¿Imakunata qomänapaqtaq Dios awnimantsik?

¿SIRVEQNINKUNA tareq kayänampaq Jehová bendecinmantsuraq? Awmi, pero ¿imachö tareq kayänampaqraq bendecin? Jesuspa maman Marïata pasanqanmi tsëta musyaratsimantsik. Ángel Gabrielmi kënö nerqan: “Bendïta qam llapan warmikunachow”, y nïkurnam pëpita Diospa Tsurin yurinampaq kaqta willarqan (Lucas 1:28, 30-32, QKW). Tsëpis, pëqa manam imëkayoqtsu karqan. Tsëtaqa musyarintsik Jesus yurikurishqanllachö temploman ëwar, waktsakunapaq Ley mandakonqannö “ishque cullcuta o ishque llullu palumacunata” Diospaq apanqampitam (Lucas 2:24; Levítico 12:8).

¿Dios mana bendeciptintsuraq Marïaqa waktsa karqan? Manam. Diosqa bendecirqanmi, tsëtaqa musyarintsik Maria Elisabet-ta watukaq ëwaptin ‘espiritupa poderninwan fuertipa queno nenqampitam: —Waquin warmicunapitapis qamtam Dios bendisishorqonqui, y wawequipis benditum’ (Lucas 1:41, 42). ¡Jesuspa maman kënöqa manachi ni ima bendicionpis kanmantsu!

Jesuspis manam imëka hananchötsu kawarqan. Pëqa yurikorqan y winarqan waktsa familiallachömi, y poqurirpis tsënöllam kawarqan. Huk nuna qateqnin këta munaptinmi Jesus kënö nerqan: “Atoqcunapa machenin canmi. Pishqucunapapis qeshun canmi. Peru Diospita Shamushqa Nunapaqa manam ni iman cantsu jamarinanllapaqpis” (Lucas 9:57, 58). Rikanqantsiknöpis Jesusqa Patsachö kawarnin waktsallam karqan. Y ciëlochö llapanta haqirïkur shamonqampitam qateqninkuna tareq tikrayarqan. Apóstol Pablum kënö nerqan: “Wactsaman[mi] ticrarerqan, tsenopa noqantsic wactsa quecar ricu cuentana canantsicpaq” (2 Corintios 8:9). Pero ¿imachö tareq kayänampaqtaq Jesus yanaparqan qateqninkunata? ¿Y kanan cristiänokunaqa imachötaq tareq kayan?

¿Imakunachö tareq kanapaqtaq Dios awnikun?

Imëkayoq kaqkunapaqqa Diosta serviyänan sasaraqmi, kapoqyoq nunaqa Diosman markäkunampa o yärakunampa rantinmi qellëninllaman markäkun. Tsëmi huk kuti Jesus kënö nerqan: “¡Allapa sasam Diospa mandaquininman capoqyoq nunacuna yecuyänan!” (Marcos 10:23). Tsëmi, Jesus qateqninkunata tareq kayänampaq yanapanqanqa qellë cosastsu karqan.

Hinamampis, punta cristiänokunaqa casi llapanmi waktsa waktsalla kayarqan. ¿Yarpankiku yurikonqampita weqru nuna limosnata mañakuptin apóstol Pedru ima nenqantapis? Kënömi nerqan: “Qarayänaqpaqqa manam qellenïcuna ni imäcunapis cantsu. Peru Nazaretpita Jesucristupa poderninmi noqacho, tsetam qoshqequi. Tsemi pepa poderninwan  cachacätsishqequi. ¡Canan sharcur purï!” (Hechos 3:6).

Santiägupis punta congregacionchö waktsa waktsalla wawqikuna panikuna kayanqantam rikätsikorqan kënö nirnin: “Cuyashqa wauqicuna y panicuna, canan cäyiyämë: Wactsa nunacunatam Dios Yaya acrarqan llapan nunacunapita mas marcäcuyänanpaq. Tsemi pecunata Dios Yaya änishqa mandaquinincho erederuna cayänanpaq, peta cuyayanqanrecur” (Santiagu 2:5). Hina apóstol Pablupis punta congregacionchö kaqkuna ‘mana allapa yachaq, ni mandacoq, ni presisaq’ kayanqantam willakorqan (1 Corintios 1:26).

