Jehoväpa bendicionninta ashishun
Jehoväpa bendicionninta ashishun
“Llapan shonquncunawan asheqnin caqcunataqa [Dios] yanapa[nmi].” (HEB. 11:6.)
1, 2. a) ¿Imatataq nunakuna rurayan Diospa bendicionninta chaskïta munëwan? b) ¿Imanirtaq Diospa bendicionninta chaskïta munashwan?
ATSKA markakunachömi imapitapis agradecikurninqa “¡Dios bendecïkushï!” nikuyan. Wakin religionkunapa yachatsikoqninkunam nunakunata, animalkunata y imëkatapis bendeciyan. Wakinkunanam, karu markapapis ëwayan Diospa bendicionninta chaskïta munëwan. Hina wakin autoridadkunapis nacionninkunapaq bendicionta mañakuyanmi. ¿Shonqupita patsëtsuraq mañakuyan? ¿Mañakuyanqanta Dios wiyantsuraq? ¿Pikunatataq Jehová bendecin y imanir?
2 Bibliata qellqatsirmi, Jehová willakurqan ushanan hunaqkunachö hinantin nacionpita limpio y yamë kawakoq serviqninkuna kayänampaq kaqta, y chikikäyaptin y qatikachëkäyaptimpis hinantin Patsapa alli willakïta apayänampaq kaqta (Isa. 2:2-4; Mat. 24:14; Apo. 7:9, 14). Awmi, llapantsikmi awnikushqantsik Bibliachö ninqannö kawanapaq. Pero tsëpaqqa, Jehoväpa bendicionnintaran wanantsik (Sal. 127:1). Tsëpenqa, ¿imataraq rurashwan Jehoväpa bendicionninta chaskinapaq?
Wiyakoqkunam bendicionta chaskiyan
3. Israelïtakuna wiyakurqa, ¿ima bendiciontataq chaskiyänan karqan?
3 (Lei Proverbios 10:6, 7 *.) Shumaq Patsaman israelïtakuna manaraq yëkuyaptinmi, Jehová awnirqan, wiyakurqa atska bendicionkunata chaskiyänampaq kaqta (Deu. 28:1, 2). Pero manam “kë llapan bendicionkunam qamman shamunqa” nirqanllatsu, sinöqa “taripäshunkim” nirqanmi, tsëwanmi rikätsikurqan awnikunqankuna cumplikänampaq kaqta.
4. ¿Imanötaq rasumpa wiyakï kanman?
4 Pero ¿imanö shonquwantaq israelïtakuna Diosta wiyakuyänan karqan? Leychöqa kushishqa y shonqupita patsë wiyakuyänampaqmi neq, tsënö mana rurarqa Diostam piñëkätsiyanman karqan (lei Deuteronomio 28:45-47 *). Jehoväqa mandakunqanta mana munëkar ruranataqa manam munantsu; animalkuna, y demoniokunapis mana munëkarllaqa wiyakuyanmi (Mar. 1:27; Sant. 3:3). Diosta rasumpa wiyakoq kaqqa, shonqupita patsëmi wiyakun, y markäkunmi Teyta Jehová alläpa sasata o ajata mana mañamanqantsikta, ‘y llapan shonquncunawan asheqnin caqcunata yanapanqanta’ (Heb. 11:6; 1 Juan 5:3).
5. ¿Imanötaq Deuteronomio 15:7, 8 texto ninqan yanapakurqan Jehová awnikunqanman markäkuyänampaq?
5 Diosman märkäkuyanqantaqa israelïtakuna rikätsikuyänan karqan Jehová mandanqanta shonqupita patsë wiyakurmi. Këta maslla tantiarinapaq Deuteronomio 15:7, 8 * (lei) ninqanta rikäshun. Kë Leytaqa mana munëkarpis wiyakuyaqmi, pero tsënö rurarqa ichikllam waktsakunata yanapayaq. Tsënö mana munëkar rurarqa ¿rasumpatsuraq kuyakoq kayanqanta rikätsikuyanman karqan? Y, ¿Jehoväman markäkuyanqanta y Diosnö kuyakoq kayanqantapis rikätsikuyanmantsuraq karqan? ¡Manam! Jehoväqa rikarëkaqmi shonqunkunata, y waktsakunata imanö yanapayanqantapis, y ninqannö rurayaptinqa llapan rurayanqanchö bendicinampaqmi awnikurqan (Deu. 15:10). Jehová ninqanman markäkurnin o yärakurninga, shonqupita patsëmi yanapanakïta munayanman karqan, y tsëqa atska bendicionkunatam chaskiyanman karqan (Pro. 28:20).
