Ama Jehoväpa santo espïritunta llakitsishuntsu

“Ama Teyta Diospa Espiritunta llaquitsiyëtsu [...]. Tse Santu Espiritutam Teyta Diosnintsic shonqiquicunaman churamushqa pepana cayan[ëkipaq] señalayäshurniqui.” (EFE. 4:30.)

1. ¿Imanö këmantaq atska millón nunakuna chäyashqa y imatataq rurayänan?

KË MANA alli mundochö kawëkarninmpis, atska millón nunakunam Jesuspa yanapakïninwan Jehoväta reqishqantsik (Juan 6:44). Tsëpaqqa Diosnintsikta servinapaqmi awninqantsiktam cada hunaq cumplinantsik. Tsëta rurarqa santo espíritu pushamänatam haqinantsik, shutinchö bautizakushqa karnin (Mat. 28:19).

2. ¿Ima tapukïkunapa respuestantaq yachakushun?

² ‘Santu espiritupa muneninmanno cawacorqa’, rakcha röpata qotukurir mushoqtana yakakuyë nishpa Biblia mandamanqantsiktam  wiyakïkantsik (Gal. 6:8; Efe. 4:17-24). Pero apóstol Pablu maskunata consejamanqantsiktapis wiyakunantsikmi, tsë mandakunqanchömi Diospa espïritunta llakitsiyëtsu nishqan consëjopis këkan (lei Efesios 4:25-32). Kë leinqantsikta maslla yachakurishun. ¿Imapaqtaq Pablu parlëkan ‘Diospa espiritunta llaquitsiyëtsu’ nirqa? ¿Imanötaq Diospa sirveqnin espïrituta llakitsinman? ¿Imatataq rurashwantsu mana llakitsinapaq?

¿Imapaqtaq Pablu parlëkarqan?

3. ¿Imanötaq yachatsikunkiman Efesios 4:30 ninqanta?

³ Efesios 4:30 ninqanta yachakur qallëkushun. Kënömi nin: “Ama Teyta Diospa Espiritunta llaquitsiyëtsu mana allita rurar cawacurnin. Tse Santu Espiritutam Teyta Diosnintsic shonqiquicunaman churamushqa pepana cayanqequita señalayäshurniqui, asta salbacuyanqequi junaqyaq”. Apóstol Pabluqa cristiano mayinkunatam consejëkarqan Dioswan alli këninkunata mana oqrayänampaq. Yarpätsirqanmi, salvakushqa kayänampaq santo espïrituwan señalashqa kayanqanta. Tsë espïritum o kallpam imëka sëllonö karqan —kanampis tsënöllam këkan—. Y ciëlopaq akrashqakunatam, imëka ropa rikakoqnö, shamoq tiempochö imanö kayänantapis rikätsin (2 Cor. 1:22). Tsë señalmi Diospana y ciëlopaq akrashqa kayanqanta rikätsikun. Kë señalashqakunaqa llapan kayan 144.000 nunakunam (Apo. 7:2-4).

4. ¿Imanirtaq santo espïrituta llakitsïpita cuidakunantsik?

⁴ Santo espïrituta llakitsirqa chipyëpam oqrarishwan y mananam yanapamashwannatsu. Rasumpam oqrarishwan, tsënö kanqantam rikätsikun David Bat-sebawan hutsata rurarir qellqanqan. Pasëpam Jehoväta rogarqan kënö nir: “Rikënikipita ama qarqarallämëtsu; y santo espïritïkita ama qochïkallämëtsu [gechuykallämaytsu]” (Sal. 51:11). Ciëlopaq akrashqakunaqa, ‘wanuyanqanyaqmi tsaracuyanan’ mana ushakaq ‘wiñe cawe premionkuna’ chaskiyänampaq (Apo. 2:10; 1 Cor. 15:53). Kë patsachö kawaqpaq kaq cristiänokunapis mana wanushpa kawëta chaskiyänampaqqa, Jesus wanunqanmanmi alli markäkuyänan y Diosnintsiktam mana haqishpa serviyänan. Tsëpaqqa santo espïritupa yanapakïnintam wanayan (Juan 3:36; Rom. 5:8; 6:23, QKW). Rikanqantsiknömi, llapantsik cuidakunantsik Jehoväpa santo espïritunta mana llakitsinapaq.

¿Imanötaq santo espïrituta llakitsishwan?

5, 6. ¿Imanötaq huk cristiano llakitsinman Jehoväpa espïritunta?

