‘Yachatsiyäshoqniquicunata estimëcuyë’
‘Yachatsiyäshoqniquicunata estimëcuyë’
“Allapam roguecuyaq yachatsiyäshoqniquicunata [“dirigiyäshoqnikikunata”, NM] estimecuyänequipaq. Pecunaqa qamcunacho quecayan allapa empeñuncunawan willapäyäshurniquim.” (1 TES. 5:12.)
1, 2. a) ¿Imapataq Tesalönicachö cristiänokuna pasëkäyarqan Pablu punta kaq cartanta qellqanqan witsan? b) ¿Ima consëjotataq Pablu qellqarqan?
PUNTA cristiänokunapa tiemponman kutirishun. Euröpachö Tesalónica shutiyoq punta congregacionchö këkanqantsikta pensarishun. Apóstol Pabluqa mëtsika tiempom tsëchö cristiano mayinkunata sinchiyätsir y kallpata qornin karqan. Y huk markakunachö ruranqannöllachi üshakunata cuidayänampaq wakin cristiänokunata anciano kayänampaq churarqan (Hech. 14:23). Tsënö kaptimpis, tiempo pasariptinmi judïokuna nunakunata willaparnin Pablutawan Silasta tsë markapita qarqutsiyarqan. Tesalönicachö quedaq cristiänokunaqa pïninnaq cuentachi sientekuyarqan, hina itsachi mantsakashqapis quedariyarqan.
2 Apóstol Pabluqa alläpa yarpachakurchi këkarqan tsë mushoqllaraq patsätsishqa congregacionpaq. Tsëchi tsë markaman kutita tïrarqan, pero Satanasmi ‘atajucunata churarqan’ mana kutinampaq. Tsëmi cristiano mayinkunata yanapanampaq Timoteuta kacharqan (1 Tes. 2:18; 3:2). Tiempo pasariptinnam Timoteuqa alli willakïwan Pabluman kutirqan, y Pablunam huk alläpa yanapakoq cartata apatsirqan. Tsë cartanchömi kënö nirqan: “Allapam roguecuyaq yachatsiyäshoqniquicunata estimecuyänequipaq” (lei 1 Tesalonicenses 5:12, 13).
3. ¿Imanirtaq Tesalönicachö anciänokunata cristiänokuna “allapa cuyar estimecu[yänan]” karqan?
3 Musyanqantsiknöpis Tesalönicachö anciänokunaqa, mushoqllaraq karmi apóstol Pablunö y viäjenchö yanaqaqninkunanöqa alli bueno yachaqtsu kayarqan, ni Jerusalenchö këkaqkunanötsu atska tiempona anciano kayarqan. Tsë congregación patsakanqampita huk watallaraq pasashqa kaptin. Tsënö kaptimpis, Pabluqa cristiano mayinkunata nirqanmi mitseqnin cuenta anciänokunata imanir agradecikuyänampaq kaqta, kënömi nirqan: ‘Pecunaqa qamcunacho quecayan allapa empeñuncunawan willapäyäshurniqui’ y dirigiyäshurnikim. Hina “allapa cuyar estimecuyë” nirqanmi. Y ushanampaqnam, “jucniqui jucniquicuna shumaq bidata pasacur cawacuyë” nirqan. Tsë witsan Tesalönicachö yacharninqa, ¿anciänokunata rurëninkunapita valorankimantsuraq karqan? Këman pensari: ¿congregacionnikichö anciänokunata valorankiku? ¿Cristurëkur Diosnintsik “nunacunata qarenin[tsic]” cuenta qomanqantsiktanöku rikanki? (Efe. 4:8.)
Imëkatam rurayan
4, 5. ¿Imanirtaq unë witsan anciänokunata Pablu nirqan alläpa empëñowan trabajëkäyanqanta, y imanirtaq tsënölla nintsik kanan witsan anciänokunapaqpis?
4 Rikanqantsiknö, ¿imatataq Tesalönicachö anciänokuna rurëkäyarqan Pabluwan Silas Bereapa ëwakuyanqanchö? Alläpa empëñowanmi trabajëkäyarqan. Pablupita yachakuyanqannöllam congregacionta Bibliapita yachatsiyänampaq kallpachakïkäyarqan. Tsënö kaptimpis, Bibliaqa kënömi nin Berëachö täraqkunapaq: “Tesalonica marcacho caq israel nunacunapitapis mas juclayam cayarqan. Porqui allapa cushicurmi chasquiyarqan tse alli willaquicunata. Y cada junaqmi estudiayarqan Diospa palabranta” (Hech. 17:11). Tsëqa, ¿Tesalönicachö cristiänokuna Diospa Palabranta mana valorayanqantaku rikätsikun? Manam, Pabluqa manam Tesalönicachö cristiänokunapaqtsu parlëkarqan, sinöqa tsë marka nunakunapaqmi. Tsëmi kënö nirqan: “Diospa alli willaquininta willariyapteqmi, [...] chasquïcuyarqequi, ‘Queqa Diospa rasonpa palabranmi’ nir, y manam niyarqequitsu ‘Pecunapa yachatsiquininllam’ nishpa” (1 Tes. 2:13). Clärom këkan, anciänokunaqa allichi trabajayarqan rasumpa kaq yachatsikïta chaskikoqkunata yachatsiyänampaq.