6. ¿Imatataq nimantsik Hebreus 11:6 texto?
6 Hebreus 11:6 textochömi rikarquntsik Diosnintsikman markäkunantsik alläpa preciso kanqanta, pero bendicionninta chaskinapaqqa huk mastaraq ruranatam rikätsimantsik. ‘Llapan shonquwanran’ ashinantsik. Griego idiömachöqa, llapan shonqïkiwan mana haqita ashï ninanmi. Tsëmi kë versïculoqa rikätsimantsik llapan puëdenqantsikta rurashqaqa, Jehová Dios bendecimänaman markäkunantsikpaq kaqta. “Mana ni imay llullacug [ulikoq] quiquin Dios Yaya[m]” awnimantsik (Titu 1:2, NTCN). Pëqa unëpita patsënam rikätsikushqa llapan awnikunqanta ruranqanta. Awmi, ¡llapantam cumplin! (Isa. 55:11.) Tsëmi, shonqupita patsë pëman markäkushqaqa segürom Jehová bendecimäshun.
7. ¿Imanötaq Dios bendecimantsik Abrahanpa kastanwan?
7 Jehoväqa awnikurqanmi Abrahanpa kastanwan atska bendicionkunata ramamunampaq kaqta. Abrahanpa kastanqa ishkëmanmi rakikan, punta kaqmi Jesus, y tsëpitanam ciëlota ëwaqpaq kaqkuna. Y ciëlota ëwaqpaq kaqkunam, “Diosnintsic alli rurashqancunata willacu[yänampaq]” cargota chaskiyashqa (Gal. 3:7-9, 14, 16, 26-29; 1 Ped. 2:9). Tsëmi “mäcoq, mäcoq, cumplidu sirweqnin” ninqanta mana wiyakurqa, Diosnintsikwan alli këta puëdeshwantsu (Mat. 24:45-47). Ciëlota ëwaqpaq kaqkuna mana yanapamashqaqa, manam Diospa Palabran imapaq parlëkanqanta, ni kawënintsikchö imanö yanapamänatapis musyashwantsu karqan. Biblia ninqannö kawëta tïrarqa atska bendicionkunatam chaskishun.
Diospa munëninmi puntachö kanan
8, 9. ¿Imakunatataq Jacob rurarqan Jehová awnikunqankuna cumplinampaq?
8 Diospa bendicionninta tarïta munëwan kallpachakïpaq parlarqa, Jacob ruranqanmanmi yarpärintsik. Jehová Abrahanta awninqan imanö cumplikänantapis Jacobqa manam musyarqantsu, pero Abrahanpa kastan mirarnin huk nacionman tikranantaqa alleqmi musyarqan. Tsëmi 1781 watachö Jacob Harán markata ëwarqan warmi asheq. Manam alli warmi kananllatatsu munarqan, sinöqa Jehoväta serviq y alli mama kanantam munarqan.
9 Musyanqantsiknöpis, Jacobqa kastampita Raquel shutiyoq shipashta reqirirmi kuyakurkurqan. Pëwan casakïta munëwanmi, qanchis wata trabajanampaq Raquelpa teytan Labanta awnirqan. Pero Jacobqa këta rurarqan manam shipashta kuyarllatsu. Sinöqa, abuëlun Abrahanta y teytan Isaacta Jehová awninqanta musyarmi (Gén. 18:18; 22:17, 18; 26:3-5, 24, 25). Tsëpitanam teytan Isaac Jacobta kënö nirqan: “Llapan Kallpayoq Diosmi bendecishunki y miratsishunki y atskayätsishunki y hatun markam tikranki. Qamta y wambrëkikunatam Abrahanpa bendicionninta qoshunki, tsënöpa Abrahanta qonqan markakunachö forastëronö purinqëkikunata chaskinëkipaq” (Gén. 28:3, 4). Jacob, Jehoväta serviq warmita ashinqanchö y llapan ruranqanchömi rikantsik Jehová awnikunqanman shonqupita patsë markäkunqanta.