Qateqninkunata Jesus imëkayoq kayänampaq mana yanaparqa, ¿imakunachö tareq kayänampaqtaq yanaparqan? Huk kutim Esmirna congregacionta kënö nerqan: “Musyaycämi imaycachöpis ñacaycäyangayquita y muchuychö [waktsa] cayangayquita”. Tsëpitanam “imaycayognömi caycäyanqui” nerqan (Apocalipsis 2:8, 9, MTCS). Waktsa waktsalla karpis, tsë cristiänokunaqa qellëpita y öropitapis más väleq kaqtam tariyarqan, tsëqa karqan Diosman markäkuyanqan y pëllapaq kawakuyanqanmi. “Manam llapankunapatsu kreyikiynin” kan ninmi Bibliaqa, tsëmi huk nuna Diosman markäkonqanqa alläpa välin (2 Tesalonicenses 3:2, QKW). Diosman mana markäkoqkunaqa pëpaq waktsa cuentam kayan (Apocalipsis 3:17, 18).

¿Imachötaq tareq kayan Diosman markäkoqkunaqa?

¿Imanirtaq Diosman markäkï alläpa välin? Diosman markäkoqkunaqa pëpa “kuyakiyninta, pasensyanta i alli keyninta[m]” tariyan (Romanos 2:4, QKW).  Hina Jesus wanunqanman markäkorqa hutsankunapitam perdonta chaskiyan (Efesios 1:7). Y ‘Jesucristupa alli willaquininpita’ yachakushqa karmi allikunallata rurayan (Colosenses 3:16). Hinamampis, ‘Teyta Diosqa allapa espantepaq juclaya shonquta, y yarpetam qon’ pëman markäkur mañakoqkunataqa, tsënöpam yamë y kushishqa kawakuyan (Filipenses 4:7).

Pero Diospa bendicionninqa manam tsëllatsu. Teyta Diosman y Tsurin Jesucristuman markäkoqkunataqa Patsachö shumaq kawakïta qonampaqmi Dios nishqa. Tsëmi Jesucristupis kënö nerqan: “Que patsacho nunacunata allapa cuyarninmi, Dios jucllella tsurinta cachamorqan, peman marcäcoqcuna mana condenashqa cayänanpaq sinoqa wiñepa cawayänanpaq” (Juan 3:16). Teyta Diosta y Tsurinta alli reqirqa, shumaq kawakï chämunanta shuyarëkäshunmi. Kikin Jesusmi kënö nerqan: “Qamllam Dios canqui. Noqa Jesucristutam que patsaman cachamarqequi. Y ishcantsicta reqimarnintsicmi, nunacuna wiñe caweyoqna cayanqa” (Juan 17:3).

Diosta servinqantsik huk bendición karpis, alli saludyoq y kushi kushi kawakunapaqmi yanapamantsik. Tsënömi pasarqan Brasil nacionpita Dalídio shutiyoq nunawampis. Alläpa machakurlla purikurmi familianwampis yamënatsu kayarqan ni qellëtapis paqwë tarerqannatsu. Pero Jehoväpa testïgonkunawan Bibliapita yachakïta qallëkorqa hukläya nunanam tikrarerqan.

Bibliapita más yachakurmi mana alli rurëninkunata haqirerqan. Y llapan tiemponwan Diosta servir qallëkorqan. “Cantïnan cantïnan purikunäpa rantinmi, kananqa wayin wayin yachatsikurna purï” ninmi. Machar purikïta haqirenqampitam alläpaqa qeshyapäkunnatsu, ni qellëtapis lluta ushannatsu. “Manana macharmi kananqa tsë qellëwan wananqä kaqkunata rantï y wakinkunatapis yanapä” ninmi Dalídio. Kananqa Teyta Diosta kuyaqkunallam amïgonkunapis. Hina Teyta Diosta reqishqa karmi mana ni imëpis pensanqannö yamëna y kushishqana kawakun.