⁵ ¿Imatataq ruranantsik santo espïrituta mana llakitsinapaq? ‘Muneninta rurarmi’ kawakunantsik, tsënöpam mana alli munënintsikkunata rurashuntsu ni mana alliqa portakushunnatsu (Gal. 5:16, 25, 26). Pero Biblia ninqankunata mana wiyakur ichikllapa ichikllapa mana allita rurashqaqa rasllam mana allikunaman chäkurishwan y santo espïritutam llakiratsishwan.

⁶ Jehoväpitam santo espïrituqa shamun, tsëmi pushamänata mana haqirqa, kikin Jehovätapis llakitsishun. ¿Imanötaq portakushwan santo espïrituta mana llakitsinapaq? Efesios 4:25-32 textota yachakunqantsikmi yanapamäshun tsëta musyanapaq.

Imatataq rurashwan mana llakitsinapaq

7, 8. ¿Imanirtaq imëpis rasun kaqllata parlakushwan?

⁷ Rasun kaqllata imëpis parlashun. Efesios 4:25 textochömi Pablu kënö qellqarqan: “Tsemi nuna mayintsiccunata mana ulipashpa rasonpa caqllata willapashwan; porqui noqantsicqa juc castanollanam cantsic”. Llapantsikpis “juc castanollana” karmi ni imanöpapis, wakinkunata mana allita yarpätsirninqa kikintsikpa munënintsikllataqa ruranantsiktsu, tsëqa ulikïmi o llullakuymi. Pipis tsëta rurëta mana haqirqa Diosnintsikwan alli kënintam oqrarinqa (lei Proverbios 3:32 *).

 ⁸ Ichik ichik ulikur o llullakur parlanqantsikkuna y ruranqantsikkunaqa congregacionchö alli kawakunatam ushakätsin. Tsëmi, Daniel markäkïchö o yärakuychö alli nuna kanqanta qatishwan (Dan. 6:4). Yarpashqaqa, ciëlopaq akrashqa cristiänokunatam Pablu nirqan, “Kristupa kwerpun” kar llapampis rasun kaqta parlakur junto kawakuyänanta (Efe. 4:11, 12, QKW). Kë patsachö kawakïta shuyaraq cristiänokunapis, rasun kaqllata parlakurninmi yanapakunantsik Diosnintsikpa markan shumaq yanapanakur huknölla kawakunapaq.

9. ¿Imanirtaq alläpa preciso Efesios 4:26, 27 ninqan consëjota wiyakunantsik?

⁹ Ama Diablu intumänata ni Diosnintsikwan alli kënintsikta oqratsimänata permitishuntsu (Sant. 4:7). Santo espïritum yanapamantsik Diablupa munëninman mana ishkinapaq. Diablutaqa permitintsiktsu ima problëmapis kaptin pasëpa mana piñakurninmi. Pablum qellqarqan: “Piñacurpis, ama jutsa ruremanqa ishquiyëtsu. Ama inti jeqanqanyaqqa piñashqallaqa cacuyëtsu. Ama diablupa muneninta rurayëtsu” (Efe. 4:26, 27). Rasun kaqchö piñakurnimpis, shonqullantsikchömi Diosnintsikman mañakurinantsik. Tsëmi yanapamäshun tranquilolla kanapaq y pasëpa piñakurirnimpis mana allikunata rurarir espïrituta mana llakitsinapaq (Pro. 17:27). Manam pasëpa piñashqallaqa kakunantsiktsu, Satanasmi yanaparamashwan hutsata rurarinapaq (Sal. 37:8, 9). Hinamampis Diablupa trampanmanqa ishkishuntsu, piwampis piñatsinakushqa kar raslla altsarninmi, tsëta ruranapaqmi Jesus consejakurqan (Mat. 5:23, 24; 18:15-17).

10, 11. ¿Imanirtaq suwakushwantsu y mana alliqa portakushwantsu?

¹⁰ Ama suwakushuntsu, ni mana alliqa portakushuntsu. Pablum qellqarqan: “Pipis suwa cashqa carqa, amana suwacutsunnatsu; antis imallachopis shumaq uryapucurna catsun, tsenopa pishipaqcunata imallawanpis yanaparcunanpaq” (Efe. 4:28). Huk cristiano suwakurqa Jehoväpa shutintam mana alliman churëkan (Pro. 30:7-9). Tsëmi pishipakurnin ni waktsa karnimpis suwakushwantsu. Diosta y nuna mayinta kuyaq kaqqa alleqmi musyan suwakï mana alli kanqanta (Mar. 12:28-31).

