¿Pï kanqantataq Jesus musyatsikurqan?

“Jesusqa allim musyarqan pï kanqanta, mëpita shamunqanta, imaq shamunqanta y kë Patsachö imata pasanampaq kaqtapis.” (HERBERT LOCKYER, QELLQAQ.)

JESUSMAN y yachatsikïninkunaman markakunapaq o yärakunapäga alliran pëta reqinantsik. Pï kanqanta, mëpita shamunqanta y imaq shamunqantam musyanantsik. Mateo, Marcos, Lucas y Juan librokunachömi kë tapukïkunapa respuestanta tarintsik, hinamampis kikin Jesus yachatsikunqanmi tsëchö këkan.

Pëqa kawarqannam manaraq kë Patsachö yurirnin. Huk kutim Jesus kënö nirqan: “Noqaqa Abrahampis manaraq captinmi quecarqäna” (Juan 8:58). Pero Abrahan ishkë waranqa wata wanukushqanchöna yurikarninqa, ¿imanötaq Abrahan manaraq yuriptin kawanman karqan? Kikin ninqannöpis, “cielupita shamush[ga]” karmi (Juan 6:38, NTCN).

Diospa Tsurin. Diospa tsurin angelkuna atskaq kayaptimpis, Jesusqa pëkunapita hukläyam. Tsëmi “Diospa jucllella tsurin” kanqanta nirqan (Juan 3:18). Kikin Dios rurashqa kaptinmi pëqa hukllëlla Tsurin. Tsëpita kaqtaqa Jesuswanmi kamarqan (Colosenses 1:16).

‘Nunapa Tsurin.’ Tsënömi imëpis neq kikimpaq parlar (Mateo 8:20, QKW). Tsënö nirmi rasumpa nuna kanqanta rikätsikurqan, pëqa manam angelpita ni Diospita nunaman tikrashqatsu karqan. Santo espïritunwanmi Dios rurarqan Tsurin Jesus Maria shutishqa virgenpa pachampita yurinampaq. Tsënöpam ciëlochö kawanqampita huk nunanö Patsachö yurirqan, y hutsannaqmi karqan (Mateo 1:18; Lucas 1:35; Juan 8:46).

Dios awnikunqan Mesias. Huk samaritana warmi “noqa musyämi que patsaman Mesias shamunanta” niptinmi Jesus kënö nirqan: “Noqam cä, canan qamwan parlecaq” (Juan 4:25, 26). Mesías y Cristu palabrakunaqa ishkampis “akrashqa” ninanmi. Tsëmi rikätsimantsik Dios awnikunqanta cumplinampaq Jesus akrashqa kanqanta.

Más precisaq rurënin. Tsëtaqa kikinmi kënö willakurqan: “Jinantin marcacunachomi alli willaquita yachatsicunä presisan. Que patsamanmi Dios cachamashqa [...] willacunäpaq” (Lucas 4:43). Imëka allikunatam pëqa rurarqan, pero imëkapitapis masqa precisatsirqan Diospa Gobiernompita yachatsikïtam. Qateqninkunachömi rikärishun tsë gobiernompita yachatsikunqankunata.

Këyaq yachakunqantsikkunam rikätsikun Jesus mana lluta nuna kanqanta. * Tsëpitanam rikärishun ciëlochö tärashqa kaptin yachatsikïnin alläpa väleq kanqanta. Tsënöpam yachatsikïnin tukïläya nunakunapa shonqunkunayaq paqwë charqan.

[Päginapa ura kuchunchö willakï]