2. Mallaqë

“Mallaqäqui watacunam canqa.” (MARCOS 13:8.)

● Níger nacionchömi huk nuna Quaratadji nishqan ichikllan markaman chärin mikïta ashirnin. Hina tsë nacionpa huk lädonkunapitam prïmonkuna, wawqinkuna y paninkunapis tsë ichikllan markamanqa ëwayashqa mikïta ashirnin. Kë mikïta asheq nunam awashqa shoqush hitarëkaq hananman ishkirin. ¿Imanir? “Familianta imatapis mikutsinampaq mana kaptinmi, qaqllankunallatapis rikëta puëdentsu alläpa llakikur” nirmi willakun tsë ichikllan markachö mandakoq Sidi shutiyoq nuna.

WAKINKUNA NIYANQAN. Patsaqa wananqantsikpitapis mastam wayun; rakipänakïllatam yachakunantsik.

¿RASUMPAKU NIYANQAN? Awmi, kananqa imëpitapis masmi nunakuna mikï wayutsita yachakuyashqa y më tsëpam apatsiyashqa. Pero más alliqa kanman kë mikïkunata llapan wanaqkunaman gobiernokuna apatsiyanqanchi, tsënö sinchikushqa karpis manam llapanmanqa chätsiyashqatsu.

¿IMATATAQ RIKÄTSIKUN PASAKUNQANKUNA? Cada qanchis nunakunapitam huk nuna imë hörapis mallaqlla kakïkan y África subsahariana nishqan nacionchönäqa masran, tsëchömi kima nunakunapita huk nunapaq ima mikunampaqpis pasëpa kantsu. Këta más tantearinapaqqa, pensarishun huk teytaman, huk mamaman y wambranman. Ishkaqllapaq mikï kaptinqa, ¿teytatsuraq o mamatsuraq mallaqlla quedarinqa? Hina tsënöllam cada hunaq atskaq familiakunata pasan.

¿IMA NINKITAQ? ¿Rasumpatsuraq Marcos 13:8 ninqan cumplikëkan? Cientïficokuna imëkata rurayashqa kayaptimpis, ¿hinantin Patsachötsuraq mallaqäyan?

Alläpa feyupa patsa kuyïwan mallaqëqa rikätsikun ushanan hunaqkunachö huk hipakïkunapis kanampaq kaqtam.

[5 kaq päginachö ninqan]

“Chunka wambrakunapitam kimaq wanuyan neumonïawan, diarrëawan y huk qeshyakunawampis, alli mikushqa karqa manam wanuyanmantsu.” (ANN M. VENEMAN, EX DIRECTORA EJECUTIVA DE UNICEF)

[5 kaq päginachö pikunapa kanqan]

© Paul Lowe/Panos Pictures