¹¹ Apóstol Pabluqa manam, mana ruranapaq kaqllatatsu nimantsik, sinöqa ruranapaq kaqtawanmi. Santo espíritu munanqannö kawakurninqa, allim trabajashun familiantsikta manteninapaq y pishipakoq kaqkunatapis qarëkunapaq (1 Tim. 5:8). Manam Judas Iscariotenöqa kashwantsu, peqä waktsakunata yanapayänampaq Jesuswan apostolninkuna qellë qorikuyanqantam suwar ushaq (Juan 12:4-6). Këchöqa clärom rikakun, kë traicionero nunaqa santo espíritu munanqannö mana kawanqanta. Pero santo espïrituta qateq kaqkunaqa Pablu ruranqannömi  imë hörapis shumaq portakuntsik (Heb. 13:18). Tsëta rurarmi santo espïrituta llakitsishuntsu.

¿Ima mastataq ruranantsik santo espïritutamana llakitsinapaq?

12, 13. a) Efesios 4:29 ninqannö, ¿imanö parlakïkunatataq melanänantsiktsu? b) ¿Imanötaq parlakïnintsik kanan?

¹² Alli tanteakur parlashun. Pablum nirqan: “Ama mana alli palabracunataqa parlayëtsu; antis parlayë combieneqllata. Tsenopam yachacuyanqui alli cawaquita; y wiyayäshoqniquicunatapis bienincunapaqmi yanapecuyanqui” (Efe. 4:29). Yapëmi Apostolqa nimantsik mana ruranapaq kaqta y ruranampaq kaqtapis. Santo espíritu yanapëkamashqaqa parlakunantsik wiyamaqnintsikkunata yanapanampaqmi. Y manam shimintsikpitaqa yarqunantsu mana alli palabrakuna. Mana alli palabrakuna nirqa, griego idiömachö rikätsikun ismur ushakëkaq frütapaqnö, ëtsapaqnö o pescädopaqnömi. Imanömi tsë ismushqa asyaptin melanantsik tsënömi melanänantsik Jehová chikinqan mana alli parlakïkunata.

¹³ Imëpis parlakushun kuyakïwan y respëtowan. Parlakïnintsikqa ‘kachitashqanömi’ yachanëpaq kanan (Col. 3:8-10; 4:6). Imanöpis parlakunqantsikta nunakuna wiyaramarnintsikqa hukläya kanqantsiktam raslla tanteariyänan. Y “combieneqllata” parlakurninmi wiyamaqnintsikkunata yanapashun. Salmista ninqannö noqantsikpis nishun: “Oh Jehová, Qaqä y Rantimaqnï, shimï parlanqan y shonqu yarparanqan puntëkichö shumaq këkutsun” (Sal. 19:14).

14. Efesios 4:31 ninqannö, ¿imakunatataq pasëpa haqinantsik?

¹⁴ Chipyëpa haqirishun piñakïta, qayapäkïta, y wakin mana alli rurëkunatapis. Diospa Santo espïritunta mana llakitsiyänampaq cristiano mayinkunata consejarirmi Pablu qellqarqan: “Mana piñacushpa, mana waputupanacushpa, mana coleracushpa, mana qayapanacushpa, wasata mana rimanacushpa y mana lluta tratanacushpa cawacuye” (Efe. 4:30, 31). Hutsa ruraq karmi, alli sinchikunantsik piñakurnin yarpënintsikta tsaränapaq y raslla imatapis mana rurarinapaq. Pasëpa cölerakur y piñakurqa santo espïritutam llakitsishun. Tsënöllam pasanman piwampis piñashqalla kakushqa, mana allita ruramanqantsikta yarparäkushqa, y amishtëta mana munashqapis. Bibliapa consëjokunata mana wiyakïta yachakärirqa mana alli tikrakurirmi santo espïrituta llakitsishun, tsëqa pasëpa mana allimanmi chäkurishun.

15. ¿Imataq rurashwan pipis ofenderamashqa?

¹⁵ Kuyakoq, llakipäkoq y perdonakoq kashun. Pablum nirqan: “Juctapis juctapis cuyayë, ancupäyë; y Jesucristurecur Teyta Dios jutsantsiccunata perdonamashqantsicnolla qamcunapis jucniqui jucniquicuna perdonanaquicuyë” (Efe. 4:32). Y pasëpa ofenderamashqapis, Diosnintsik perdonamanqantsiknöllam perdonëkunantsik (Luc. 11:4). Këman yarpärishun, huk cristiano mayiki qampita mana allita parlarishqa kanman. Y qamna tsëta altsëta munarnin parlapärinkiman, y pëna parlanqampita  pasëpa pësakur perdonta mañarishunkiman. ¿Perdonankimanllatsuraq? Manam, mastaran ruranëki. Levítico 19:18 textom nin: “Manam vengakunëkitsu ni chikipänëkitsu markamayikikunata; kikikitanömi nuna mayikita kuyanëki. Noqam Jehová kä”.

