¿Imanötaq Jehoväpa alli këninta Jesus musyatsikurqan?

“Diosmi allitanona ricamänantsicpaq permiterqon Jesucristu [...] wanur yawarninta ramananpaq. Y marcäquinintsicrecurllana, salbamarnintsicmi alli queninta ricatsicun.” (ROM. 3:25.)

1, 2. a) ¿Nunakuna imanö kayanqantataq Biblia willamantsik? b) ¿Ima tapukïkunapa respuestantataq këchö yachakushun?

EDÉN huertachö Jehoväpa contran churakäyanqantaqa llapantsikmi musyantsik. Adan mana wiyakunqampitam kananyaq hipantsik. Këpaq parlarmi Biblia kënö nin: “Adanmi jutsata rurecorqan, y tsenopam jutsa rure qallecorqan. Tserecurmi wani shamorqan. Tsemi que munducho llapan nunacuna jutsata rurarnin, wanuyan” (Rom. 5:12). Allillata rurëta munarpis mana allitaqa rurarintsikmi, tsëmi Diosnintsikta perdonta mañanantsik. Tsëchi apóstol Pablupis kënö nirqan: “Allita rureta munanqäcunataqa manam rurätsu. Antis mana munecarpis, mana allicunatam siempri rurarï. [...] ¡Ay, noqalla! ¿Imanoraq calläshaq!” (Rom. 7:19, 24).

² Tsënö llapan nunakunapis hutsasapa kaptinmi, këkunata tapukuntsik: ¿imanöpataq Nazaret markapita Jesus hutsannaq yurirqan? ¿Imanirtaq bautizakurqan? ¿Imanötaq rikätsikurqan kawëninchö Jehoväpa alli këninta? Y más precïsoqa, ¿imachötaq wanïnin yanapakurqan?

Diospa Gobiernompa contran churakäriyan

3. ¿Imanötaq Diablu Ëvata uliparqan?

³ Punta teytantsikkunaqa Diospa Gobiernompa contran churakärirmi, ‘diablupa’ gobiernonman qaqäriyarqan (Apo. 12:9). ¿Imanöpataq tsëmanqa chäriyarqan? Satanasmi Jehoväpa Gobiernompaq mana allita parlar Ëvata kënö tapurirqan: “¿Rasumpëpaku Diosqa, kë huertachö ni mëqan montipa frütanta ama mikuyëtsu niyäshurqunki?” Tsënam Ëvaqa huk montipa frütanllata mana mikuyänampaq Jehová mandanqanta willarqan, y mana wiyakurqa wanuyänampaq kaqtapis willarqanmi. Pero Satanasqa “manam wanuyankitsu” nirqanmi, tsënöpam Jehoväta ulikoqtanö churëkarqan. Y alli kaqpita michanqantam Ëvata creiratsirqan. Hina tsë frütata mikurir Diosnö alli kaqta y mana alli kaqta kikinkunana reqiyänampaq kaqtapis nirqanmi (Gén. 3:1-5).

4. ¿Imanötaq nunakuna Satanaspa gobiernonman churakäyashqa?

⁴ Kë llapan ninqanwanqa, Diospita rakikarqa más allim kawakuyanki neq cuentam Satanás nikarqan. Diospa alli Gobiernonman Adan qaqänampa rantinmi, warmin ninqanta wiyar Dios michanqan frütata mikurirqan. Tsënöpam Diospa kuyakïninta hoqrarir llapantsikta hutsaman y wanïman churamarquntsik. Tsëpita patsam llapan nunakuna mana alli gobiernopa o “que patsacho mandacoq diablu[pa]” makinman churakashqa (2 Cor. 4:4; Rom. 7:14).

5. a) ¿Imatataq Jehová rurarqan munënin rurakänampaq? b) ¿Imatataq Jehová musyatsirqan Adanpawan Ëvapa wambrakunata?

⁵ Jehoväqa llapan parlanqantam ruran. Tsëmi Adanwan Ëvapis wanuyarqan (Gén. 3:16-19). Tsënö këkaptimpis Jehoväpa munëninqa  rurakänanllam karqan. Hutsata rurayanqampita pasanampaq kaqta willarllanam wambrankuna alli kawakïta tariyänampaq kaqtapis willakurqan. Huk ‘mirëmi’ yurinan karqan, y tsë mirëta Satanás atakanchö kanir wanuratsiptimpis, kawariramurmi peqanchö halur ushakätsinan karqan (Gén. 3:15). ¿Pitaq tsë ‘mirëqa’ karqan? Bibliam kënö nimantsik: “Jesucristu Diospa Tsurin[mi] shamorqan diablupa rureninta ushacäratsinanpaq” (1 Juan 3:8). Pero ¿imanöpataq Jesus kawëninwan y wanïninwan Jehoväpa alli këninta rikätsikurqan?

