Diospa Palabrampita yachatsikïkuna

¿Imanirtaq Diospita yachakunantsik?

Kë yachatsikïmi yanapashunki wakin tapukïkunapa respuestanta Bibliëkichö tarinëkipaq, y tsë tapukïkunataqa itsa qampis rurakushqanki. Munaptikiqa, Jehoväpa testïgonkuna yanapariyäshunkimanmi kë tapukïkunapa respuestanta más yachakurinëkipaq.

1. ¿Imanirtaq Diospita yachakunantsik?

Diosqa alläpa shumaq willakïtam nunakunapaq katsin. Tsë willakïqa Palabranchömi këkan. Rasun kaqchöqa, Bibliaqa Kamakoq Teytantsik apatsikamunqan carta cuentam. (Lei Jeremías 29:11.)

2. ¿Ima willakïtaraq noqantsikpaq Dios katsin?

Nunapa gobiernonqa manam chikinakïta, mana alli rurëkunata, qeshyakunata ni wanïtapis ushakätsita puëdeshqatsu. Pero Diosnintsikqa nunakunapa llapan hipakïninkunata o ñakayninkunata Gobiernonwan paqwë ushakätsimunampaqmi nishqa. (Lei Daniel 2:44.)

3. ¿Imanirtaq Diospita kanan yachakunantsik precisan?

Diosqa ichikllachönam llapan mana alli nunakunata ushakäratsimunqa. Pero puntataqa mëtsika millón nunakunatam yachëkätsin nuna mayinkunata kuyayänampaq y más kushishqa kawakuyänampaq. Bibliachömi yachakuntsik tukï problëmakunata imanö altsanapaq, imanö kushishqa kawanapaq y imanö Diosta kushitsinapaqpis. (Lei Sofonías 2:3.)

 4. ¿Pitaq Bibliata qellqatsirqan?

Bibliachöqa 66 librokunam kan y 40 nunakunanömi qellqayarqan. Qallanan kaq pitsqa librokunataqa Moisesmi qellqarqan, y tsëpitaqa 3500 watakunanam pasashqa, y ushanan kaq librotanam apóstol Juan qellqarqan, y tsëpitaqa 1900 watakunanönam pasashqa. Manam ni mëqan nunapis kikimpa pensënintatsu qellqayarqan, sinöqa Diospa pensëninllatam. Tsëmi Bibliaqa kikin Diospita shamun. (Lei 2 Timoteu 3:16 y 2 Pedru 1:21.)

¿Imanötaq Bibliata Dios qellqatsinqanta musyantsik? Shamoq tiempopaq kaqta mana pantarnin willakuptinmi, y tsëtaqa nunakuna manam rurëta puëdeyantsu. (Isaías 46:9, 10). Hinamampis llapan yachatsikïninmi rikätsikun Dios imanö kanqanta. Hina hukläyana kawakuyänampaqpis nunakunata yanapanmi. Tsëmi mëtsika millón nunakuna cuentata qokuyan Bibliataqa Dios qellqatsinqanta. (Lei Josué 23:14 y 1 Tesalonicenses 2:13.)

5. ¿Imatataq wanantsik Biblia yachatsikunqanta käyinapaq o mayanapä?

Jesusqa Diospa Palabrampita alli yachatsikoqmi karqan. Patsachö kawanqan witsanqa, pï më nunakunam Bibliata reqiyaq, pero manam käyiyaqtsu o mayayaqtsu. Tsëmi Biblia imata yachatsikunqantapis käyitsikunampaqqa, versïculokunata leeq y nïkur käyitsikoq. Tsënöllam kë yachatsikïpis yanapakun Biblia ninqanta alli käyinapaq. (Lei Lucas 24:27, 45.)

Musyayämi Diospita y imapaq kawanqantsikta kushishqa yachakuyänëkipaq kaqta. Imam sïqa, manam llapankunatsu kushikuyanqa Bibliapita yachakuptiki. Pero yachakunëkiqa alläpam precisan. Kikin Biblia ninqannöpis, Diospita yachakoqkunaqa imëyaqpis kawakuyanqam. (Lei Mateo 5:10-12 y Juan 17:3.)

Más yachakïta munarqa, Rasumpëpaqa, ¿imatataq Biblia yachatsikun? libropa 2 kaq capïtulonta ashiri, kë librotaqa Jehoväpa testïgonkunam rurayämushqa.