10. ¿Imanirtaq Jehová Jacob mañakonqanta qorqan y bendicerqan?
10 Jacobqa familian kariptin manam kapoqyoq këtatsu ashirqan, sinöqa Jehoväpa munënintam familianta yachatsirqan. Pëpaqqa más preciso karqan, Jehová munanqanta rurëmi. Diospa bendicionninta chaskinanrëkurqa, ima problëmakunata pasëkarpis llapan puëdenqanta ruranampaqmi churapakarqan. Tsënöllam awkinyanqanyaqpis karqan, tsëmi Jehová bendecirqan (lei Génesis 32:24-29 *).
11. Diospa munënin Biblia ninqannö cumplikänan këkaptinqa, ¿imatataq rurashwan?
11 Jacobnö kaqpis, manam allillaqa musyantsiktsu Jehoväpa munënin imanö cumplikänampaq kaqta. Pero Bibliata estudiarqa ichikllaqa musyantsikmi ‘Señorpa junaqnin’ imanö kanampaq kaqtapis (2 Ped. 3:10, 17, QKW). Tsë hunaq imë chämunanta mana musyarnimpis, këllachöna kanqantaqa musyantsikmi. Hinamampis, kë tiempochö llapan nunakunata yachatsir sinchikushqaqa, Jehová salvamänapaq y wiyamaqnintsiktapis salvanampaqmi awnimantsik (1 Tim. 4:16).
12. ¿Imakunatataq musyantsik?
12 Ushakë imë karpis chämunantaqa musyantsikmi. Diosnintsikqa patsätsishqanam ushakëta imë apamunampaq kaqta, y manam llapan nunakunata yachatsinataraqtsu shuyaranqa (Mat. 10:23). Tsënö kaptimpis llapan nunakunata yachatsita tïranapaqmi Jehová yachatsimantsik. Y shonqupita patsë pëman markäkurmi, yachënintsikwan y Jehoväpa markan qomanqantsikkunawan nunakunata yachatsintsik. Yachatsikunqantsik markakunachö, ¿atskaq nunakunatsuraq Jehoväta serviyanqa? Manam musyantsiktsu (lei Eclesiastés 11:5, 6 *). Pero Jehoväqa pëman markäkur yachatsikunapaqmi mandamarquntsik (1 Cor. 3:6, 7). Kallpachakur yachatsikunqantsiktaqa rikëkanmi, y santo espïritunwanmi imanö ruranapaqpis yachatsimäshun (Sal. 32:8).
Santo espïrituta mañakushun
13, 14. ¿Imanötaq Jehová rikätsikushqa sirveqkunata espïritunwan yanapëkanqanta?
13 Pero ¿imatataq rurashwan mandamanqantsikta mana puëdeqnö kar, o yachatsikïta mantsakurnin? Tsëqa Jehoväpa santo espïrituntam mañakunantsik, tsëmi yanapamäshun alli yachatsikoq kanapaq (lei Lucas 11:13). Jehoväpa sirveqninkuna mana yachëkäyaptimpis, santo espïritunwanmi pëqa llapan mandanqanta cumpliyänampaq yanapan. Këllamampis yarpärishun, Egiptopita israelïtakuna yarqayämunqanllachömi Jehová espïritunwan mitsikoq nunakunata y esclävokunata mana soldado këkäyaptin yanaparqan chikeqninkunata ushakätsiyänampaq (Éxo. 17:8-13). Tsëpitanam Bezalel y Oholiab nunakunata espïritun yanaparqan Diospa tabernäculonta shumaq rurayänampaq (Éxo. 31:2-6; 35:30-35).
14 Kanan witsampis, tsë espïrituqa Jehoväpa sirveqninkunata yachënin qoshqam mana yachëkarpis librokunata rurayänampaq. 1927 watachömi, librokunata rurayänampaq dirigeq Robert J. Martin wawqi kënö willakurqan: “Señornintsikmi pasëpa wanayanqä hora punkuta kicharamurqan, y tsënam makïkunaman chäramurqan librokunata rurayänäpaq hatun máquina, y manam paqwë musyayarqätsu kë máquina imanö manejana kanqantapis. Pero Teytantsikqa musyanmi pëllapaqna kawaqkunata imanö yanapanampaq kaqtapis. [...] Huk semänakuna pasariptinllam kë máquina trabajar qallëkurqan y kananyaqpis librokunata rurakïkanllam, y máquina ruraqkunapis manachi musyayarqantsu tukïta ruranampaq kaqtaqa”. Kanan kamayaqmi Jehoväqa kallpachakunqantsikta bendecin.