Alli cuidakushun

16. Willakaramï santo espïrituta llakitsita mana munar imakuna ruranan alläpa preciso kanqantapis.

¹⁶ Hina hapallantsiklla këkarpis mana alli rurëmanqa ishkirishwanmi. Mana alli müsicata wiyëllapaq yarpärishun. Itsa huk cristiano tsë mana alli costumbreyoq kanman. Tsënö këkaptin conciencian acusar qallëkunman, Bibliata y ‘mäcoq, mäcoq, cumplidu sirweq’ ninqan consëjokunata mana wiyakushqa kaptin (Mat. 24:45). Y tsëpitana Diosnintsikman mañakur qallëkunman y yarpärinman Efesios 4:30 ninqanta. Y santo espïrituta llakitsita mana munarninna, churapakarinman tsënö müsicakunata manana wiyanampaq. Tsënö ruranqampitaqa kë cristiänota Jehová bendecinqam. Tsënömi noqantsikpis alli cuidakunantsik Diosnintsikpa espïritunta mana llakitsinapaq.

17. ¿Imataq pasamashwan mana cuidakushqa y Diosnintsikman mañakïta haqirishqaqa?

¹⁷ Alli mana cuidakur y Diosnintsikman mañakïta haqirirqa, mana alli rurëkunamanmi ishkirishwan y santo espïritutam llakitsishwan. Diosnintsikqa santo espïritunta qomantsik imanöpis kikin yarpanqannö o rikanqannö kawashqaraqmi, tsëmi mana allikunata rurarqa llakiratsishwan, tsëtaqa manam rurëta munantsiktsu (Efe. 4:30). Jesus milagrota ruraptinmi mana allichö horqëta munar judïokuna niyarqan: “Que nunaqa supëcunapa mandacoqnin Beelzebupa [Satanaspa] poderninwanmi nunacunapita supëcunata qarqun” (lei Marcos 3:22-30). Tsënö nirqa ‘santu espiritupa contranmi’ parlëkäyarqan. ¡Noqantsikqa ama imëpis tsënöqa rurashuntsu!

18. ¿Imanötaq musyashwan mana perdonamänapaq hutsata mana ruranqantsikta?

¹⁸ Mana perdonamänapaq hutsataqa manam rurëta munantsiktsu, tsëmi imëpis yarparänantsik santo espïrituta mana llakitsinapaq Pablu consejakunqannö. Pero ¿alläpa hutsata rurashqana karqa? ¿Arrepentikurqontsiknaku, anciänokunapa yanapakïninta ashirquntsiknaku? Tsëkunata ruranqantsikmi rikätsikun santo espïritupa contran mana hutsallakunqantsikta. Y mana alli kaqta manana ruranapaq Jehová yanapamänamanmi markäkushun o yärakushun.

19, 20. ¿Imakunatataq rurashwantsu? b) ¿Imaman mana ishkinapaqtaq churapakashwan?

¹⁹ Kallpanwanmi Diosnintsikqa yanapamantsik kuyakoq kanapaq, y markanwan junto kushishqa kanapaq (Sal. 133:1-3). Tsëmi cuentota puritsirnin ni Jehová markanta diriginampaq churanqan cristiänokunapaq mana allita parlarninqa santo espïrituta llakitsinantsiktsu (Hech. 20:28; Jud. 8). Tsëpa rantinqa congregacionchö unido kanapaq y respeto kanampaqmi yanapakushwan. Manam grupon grupon rakikëqa allitsu kanman. Apóstol Pablum kënö qellqarqan: “Teyta Jesucristupa jutincho[mi] mañecuyaq mana raquicar ushashqa cayänequipaq; antis tsepa rantin[qa] shumaq juc yarpellana y juc shonqunolla cayänequipaq” (1 Cor. 1:10).

²⁰ Santo espïritunta mana llakitsinapaqqa Jehová puëdenmi y munanmi yanapamënintsikta. Y noqantsikqa allim churapakänantsik tsë hutsaman mana ishkinapaq. Tsëman yarparar, santo espïritun mañakïta ama haqishuntsu y “santu espiritupa muneninmanno” kawakushun, tsëta rurarmi kanan y imëpis pushamänantsikta haqikäshun.

[Päginapa ura kuchunchö willakï]

¿Yarpankiku?

• ¿Ima ninantaq santo espïrituta llakitsi?

• ¿Imanötaq huk cristiano santo espïrituta llakitsinman?

• ¿Imatataq rurashwan santo espïrituta mana llakitsinapaq?

[Yachakunapaq kaqpa tapukïninkuna]

[28 kaq päginachö dibüju]

Piwampis piñatsinakushqa karqa raslla altsarishun

[29 kaq päginachö dibüju]

Parlakïniki, ¿mëqan frutawantaq igualan?