¿Imanirtaq hukta hukta parlayan santo espïritupaq?

¿IMATAQ santo espíritu? Casi llapan nunakunam ima kanqantapis musyayantsu. Australia nacionchö atskaq ëllukashqa nunakunatam kikin Benedicto XVI päpapis kënö nerqan: “[Santo espíritu] ima kanqantapis alli musyanantsikqa alläpa ajam [sasam]”.

Wakin nunakunaqa santo espïritupaq hukta huktam parlayan, y wakinkunanam ima kanqantapis musyayanllatsu. Rikärishun ima niyanqantapis:

• Santo espïrituqa Cristupa sirveqninkunapa rurinchö kawaqmi.

• Patsachö këkaq Diosmi.

• Trinidadchö kima kaq Diosmi.

¿Imanirtaq hukta hukta parlayan santo espïritupaq? Religioso nunakuna 300 watapita qallëkur santo espíritu huk Dios kanqanta yachatsikushqa kayaptinmi. Pero manam ni Biblia, ni punta cristiänokunapis tsënötsu yachatsikuyarqan. Respetashqa católico librom kënö nin: “Santo Espíritu kawaq kanqantatsu manam A[ntiguo] T[estamentochö] rikätsikun”, antis “imëkata ruranampaq Yahvëhpa kallpan” kanqantam. Y “M[ushoq] T[estamentochöqa] casi llapan textokunachömi santo espïritupaq parlarqa, cösaspaqnö parlan y manam imapis kawaqpaqnötsu” ninmi. Hinamampis “Santo Espíritu” nir o “kallpa” nirpis tsëllapaq parlëkanqantam rikätsikun (Diccionario de la Biblia, edición preparada por Serafín de Ausejo).

¿Wakinkunaqa ima niyantaq santo espïritupaq? Kallpalla këkarqa manachi kawanmantsu niyanmi. Estados Unïdoschö santo espíritu ima kanqantapis nunakunata tapuyaptinmi, casi llapankuna creiyantsu espíritu Diosnö o Cristunö kawaq kanqanta. Pero wakin religiösokunanam, “Santo Espïrituqa Teytanö y Tsurinö kawaqmi” niyan. ¿Imanöraq musyashwan pï rasun kaqta nenqantapis?

Rasumpa kaqtaqa Bibliallam willakun. Apóstol Pablu nenqannöpis: “Teyta Diospa palabranqa quiquinpitam shamun, y allim yachatsicunantsicpaq, mana allita rurayaptin willapänantsicpaq” (2 Timoteu 3:16).

¿Imapaqtaq santo espíritu ima kanqantapis musyanantsik? Diosnintsik yanapamänapaq tsë espïrituta mañakunantsik kaptinmi. ¿Manaku höraqa imëkata pasar alli tsarakunapaq kallpata wanantsik? Qateqninkunata Jesus kënö nenqantam tsëqa yarpänantsik: “¡Imatapis mañacuyaptiqueqa, Dios qoyäshunquim! [...] Si qamcuna mana alli ruraq quecarpis tsuriquicunata allicunata qoyanqui, sielucho quecaq Dios  Yayanäqa mas alli carmi, mañacoqcunataqa Santu Espiritunta qoyconqa” (Lucas 11:9, 13).

Qateqninchönam yachakurishun santo espíritu ima kanqanta y imanö yanapamanqantsiktapis.

[3 kaq päginachö ninqan]

Bibliaqa willakunmi santo espíritu ima kanqantapis