15. ¿Imanötaq yanapamantsik Romanos 8:11 ninqan tentacionpa pasëkarnin alli tsarakunapaq?
15 Santo espïrituqa tukïnöpam yanapakun. Y Jehoväta serviq kaqqa yanapakïta chaskintsikmi imëka mana allikunapa pasëkarpis. Tantiarinapaq, itsa huk tentacionpa pasëkashwan. ¿Imatataq rurashwan tentacionman mana ishkinapaq? Yarpänantsik apóstol Pablu Romanos 7:21, 25 y 8:11 ninqanmanmi. Rikanqantsiknöpis, “Jesusta wanushqanpita cawaritsimoq Diospa Santu Espiritun[qa]” yanapamënintsikta puëdenmi mana alli munënintsikta vencinapaq. Kë texto ciëlota ëwaqkunapaq qellqakashqa kaptimpis, ninqanqa llapantsiktam yanapamantsik. Llapantsikmi mana wanushpa kawakïta chaskishun Jesusman markäkurnin, mana alli munëkunata shonquntsikpita horqarnin y santo espíritu pushamänata haqirnin.
16. ¿Imatataq rurashwan santo espïrituta chaskinapaq?
16 Santo espïritunta Jehová qomänantsikta munarqa, kikintsikmi sinchikunantsik. Manam mañakunantsikllatsu, sinöqa Palabrantam alli estudianantsik (Pro. 2:1-6). Y Jehoväpa espïritun congregacionchö yanapakuptinmi, reunionkunaman mana haqita ëwanantsik. Tsënöpam rikätsikushun “Santu Espiritu creyicoqcunata [...] willashqanta” wiyakïta munanqantsikta (Apo. 3:6). Hina yachakunqantsiknö rurëpis alläpa precïsom. Proverbios 1:23 textom Jehoväpa kënö consëjonta willamantsik: “Piñapäyanqaqta wiyakuyë. Tsëqa santo espïritüta qamkunaman atskatam ramëkamushaq”. Awmi, ‘cäsucoqnincunamanqa Dios cachamushqam Santu Espiritunta’ (Hech. 5:32).
17. ¿Imata rurartaq Jehoväpa bendicionninta chaskintsik?
17 Diospa bendicionninta tarinapaqqa alliraqmi sinchikunantsik. Pero manam kikintsiklla sinchikunqantsikpitatsu tarintsik, sinöqa Jehová yanapamashqam. Këqa mikunqantsikkunawan cuerpontsik pasanqannömi. Imanömi mikunqantsik llapan cuerpontsikta yanapan, tsënöllam Jehová Diospa bendicionnimpis yanapamantsik. Jehová qomanqantsik cuerpom tukï mikïkunata mikushqa kushikun, y tsënöpanam alli saludyoq kantsik. Mikunqantsik saludnintsikta imanö yanapanqantapis manam musyantsiktsu y kallpaman imanö tikranqantapis manam allillaqa musyantsiktsu. Pero mikunqantsik yanapamanqantsiktaqa musyantsikmi, tsëmi mikuntsik. Y mikunqantsik mikï alli kaptinnäqa masraqmi yanapamantsik. Tsënöllam Jehoväpis mana wanushpa kawanapaq imata ruranapaq kaqtapis willamantsik, y mandakunqannö kawanapaqpis yanapamantsik. Awmi, kikin Jehovämi tsë kawëta tarinapaq yanapamantsik, tsëmi pëta alläpa agradecikunantsik, y munëninta ruranapaq kallpachakunantsik. Tsëta rurarllam pëpa bendicionninta tarishun (Ageo 2:18, 19).
18. ¿Ima rurëtataq munantsik y imanir?