5 Kanan witsampis, “mäcoq, mäcoq, cumplidu sirweq[mi]” Diospa üshankunata “miquinincuna örancho qaran” (Mat. 24:45). Pëkunapa yanapakïninwanmi anciänokunapis alläpa empëñowan trabajayan cristiano mayinkunata mikutseq cuenta Diospa Palabrampita yachatsiyänampaq. Atska idiömakunachömi kan Bibliapita tukï publicacionkuna, Índice de las publicaciones Watch Tower nishqannö y Watchtower Library nishqan progrämanö. Congregacionta wananqanchö yanapayänanrëkurmi anciänokuna atska hörakuna preparakur kayan alli yachatsikoq y kallpata qokoq discursokunata rurayänampaq. Hinamampis, wakinkunataqa asambleakunachö yarqayämunampaqmi cargota qoyan. ¿Imëllaqa pensashqantsikku ëka tiempo tsëkunata rurar pasayanqanta?
6, 7. a) ¿Imatataq rurëninwan Pablu yachatsirqan Tesalönicachö anciänokunata? b) ¿Imanir-raq anciänokunapaqqa sasaraq kanman Pablunö kayänan?
6 Tesalönicapita anciänokunaqa, Diospa üshankunata rikäyänampaqmi Pablu ruranqankunaman alläpa yarpäyaq. Pabluqa manam ruranan kaptinllatsu cristiano mayinkunata watukaq. Qepa kaq yachatsikïchö rikanqantsiknöpis, pëqa imëka “juc mamä wamrancunata cuidaqno[mi]” cristiano mayinkunata kuyakïwan tratarqan (lei 1 Tesalonicenses 2:7, 8). Y manam tsëllatsu, pëkunata yanapananrëkurqa listom këkarqan wanurinampaqpis. Hina tsënöllam Tesalönicapita anciänokunapis congregacionta rikäyänan karqan.
7 Kanan witsampis, anciänokunaqa Pablunöllam Diospa ushankunata kuyëpa cuidayänan. Wakin üshakunaqa manam rasqa wiyakuyantsu ni alläpa yachanëpaqtsu kayan, pero alli musyaq mitsikoqqa llapanchöpis alli kaqtam tarita munan (Pro. 16:20). Tsënö kaptimpis, hutsasapa kayaptinmi höraqa sasaraq wakin üshakunachö alli kaqllata tariyänanqa. Tsënö karpis, paqwëmi kallpachakuyan Jesucristu ruranqannö llapanta kuyakïwan tratayänampaq. ¿Manatsuraq agradecikushwan tsëta rurayänampaq sinchikuyanqampita?
8, 9. ¿Imakunata rurarnintaq anciänokuna ‘imepis shumaq ricamantsic’?
8 Cristiänokunapaqqa alläpam precisan anciänokunata ‘cäsucuyanan’. ¿Imanir? Pablu ninqannöpis, pëkunaqa ‘imepis shumaq ricamarnintsicmi yachecatsimantsik’ (Heb. 13:17). Imanömi mitsikoqkuna üshankunata cuidayänanrëkur punïtapis tariyantsu, tsënöllam anciänokunapis Diospa kaqchö mana allinö këkaqkunata, llakishqakunata, y qeshyëkaqkunata yanapayänanrëkur punuyampistsu. Këman yarpärishun, höraqa Comités de Enlace con los Hospitales nishqanchö yanapakoqkuna paqas höram shärikuyan qeshyëkaqkunata yanapayänampaq. ¡Imanömi kushikïkuntsik wananqantsik hora yanapamänapaq chärayämuptinqa!
9 Hina tsënöllam Comités Regionales de Construcción nishqanchö trabajaqkuna, y tukï desgraciakuna kaptin yanapakoq anciänokunapis, llapan shonquntsikwan yanaparkunata wanayan. Yarpärishun 2008 watachö Nargis shutishqa yakuwan shukukï viento Myanmar (puntataqa Birmania shutipa reqishqa) nishqanta ushakäratsiptin yanapakuyanqanman. Irauadi nishqan mayu, lamarman chänan kuchunkunachö markam paqwë ushakashqa karqan y tsëchömi këkarqan Pothigon nishqan congregación. Tsëchö këkaq wawqikunata y panikunata yanapayänanrëkurmi, huk grupo Testïgokuna pasayarqan ushakashqa sitiokunapa y mëtsika wanushqakuna hanampa. Y punta chaqkunachömi këkarqan tsë congregacionkunata unëna visitaq superintendente. Tsëchö këkaq wawqikunawan panikuna rikëkurmi kënö niyarqan: “¡Rikäyë, superintendente de circuïtontsikmi! ¡Jehovämi salvëkamantsik!”. ¿Pëkunanöku noqantsikpis alläpa kushikuntsik noqantsikrëkur anciänokuna paqasta y hunaqta trabajayanqampita? Hina manam qonqanantsiktsu sasa o aja hutsakunata rikäyänampaq cargota chaskishqa superintendentekunatapis, pëkunaqa mana gälakurllam tsëkunata rurayan (Mat. 6:2-4). Yanapakïninta chaskeqkunaqa shonqupita patsëmi agradecikuyan.