¿Imapaqtaq Jesus bautizakurqan?

6. ¿Imanötaq musyantsik Jesus hutsannaq yurinqanta?

⁶ Jesus poqushqa këman chärirnin Adannölla hutsannaq kanantam Dios munarqan (Rom. 5:14; 1 Cor. 15:45). Tsëpaqqa hutsannaqmi yurinan karqan. ¿Imanöpataq hutsannaq yurirqan? Ángel Gabrielmi Jesuspa maman Marïata kënö willarqan: “Santu Espiritu qamman shamurninmi, camanqa juc wamrata, sielucho quecaq Diospa poderninwan qeshyaq tucurinequipaq. Santu wawequinam Diospa tsurin canqa” (Luc. 1:35). Jesus wambrallaraq këkaptinchi maman Maria willarqan imanöpa yurinqantapis. Tsëchi oqrakashqata Josëwan Maria templochö taririyaptin, Jesus kënö nirqan: “¿Manacu gamcuna musyayanqui Dios Taytäpa wajinchö canäta?” (Luc. 2:49, NTCN). Këchömi rikantsik wambrallaraq kanqampita patsë Diospa Tsurin kanqanta musyanqanta. Tsëmi pëpaqqa alläpa preciso karqan Teytampa alli këninta reqitsikunan.

7. ¿Imanö cuerpoyoqtaq Jesus karqan?

⁷ Jesusqa Teytampa kaqta kuyanqanta rikätsikurqan reunionkunaman imëpis ëwarninmi. Peqan alli kaptinmi wiyanqan kaqta y Escrituras Hebreaschö leinqantaqa raslla yachakureq (Luc. 4:16). Hinamampis hutsannaq cuerpoyoqmi karqan, tsë cuerponwanmi nunakunata salvanan karqan. Tsëpaqmi Salmo 40:6-8 parlan, y bautizakunqan hora Jehoväman mañakurqa tsë texto ninqanmanchi yarparëkarqan (Luc. 3:21; lei Hebreus 10:5-10).

8. ¿Imanirtaq Juanqa Jesusta bautizëta munarqantsu?

⁸ Juan kaqtam Jesusqa ëwarqan bauticëkunampaq, pero Juanqa manam munarqantsu. ¿Imanirtaq munarqantsu? Juanqa bautizaq, judïokuna hutsankunapita y Leyta mana wiyakuyanqampita perdonta chaskiyänampaqmi. Y kastan karchi Juanqa musyaq Jesus hutsannaq kanqanta y arrepentikïta mana wananqanta. Pero Jesusqa willakurqan yakuchö bautizakunan alläpa preciso kanqantam, kënö nirnin: “Tsaynö rurarmi, Dios Yaya munanganta cumplishun” (Mat. 3:15, NTCN).

9. ¿Imapaqtaq Jesus bautizakurqan?

 ⁹ Jesusqa Adannö perfecto nunam karqan, y munaptinqa hutsannaq tsurinkunapis kanmanchi karqan. Tsënö kaptimpis, Jesusqa manam tsëkunaman yarparäkurtsu kakurqan, Teytan tsëpaq mana kachamushqa kaptin. Diosqa kachamurqan Akrashqa Mirë kanampaqmi, pero tsëpaqqa wanunanraqmi karqan (lei Isaías 53:5 *). Jesus bautizakurqa, manam noqantsiknötsu Jehoväpaq tsëraq kanampaq awnikïkarqan, pëqa yurirqan Jehoväpa akrashqa markanchönam. Tsëmi, bautizakurninqa profecïakuna ninqannöpis Jehoväpa munëninta ruranampaqna churakëkarqan.

10. ¿Imata ruranampaqtaq Jehová Tsurinta kachamurqan, y imanötaq Jesus rurarqan?

¹⁰ Jesusqa Diospa munëninta rurarqan: yachatsikurnin, nunakunata Diosta serviyänampaq yanaparnin y pëkunapis yachatsikoq kayänampaq yachatsirninmi. Pero manam tsëllatatsu rurarqan, bautizakurqa chikiyänampaq, qatikachäyänampaq y hasta wanutsiyänampaqpis listo këkanqantam rikätsikurqan, tsënöpam Jehovälla ciëlochö Patsachöpis Mandakoq kanqanta musyatsikurqan. Pëqa alläpam Teytanta kuyaq. Tsëmi Teytampa munëninta rurë, y nunakunata salvanampaq wanïpis pëta kushitseq (Juan 14:31). Hina kushikoqmi kawënimpa valorninwan nunakunata hutsapita y wanïpita librananta musyarnin. Pero ¿këkunata ruranqampita Jehová kushikurqantsuraq? ¡Awmi!

