¿Kushishqatsuraq kawakushwan atska qellëyoq karqa?

ESPAÑA nacionchö yurikushqa Sonia shutiyoq warmim, wambra kanqampita Testïgokunapa reunionninman mamäninwan ëwaq. Shipashyärirnam Londres markapa ëwakorqan, tsëchömi rïcokunapa qellëninkunata negociar trabajarqan.

Soniaqa atska qellëtam ganarqan y alläpam kuyaq trabäjonta. Hinamampis, nunakunapa atska qellëninta manejarmi trabäjonchö kushishqa kakoq. Llapan hunaqkunam 18 höranö trabajaq, y wakin paqaskunaqa ishkë o kima hörallam punureqpis. Pëqa trabäjontam imëkapitapis puntaman churaq. Pero illaqpitam llapan ushakärerqan. Itsa alläpa trabajaptinchi, 30 watayoq këkaptin derrame cerebral qoykorqan.

Tsënöpam pullan kaq cuerpon wanukärerqan y parlëtapis puëderqannatsu. Hinan höram mamänin wambranta rikaq ëwakorqan Londrespa. Sonia purir qallariptinnam mamänin kënö nerqan: “Reunionnïmanmi ëwanä. Hapallëkillataqa manachi haqireqmantsu, ishkantsikmi ëwanantsik”. Tsënam Soniaqa yanaqänampaq awnirerqan. ¿Imanötaq reunionchö karerqan?

Kënömi nin: “Tsëchöqa rasun kaqllatam yachatsikayämorqan y llapan wiyakonqäpis shumaqmi karqan. Llapanmi kuyakur chaskiyämarqan, y tsëllanam Bibliapita yachakunäpaq awnikurerqä. Espantakorqämi tsëraq reqikäyämarpis shumaq chaskirayämanqanta. ¡Mana watukakoq amïgökunapitaqa hukläyam kayarqan!”.

Sonia manana kachakänampaq doctorkuna nikäyaptimpis, ichikllapa ichikllapam yapë parlar qallëkorqan. Y Bibliapita yachakur qallanqampita manaraqpis watatsarmi bautizakunampaq churakarqan. Testigo amïgonkuna kushishqa llapan tiemponwan Diospita yachatsikuyanqanta rikarmi, kënö nin: “Noqapis pëkunanö kushishqa kanärëkurmi, llapan kallpawan Diosta alli servita munarqä.” Kananqa llapan tiemponwanmi nunakunata yachatsir Sonia purin.

¿Imatataq Sonia yachakushqa? “Atska qellëta ganarpis manam kushishqatsu karqä, trabäjö sasa kaptinmi alläpa yarpachakur utishqalla kakoq kä. Kananqa yachakurerqönam Teyta Jehoväta servir-raq pipis kushishqa kawakonqanta.”

Huk cartanchömi apóstol Pablu kënö nir atikakorqan: “Allapa qelle cuyepitam llapan mana alli rurecuna yurin. Y waquin nunacunam qellepaq codisiosu car, marcäquinincunapita waqtsacäcuriyashqa. Tsenopam quiquincunatä llutepa sufrimientuncuna ashiyashqa” (1 Timoteu 6:10). Soniata pasanqanmi rikätsikun kë texto nenqan rasumpa kanqanta.