¿Waktsa këqa Diospa castïgontsuraq?

“MANAM pipis qamchö waktsayänantsu” nerqanmi Jehová Dios Israel nacionta. Huk israelita paqwë waktsa mana tikrananrëkur, y haqa këninta pagakunan alläpa sasa mana kananrëkurpis, Leykunata Dios churarqanmi (Deuteronomio 15:1-4, 7-10). Tsë Leykunata wiyakurnenqa Jehoväpa bendicionnintam chaskiyänan karqan, y pipis manam waktsayänantsu karqan. Pero israelïtakunaqa manam wiyakuyarqantsu, tsënöpam atskaq waktsayäyarqan.

Dios mana bendeciptin nunakuna waktsa kayanqantatsu manam këchöqa yachakuntsik. Hina pëpaq kaqkunataqa manam imëkayoq kayänampaqtsu Dios bendecin. Unë tiempochöpis atskaq Diosta sirveqkunam waktsa waktsalla kayarqan. Profeta Amosmi üsha mitsipakur, y higos poqunampaq tuksipakurlla trabajarqan (Amós 1:1; 7:14). Profeta Eliasnam Israel nacionchö mallaqë witsan kawarqan, y waktsa viudapa harinan y aceiten mana ushakänampaq Dios bendeciptinmi, mallaqëwan wanorqantsu. Servikäyaptimpis Diosqa manam pëkunata rïcoyätsirqantsu, pero wanayanqan kaqtaqa qorqanmi (1 Reyes 17:8-16).

Mana musyanqan hörachömi pipis waktsayärinman. Itsa desgracia pasëkuptin o qeshya tsarïkuptin huk tiempo trabajëta puëdenmannatsu o paqwë trabajanmannatsu. Huk familiachö teyta kaq wanukïkuptimpis itsa qellëta tariyänan sasaraq kanman. Pero Dios castiganqantatsu manam tsëqa rikätsikun. Rutwan Noemí pasayanqanman yarpëmi shonquntsikta kushiratsin, tsëchömi rikantsik waktsakunapaq Jehová yarparanqanta. Nunankuna wanukïkuptinmi kë ishkan warmikuna paqwë waktsa quedariyarqan. Pero Diosqa bendicerqanmi y llapan wanayanqantapis qorqanmi (Rut 1:1-6; 2:2-12; 4:13-17).

Rikanqantsiknöpis, manam Diospa castïgonwantsu nunakunaqa waktsa kayan. Diosta imëpis sirveqkunaqa rikäyanqam rey David kënö nenqan cumplikaqta: “Jövenmi karqä, kananqa awkinyärerqönam, pero manam ni imëpis alli nuna ankupëpaq [llakipëpaq] pureqta, ni tsurinkuna tantata mañakur pureqtapis rikarqötsu” (Salmo 37:25).

[8 kaq päginachö dibüju]

Noemïwan Rut waktsa kayaptimpis Diosqa bendicerqan y wanayanqantam qorqan