11. ¿Imanötaq Jehová rikätsikurqan Cristuta chaskinqanta?

¹¹ Mateo, Marcos, Lucas, Juan librokunachömi willamantsik Jesus Jordan yakupita yarquriptin Teytan munëninta ruranampaq chaskinqanta. Bautizakoq Juanmi pasanqanta kënö willakurqan: “Noqam ricarqä imeca palumano Santu Espiritu rara sielupita urämur peman tarpoqta. [...] Noqam ricarqö, y rasonpa caqtam willayaq pëqa rasonpam Diospa tsurin” (Juan 1:32-34). Kikin Jehovämi kënö nirqan: “Quemi noqapa cuyë Tsurï. ¡Perecurmi noqa allapa cushicü!” (Mat. 3:17; Mar. 1:11; Luc. 3:22).

Wanunqanyaqmi tsarakurqan

12. Bautizakunqampita patsë, ¿imatataq Jesus rurarqan kima wata pullan?

¹² Bautizakunqampita patsëmi, kima wata pullan qallëkurqan nunakunata yachatsirnin, y Teytanlla ciëlota Patsata gobernamunampaq Autoridadyoq kanqantapis. Tsë markakunapa chakipa puriqa sasaraq o ajaraqchi karqan, tsënö kaptimpis hinantin markakunapam yachatsikoq ëwarqan (Juan 4:6, 34; 18:37). Pero manam yachatsikurqanllatsu, sinöqa qeshyëkaqkunatapis hampirqan, mallaqaqkunata pachan qararqan, y wanushqakunatapis kawaritsimurqanmi. Kë ruranqankunawanmi rikätsikurqan Diospa Gobiernonchö ruramunampaq kaqta (Mat. 11:4, 5).

13. ¿Imatataq Jesus yachatsikurqan mañakïpaq?

¹³ Yachatsikunqampita y milagrokuna ruranqampita alabakunampa rantinmi, Teytan yanapanqanta willakurqan (Juan 5:19; 11:41-44). Hina yachatsikurqanmi Diosman mañakurnin imakunapita puntata mañakunatapis. “Jutiki santifikashqa katsun” nishpam mañakunantsik, y Diospa munënin ciëlochö y Patsachö rurakarnin Satanaspa mana alli gobiernompa rantin Diospa Gobiernon gobernamunampaqpis mañakunantsikmi (Mat. 6:9, 10, QKW). Hinamampis, ‘Diospa mandaquininta’ y justicianta puntata ashirnin mañakunqantsikmannö kawëta tïranapaqmi yachatsimarquntsik (Mat. 6:33).

14. Jesus hutsannaq këkarpis, ¿imanirtaq Teytampa munëninta ruranan sasaraq karqan?

¹⁴ Wanunampaq hora  chanqanmannömi, tsarakunan alläpa preciso kanqanman Jesus más yarpachakurqan. Hutsata mana ruranqampita hipar wanuptinran Teytampa munëninta ruranan karqan y shutin santificashqa kanan karqan. Wanukunampaq pitsqa hunaq pishikaptinmi, kënö mañakurqan: “¡Shonqüchomi allapa llaquina! Peru tseno quecarpis, manam ‘Salbecamë’ nishaqtsu Papänïta, porqui tsepaqmi que patsaman shamushqa cä. Antis quenomi nishaq: ‘Papä, ¡puedeq queniquita ricatsiquiquï!’ nir. Tsenam sielupita [“Jehová”, NM] queno parlamoqta wiyayarqan: “¡Ricatsicushqanam cä! Y yapepis ricatsicushaqran” (Juan 12:27, 28). Pï nunapis mana hipanqannö tukïta hiparnin tsarakunampaqmi Jesus listo këkarqan. Pero ciëlochö Patsachö Teytan autoridadyoq kanqanta y alli këninta reqitsikunampaqmi Jehová parlapanqan yanaparqan. Awmi, ¡Teytampa munënintam rurarirqan!

¿Imachötaq Cristupa wanïnin yanapakurqan?

