¿Allillatsuraq llapan religionkuna kayan?

KANAN witsankunanöqa manam imëpis tsëtsika religionkuna kashqatsu. Qepallataraqmi musyatsikayämushqa chunka isqon (19) hatun religionkuna y chunka waranqa (10.000) taksha religionkuna kanqanta. Tsëtsika religión këkaptenqa, “¿manatsuraq ima religionchö këpis allilla kanman?”.

Ima religionchö këpis igual-lla kanqantam wakin nunakunaqa pensayan. “Llapan kallpayoq Dios hukllëlla këkaptenqa, llapan religionpis pëllatachi reqitsikun” niyanmi. Tukï religionkuna atska näni cuenta karpis, huk sitiollaman chätsikuyanqantam pensayan.

¿Huk Diosllatatsuraq llapan religionkuna reqitsikuyan?

Alläpa respetashqa maestro Jesus ima nenqantapis yarpärishun. “Kichki punkupa yeykuyey” nerqanmi qateqninkunata. Tsëpitanam kënö nerqan: “Anchum punku, i jayaqmi näni [ushakëman, NM] apaq, i atskaqmi kayan tseypa yeykoqkuna; kichkim punku, i llanum näni kaweyman apaq, i wallkallam kayan tareqkuna” (Mateo 7:13, 14, QKW).

¿Religionkuna “ushakëman” apakonqampaqtsuraq Jesus parlëkarqan? Diosman mana creeqkunapaq Jesus parlëkanqantam wakinkunaqa pensayan, tsëtaqa pensayan Diosman creikoqkunaqa ima religionchö karpis, kawëman chätsikoq nänillapa ëwayanqanta creirmi. ¿Rasumpatsuraq tsënö?

Jesus pipaq parlëkanqantaqa musyarintsik kënö nenqampitam: “Uli [llulla] profetakunapita kuydakuyey, qamkunaman shayämun üshakunapa bestidunwan, rurinpaqa kayan suwa löbukuna[nömi]” (Mateo 7:15, QKW). Tsëpitanam kënö nerqan: “Manam llapan Señor, Señor nimagcunatsu, Dios Yayapa Mandacuy Reynonman yaycuyanga, sinöga cieluchö caycag Dios Yaya munangannö cawagcunallam” (Mateo 7:21, NTCN). ‘Profëtatukuyanmi’ nerqanmi Jesusqa tsë hayaq nänipa ëwaqkunapaq, hina Cristupaq ‘Señornï’ niyanqantapis willakorqanmi,  tsëmi musyarintsik religioso nunakunapaq parlëkanqanta. Jesus willakonqanqa clärom këkan, manam llapan cristiänotukoqkunatsu ni llapan religionkunatsu Diosman chätsikun.

¿Llanu näni cuenta religionta tarishwantsuraq?

Rikanqantsiknöpis atska religionkunam kan, y manam llapantsu Diosman chätsikuyan, tsëqa, ¿musyashwantsuraq kawëman chätsikoq llanu näni cuenta kaq religión mëqan kanqantapis? Kë tapukïta contestarishun huk igualatsikïwan. Mana reqenqëki markachö oqrakashqa këkankiman, tsëna tapukurinkiman huk sitioman imanö chänëkipaqpis. Puntata tapukonqëki nuna nishunkiman itsoq lädopa ewanëkipaq, hukta tapukuptikina nishunkiman derecha kaq lädopa ewanëkipaq, más hukta tapukonqëkina, kikiki alli tanteëkur mëqampapis ëwë nishunkiman. Tsëqa mana tapukushqa cuentallachi këkankiman. Tsënö këkaptikina huk nuna mäpanta horqaramurnin mëpa ëwanëkipaqpis nirishunkiman y rikan rikan ëwanëkipaqpis mäpanta qoykushunkiman. Tsëqa, ¿manachi alläpa sasanatsu kanman chänëkipaq aw?

Rasumpa kaq Diosta mëqan religión reqitsikonqanta musyanapaqqa, huk mäpa cuenta yanapakoq librotam noqantsikpis wanantsik. ¿Tsëta tarishwantsuraq? Awmi, mäpa cuenta yanapakoq libroqa Bibliam. Musyanqantsiknöpis, “Teyta Diospa palabranqa quiquinpitam shamun, y allim yachatsicunantsicpaq, mana allita rurayaptin willapänantsicpaq, piñapänantsicpaq y allicunallatana ruranantsicpaqpis” (2 Timoteu 3:16).

Itsa qampapis kapushunki mäpa cuenta yanapakoq librïki, kananqa quechuachöpis Bibliakuna kannam. Kë revistata rurayämoq Jehoväpa testïgonkunaqa Traducción del Nuevo Mundo de las Santas Escrituras nishqan Bibliatam rurayan, tsëwanmi mëchö tsëchöpis yachatsikïkäyan. Y mana Testigo karqa, itsa wakin Bibliakunachöraq alli rikëta munanki mëqan religiontapis Dios chaskenqanta musyanëkipaq. Tsëmi, wakin religionkunachö alläpa respetashqa Bibliakunapita kë chuskun yachatsikïkunachö churayämushaq.

Kë revistata leirnin, yachanqëkikunatawan Biblia yachatsikonqanta igualatsinëkipaqmi niriyaq. Yarpë, Jesusqa kënömi nerqan: “Alli caq monteqa alli frutallatam wayun; peru mana alli caq monteqa mana alli frutatam wayun. Alli monteqa manam mana alli frutata wayunmantsu; ni mana alli monti alli frutata wayunmantsu” (Mateo 7:17, 18). ‘Alli caq monteta’ reqeq cuenta, Bibliachö rikärishun alli kaq religión imanö kanqantapis.

[3 kaq päginachö ninqan]

Alli kaq religionta tarinapaqmi Bibliaqa mäpa cuenta yanapamantsik