18 Tsënö kaptinmi, mandamanqantsikta shonqupita patsë ruranapaq sinchikunantsik y imëpis allita ruranapaqqa Jehovämanmi markäkunantsik o yärakunantsik (Mar. 11:23, 24). Ama qonqashuntsu, “asheq caqqa tarinmi” (Mat. 7:8). Ciëlota ëwaqpaq kaqkunaqa ‘wiñe cawe coronankunam’ chaskiyanqa ciëlochö (Sant. 1:12). Y Abrahanpa kastampita bendicionta chaskïta munaq Patsapaq kaq ‘üshäcunaqa’ Jesus kënö ninqantam wiyayanqa: “Shayämï papänïpa bendisishqan caqcuna. Chasquiyë [...] qamcunapaq erensia alistashqa quecaqta. Tsetaqa Papänïmi que patsata camarnin, alistarqan” (Juan 10:16; Mat. 25:34). Tsënöpam Jehoväpa “bendicionninkunata chaskikaqkunaqa patsachö täräyanqa [...] y mana wanushpam tsëchö kawayanqa” (Sal. 37:22, 29).
[Päginapa ura kuchunchö willakïkuna]
^ par. 3 Proverbios 10:6, 7: “Bendicionkunaqa alli ruraq nunapaqmi, pero mana alli ruraqpa shiminqa mana alli rurëkunatam tsapan. Alli ruraqtaqa kushikïwanmi yarpäyan, pero mana alli ruraq nunapa shutinqa qonqashqam kanqa”.
^ par. 4 Deuteronomio 28:45-47: “Kë llapan maldicionkunam qamman shamunqa y qatikachäshunki, y taripëkushurnikim ushakätsishunki, Jehová Diosnikita mana wiyakunqëkipita y mandakunqanta y leyninkunata mana cumplinqëkipita. Y kë maldicionkunaqa, qampa y wambrëkipa hananchömi huk señalno imëyaqpis kanqa. Imëkayoq këkar Jehová Diosnikita shonqupita patsë mana sirvenqëkirëkur”.
^ par. 5 Deuteronomio 15:7, 8: “Täranqëki markachö o Jehová qoshunqëki markachö mëqan markamayikipis waktsayaptinqa, manam waktsayashqa wawqikiwan chukru shonquqa, ni micha kanëkitsu. Tsëpa rantinqa, kuyakïwanmi makikita kichanëki, y wananqantam qoykunëki”.
^ par. 10 Génesis 32:24-29: “Jacobmi hapallanlla këkarqan. Tsënam huk nunawan patsa waranqanyaq tsaranakur sutanakuyarqan. Jacobta vencita mana puëdernam Jacobpa chankampa moqunta yatëkurqan, tsënam chankampa moqun uchkumpita yarqurirqan. Tsënam [ángel] nirqan: ‘Kachamë, atsikyärinnam’. Tsënam contestarqan: ‘Manam kachashqëkitsu bendecimanqëkiyaq’. Tsënam tapurirqan: ‘¿Imataq shutikiqa?’. Tsënam contestarirqan: ‘Jacob’ nishpa. Tsënam pëqa nirqan: ‘Manam Jacobnatsu shutiki kanqa, sinöqa Israelmi, Diosta y nunata bencinqëkirëkur’. Tsënam Jacob nirirqan: ‘Shutillëkita willëkamë’. Tsënam nirqan: ‘¿Imanirtaq shutïtaqa musyëta munanki?’. Tsënam tsëchö bendecirirqan”.
^ par. 12 Eclesiastés 11:5, 6: “Imanömi qeshyaq warmipa pachanchö llullu wambrapa tullunkuna patsakëkanqanta musyankitsu, tsënöllam Diosnintsikpa rurëninkunatapis musyankitsu. Qoyapa murïkita murï, y tardeyanqanyaq makikita hamatsitsu; manam musyankitsu mëchö wayunanta, këchö o wakchö, o ishkan lädochö wayunampaq kaqtapis”.
¿Yarpantsikku?
• ¿Imanötaq rasumpëpa wiyakïqa?
• ¿Imatataq Diospa bendicionninta chaskinapaq ruranantsik?
• ¿Imanötaq santo espïrituta chaskintsik y imanötaq yanapamantsik?
[Yachakunapaq kaqpa tapukïninkuna]
[12 kaq päginachö dibüjukuna]
Jacobqa huk angeltam sinchipa tsarikurkurqan Jehoväpa bendicionta chaskïta munëwan.
¿Noqantsikpis pënöllaku sichikuntsik bendicionta chaskinapaq?
[13 kaq päginachö dibüju]
Bezalel y Oholiab alläpa alli trabäjota rurayänampaqmi santo espíritu yanaparqan