Leeqkuna tapukuyanqan

Jesuswan Teytan hukllëlla kayanqan, ¿ima ninantaq?

Juan 10:30 textochömi Jesus kënö nerqan: “Dios Yaya y noqa jucllellam cayä”. Pï më nunakunam kë textota leir Teytanwan Jesus huk Dioslla kayanqanta pensayan. Pero ¿tsëtatsuraq Jesus yachatsikïkarqan?

Qepa kaq versïculokunata rikärishun. 25 kaq versïculochömi Jesus nerqan Teytampa poderninwan milagrokunata ruranqanta. Hina, 27 al 29 versïculokunachönam ‘üshankunata’ rikänampaq Teytan nenqanta willakorqan, qateqninkunam Teytampa üshankunaqa kayarqan. Jesuswan Teytan huk Dioslla këkäyaptenqa kë parlanqankuna ardëllachi kanman. Këchö Jesus parlanqanqa këta nikaqnömi: “Teytäwanqa imëkachöpis huknöllam kayä, tsëmi pipis üsha suwëta puëdentsu, üshäta suwarqa Teytäpata apakoq cuentam kanman”. Más yachakurinapaq huk wambra teytampaq kënö nenqanman pensarishun: “Teytäta imatapis rurarqa, noqata rurëkämaq cuentam kanman”. Tsënö neqta wiyarqa, ¿kë wambrawan teytan huk nunallam kayan niyanmantsuraq? Manachi. Antis kë wambra nenqanqa rikätsikun teytanwan alläpa kuyanakuyanqantam, tsënöllam Jehoväwan Jesuspis kuyanakuyan.

Hina ishkampapis alli kaqta kuyayanqanchö y rurëta munayanqanchöqa igual-llam kayan. Jesusqa manam imëpis Satanasnö ni Adanwan Ëvanöqa Diospita rakikäkurïta munarqantsu. Antis kënömi nerqan: “Diospa Tsurin[qa] manam quiquin munashqantatsu ruran, sinoqa Papänin rurashqancunata ricanqantam ruran. Porqui Papänin llapan rurashqancunatam tsurinpis ruranqa” (Juan 5:19; 14:10; 17:8).

Jehoväwan Jesus huknölla kayaptimpis alli këninkunaqa kikinkunapitam yarqun. Jesuspaqa llakishqa kënin, kushishqa kënin y pensëninkunapis kikimpitam yarqun, y nunanöpis kawashqam, hina imata ruranampaqpis kikin akrakunmanmi. Tsënö karpis, Teytan munanqanta ruranampaqmi churakarqan, tsëmi kënö nerqan: “Noqa munashqänoqa ama callatsuntsu, sinoqa qam munashqequino quecullatsun” (Lucas 22:42). Jesus imata ruranampaq o mana ruranampaqpis kikin mana akrarqa, manachi kënö ninmantsu karqan. Hina ishkampis huk Dioslla këkarqa, ¿imanirtaq Jesus Diosman mañakorqan? ¿Y imanirtaq nerqan pë mana musyanqankunataqa Teytanlla musyanqanta? (Mateo 24:36.)

Tsë kastalla këkar wanutsinakoq dioskunatam atska religionkunachö adorayan. Griegokunapa diosninkunapaqmi kënö cuentakuyan, Cronos nishqan dios-shi tsurinkunata mikukurkunaq y teytan Urano diostapis wanutsinaqshi. Tsë dioskunapitaqa, ¡Jehoväwan tsurenqa alläpa hukläyam rikänakuyan! Pëkunaqa rasumpam kuyanakuyan y imëkachöpis acuerdom kayan. ¿Manaku këkunata musyanqantsikqa pëkunata más kuyatsimantsik? Noqantsikpis pëkunawan kuyanakushwanmi, tsëtam Jesuspis qateqninkunapaq kënö mañakorqan: “Papällä, pecuna jucnolla cayätsun, noqawan qam jucnolla canqantsicno. Tsenolla pecunapis noqantsicwan jucnolla cayätsun” (Juan 17:20, 21). ¡Imanö kushikïpaqmi Teyta Dioswan y Tsurinwan hukllëllanö këqa!

Rikanqantsiknöpis, Teytanwan hukllëlla kayanqanta Jesus nerqa, manam ishkankuna huk Dioslla kayanqantatsu parlëkarqan. Antis Teytanwan alläpa kuyanakuyanqantam rikätsikïkarqan, y pëkuna kuyanakuyanqannöqa manam pipis kuyanakuntsu.