15. Jesus wanunampaq këkarnin, ¿imanirtaq “llapannam cumplicärishqa” nirqan?

¹⁵ Qeruchö warkurëkar y wanunampaq këkarnam, Jesus kënö nirqan: “Llapannam cumplicärishqa” (Juan 19:30). Bautizakunqampita wanunqanyaq, ¡imëkakunatam Diospa yanapakïninwan kima wata pullan Jesus rurarqan! Wanuriptinlla Patsa pasëpa kuyuriptinmi, Jesusta wanutsinampaq churayanqan soldädokunapa capitannin kënö nirqan: “¡Que nunaqa rasonpa Diospa Tsurinmi cashqa!” (Mat. 27:54). Kë capitanqa kënö nirqan, Jesus Diospa Tsurinmi kä ninqampita nunakuna burlakuyanqanta rikashqa karmi. Tukïta rurëkäyaptimpis Jesusqa wanunqanyaqmi tsarakurqan, tsënöpam Satanás uli o llulla kanqanta rikätsikurqan. Pero Diospa nunankunapaq unëna Satanás kënö ninqanta yarpärishun: “Kawëninrëkurqa llapan kapunqantam nunaqa qonqa” (Job 2:4). Pero Jesusqa, tsarakunqanwanmi rikätsikurqan Adanwan Eva pasayanqan alläpa sasa o aja mana kanqanta. Y más precïsoqa karqan kawëninwan y wanïninwan Jehovälla ciëlochöpis Patsachöpis alli ruraq kanqanta alabanqanmi (lei Proverbios 27:11 *). Pero manam tsëllatsu, maskunapaqmi Jesus wanunqanqa yanapakurqan.

16, 17. a) Jesus Patsaman manaraq shamuptin, ¿imanirtaq Jehová unë sirveqninkunata alli nunakunatanö rikarqan? b) Jesus wanunqanyaq tsarakunqampita, ¿ima kanampaqtaq Jehová churashqa, y imatataq Jesus kananyaq rurëkan?

¹⁶ Jesus Patsaman manaraq shamuptinmi, Jehoväqa atskaq sirveqninkunata alli nunakunatanö rikarqan, y pëkunatam awnirqan wanuriyaptimpis kawatsimunampaq (Isa. 25:8; Dan. 12:13). Pero Jehová Diosnintsik tsë bendicionkunata awnikunampaqqa, huk preciso rurëtaran ruranan karqan. ¿Imataq karqan? Bibliam nimantsik: “Diosmi allitanona ricamänantsicpaq permiterqon Jesucristu cruscho [“qeruchö”, NM] wanur yawarninta ramananpaq. Y marcaquinintsicrecurllana, salbamarnintsicmi alli queninta ricatsicun, y unena mana alli rurenintsicpitapis allapa pasensiacurmi castigamantsicnatsu. Tseno rurarninmi, canan tiempucho Dios ricatsicun alli justisia ruraq cashqanta. Tserecurmi Jesucristuman marcäcoqcunata allipana ricamantsic” (Rom. 3:25, 26).

¹⁷ Teytampa munëninta rurar Jesus wanuriptimpis, Jehoväqa kawarkatsimurqanmi y más precisaq kanampaqpis churarirqanmi. Kananqa imëpis manana ushakaq kawëtanam Jesus ciëlochö chaskishqa (Heb. 1:3). Sacerdotekunapa Mandaqnin y Rey karninmi, qateqninkunata yanapëkan Teytampa alli këninta pëkunapis reqitsikuyänampaq. ¡Alläpam kushikuntsik alli këninta reqitsikur, y sirveqnin kaqkunata Jehová bendecinanta musyarnin! (Lei Salmo 34:3 * y Hebreus 11:6.)

18. ¿Ima tapukïpa respuestantaq qateqnin kaq artïculochö yachakushun?

¹⁸ Abelpita patsë alli nunakunaqa, Jehová  awnikunqan Mirëninman markäkurninmi Jehoväpa kuyakïninchö kawayashqa. Diosqa musyarqanmi wanunqanyaq Tsurin tsarakunanta, y ‘nunacunapa jutsancunata’ chipyëpa ushakätsinanta (Juan 1:29). Cristupa wanïninqa kananyaqmi nunakunata yanapan (Rom. 3:26). ¿Imanötaq qamta yanapashunkiman? Kë tapukïpa respuestantaqa yachakushun qateqnin kaq artïculochömi.

[Päginapa ura kuchunchö willakïkuna]

¿Yarpankiku?

• ¿Imanötaq Diospa Gobiernompa contran Adanwan Eva churakäyarqan?

• ¿Imapaqtaq Jesus bautizakurqan?

• ¿Imachötaq Jesuspa wanïnin yanapakurqan?

[Yachakunapaq kaqpa tapukïninkuna]

[10 kaq päginachö dibüju]

¿Musyankiku Jesus imapaq bautizakunqanta?