Teyta Diosman markäkoqkuna alli kawakuyanqantaqa manam Dalidiollatsu rikashqa. Renato pasanqanta rikärishun. Kushi kushillata rikarqa piraq creinman yurikushqalla këkar pasanqankunata. Tsëraq yurikushqallatam bolsaman winarkur parquechö banca hawanman churëkuyänaq. Tsëpa ishkaq warmikuna pasarëkarnash bolsa kuyoqta rikar, llullu mishitachi haqiriyashqa niyänaq, pero alleq rikëkurnash cuentata qokuriyänaq pupu watuyoqllaraq maqar y ashpir ushashqa llullu wambra kanqanta, tsënam hinan höra hospitalman apakuyarqan.

Huknin warmiqa Testïgom kanaq, pëmi tariyanqan wambrapaq Rita shutiyoq Testïgota willarinaq. Rïtaqa atska kutim llullunkunata oqrashqa karqan, y hukllëlla warmi wambran kaptinmi ollqu wambrata munarqan, tsënam Renätota wätakunampaq ëllukurkorqan.

Pishillaraq këkaptinmi Renätota Rita willarqan rasumpa mamänin huk kanqanta. Pero, mana maman karpis kuyarmi  wätarqan, y Teyta Diospitapis shumaqmi yachatserqan. Más winar winarnam Renätoqa Bibliapita más yachakïta munarqan y wanunan këkaptin salvayanqantapis alläpam agradecikorqan. “Teytä mamä haqirayämaptimpis, kikin Jehovämi ëllukarkamanqa” nir salmista nenqanta cada leiptinmi, nawinmampis weqin huntarin (Salmo 27:10).

Diosta alläpa agradecikurmi Renätoqa 2002 watachö Jehoväpa testïgon kanampaq bautizakorqan, tsëpita huk watatanam llapan tiemponwan Diosta servir qallarqan. Kananyaqmi musyantsu pï rasumpa teytan maman kanqanta, y manatsunchi paqwë musyanqanatsu. Tsënö karpis, kananqa ciëlochö Teytanta reqir y pëman markäkurmi hatun bendicionta chaskishqa.

Itsa qampis más alli kawakunëkipaq Diosta alli reqita munanki. Tsënö karqa yarpë, Jehová Dios y Tsurin Jesucristuqa munayanmi waktsapis rïcopis reqiyänanta. Itsa Diosta servinqëkipita imëkayoqqa tikrankitsu, tsënö karpis yamë y kushishqam kawakunki, tsëtaqa manam mëtsika qellëwampis tarinkimantsu. Proverbios 10:22 textochö “Jehoväpa bendicionninmi rïcoyätsikonqa, y pëpa bendicionninqa manam hipatsikuntsu [ñakatsikuntsu]” nenqan rasumpa kanqantam rikärinki.

Yarpë, pëman witeqkuna yamë kawayänantam Diosqa munan, tsëmi kënö nin: “¡Noqa nenqäta wiyakuptikeqa, yamë kënikipis mayu yakunöran kanqa y lamar yaku laqcheqyaqnöran kanqa justiciëkipis!” (Isaías 48:18). Alli kaqta ashir Diosman witeqkunaqa atska bendicionkunatam chaskiyanqa: “Humilde kë y Jehoväta mantsëqa, rico këman, honrashqa këman y kawëmanmi apakun” (Proverbios 22:4).

[5 kaq päginachö ninqan]

Diosman markäkoqqa: yamë, kushishqa y mana alläpa yarpachakurmi kawakun

[4 kaq päginachö dibüjukuna]

Jesuspa familian waktsalla karpis, atska bendiciontam Diospita chaskerqan