan hukwan punukuptinraq juezkunaman ewëkur rakikäyänampaqmi Jesus yachatsikorqan, ¿tsëta wiyakuyanku religionnikichö?

 TEMA: Piwampis pununakïkuna.

¿IMA NINTAQ BIBLIA? “Tsemi amana warmipis ni ollqupis jucwan jucwan pununacur cacuyënatsu. Pipis juclaya jutsacunata rurarqa manam cuerpunta desunrantsu, peru jucwan jucwan pununacorqa, cuerpuntam pasepa desunrarin.” (1 Corintios 6:18.)

“Warmicunapis ollqullawan pununacuyänan quecaptinpis, warmi pura jucnin, jucnin pununacuyan. Tsenollam jina ollqucunapis warmillawan pununacuyänan quecaptin, limpu achachapäcur, penqaquipaq ollqu pura pununacur cacuyan. Tseno rurayanqanpitam Diosnintsic [...] castigueconqa.” (Romanos 1:26, 27.)

TAPUKÏ: ¿Mana casado këkar o ollqupura o warmipura pununakuyanqan Diospaq mana alli kanqanta religionnikichö yachatsikuyanku?

TEMA: ¿Imatataq religionnikichö rurayan Biblia nenqanta mana wiyakuyaptin?

¿IMA NINTAQ BIBLIA? “‘Tsay lluta jucnin jucninwan puricugcuna, gellayllapag ayrajagcuna, ïdolocunallata adoragcuna, llullacur cuentuta puritsigcuna, alläpa machashga purigcuna, engañacur suwacugcuna, “waugesïtu nogapis Dios Yayamanmi criyicü” niyäshuptiqui, [ama juntawacäyanquitsu].’ Tsaynö mana alli rurag runacunawanga ama ni micugllapis pagtaga jamayanquitsu.” (1 Corintios 5:11, NTCN.) Huk cristiano hutsata rurëkur mana wanakuptin, ¿imata rurayänampaqtaq Biblia, yachatsikun? “Jorquyey tsey mana alli ruraqta qamkunapita” ninmi (1 Corintios 5:13, QKW).

TAPUKÏ: ¿Biblia nenqannöku mana alli ruraqkunata religionnikipita horquriyan?

[5 kaq päginachö ninqan]

¿Mëqan religionchötaq Biblia yachatsikonqannölla imatapis rurayan?