10. ¿Ima mana rikanqantsik rurëkunatataq anciänokuna rurayan?
10 Hinamampis, mëtsikaq anciänokunam tukïläya trabäjota rurayan congregacionpaq. Anciänopura rurayänanta rikaq anciänom cada semana pikuna yachatsikayämunampaq progrämata patsätsin. Secretarionam congregacionpa cada killa o cada wata informenkunata rikan. Y Yachatsikunapaq Diospa Escuëlanta rikaq anciänonam, pikuna discursayänampaq kaqtapis patsätsin. Hinamampis, cada kima killatam huk anciano congregacionpa cuentankunata rikan. Y llapan anciänokunam sucursal wayipita apatsiyanqan cartakunata leiyänan y ninqannö rurayan, tsënöpa congregacionchö llapankunapis “juc shonqunolla” kayänampaq (Efe. 4:3, 13). Tsëkunam yanapan “llapantapis shumaq ordenadu” rurayänampaq (1 Cor. 14:40).
‘Dirigiyäshoqnikikuna’
11, 12. ¿Pikunataq congregacionta dirigiyan, y imanötaq rurayan?
11 Hina Tesalönicachö këkaq cristiänokunaman cartakunqanchöqa, anciänokunapaq ‘dirigiyäshoqnikikuna’ nirqanmi Pablu. Tsë palabraqa griego idiömachö “puntachö shëkaqkuna” ninanmi, hina “manejayäshoqnikikuna” o “pushayäshoqnikikuna” nirpis traducishwanmi (1 Tes. 5:12). Yarpäshun, tsë anciänokuna “allapa empeñuncunawan” trabajayanqampaqmi Pablu parlarqan. Tsëmi congregaciontaqa llapan anciänokuna dirigiyan y manam hukllaqllatsu. Kanan witsan anciänokunaqa rasumpam ‘puntachö shäräyan’ reunionkunata dirigirnin. Y “superintendente presidente” nir qayanapa rantinmi kananqa “anciänopura rurayänanta rikaq” nirna qayantsik. Tsëmi yanapamantsik huk cuerponölla kayaptin llapankunatapis igualpa rikänapaq.
12 Pero congregacionta dirigiqa manam yachatsinanllatsu. 1 Timoteu 3:4 textochömi dirije ninanta maneje nin, y kë ishkan palabraqa tsë ninanllam. Pabluqa anciano këta munaqkunatam tsë textochö kënö nirqan: “Wayincho caqcunatapis allapa shumaq manijaqmi canman, y tsurincunapis respetacur cäsucoqmi cayanman”. Kë texto ninqannöpis, teytakuna wambrankunata dirigirqa o manejarqa, manam kënömi o waknömi nirllatsu yachatsiyänan, sinöqa “cäsucoq” kayänampaqmi yanapayänan, y familianchö llapan këkaqkunatam shumaq manejayänan. Hina tsënöllam anciänokunapis llapan congregacionta dirigiyänan, y yanapayänan Jehoväta wiyakuyänampaq (1 Tim. 3:5).
13. ¿Imanirtaq höraqa anciänokuna atska tiempotaraq wanayan huk acuerdoman chäyänampaq?
13 Congregacionta shumaq dirigiyänampaqqa, llapan anciänokunam rikäyänan congregación imata wananqanta y imanö yanapayänampaq kaqta. Tsënö kaptimpis, “¿manatsuraq más fäcil kanman huk anciänolla tsë llapanta ruraptinqa?” nir itsa tapukushwan. Pero yarpäshun, kanan witsan anciänokunaqa, unë witsan congregacionchö anciänokuna rurayanqanllatam qatikäyan. Ëllukarqa llapankunam parlayanqanta wiyanakuyan y congregacionta yanapanampaq kaq yachatsikïkunatam Bibliapita ashiyan. Llapan anciänokunam tsë reunión alli yarqunampaq puntallapitana Bibliapita yachakuyan y mäkoq mäkoq cumplido sirveq ninqankunata publicacionkunachö ashiyan. Clärom këkan, kë llapankunata rurayänampaqqa atska tiempotam wanayan. Y punta cristiänokunapa tiemponchö señalakïpaq parlarnin acuerdoman chäyänan sasaraq kanqannömi, kanan witsampis höraqa ima asuntotapis hukläyapa hukläyapa rikäyaptin huk acuerdoman chäyänan sasaraq. Tsënö kaptinqa, alliran tsë asuntota rikäyan hasta Biblia ninqanta qatir huk acuerdoman chäyanqanyaq (Hech. 15:2, 6, 7, 12-14, 19).
14. ¿Imanirtaq agradecikuntsik anciänokuna huknölla trabajayaptin?
14 ¿Imaraq pasanman mëqan anciänopis kikin pensanqannölla o ninqannölla imatapis rurayänanta munaptin, o Diötrefesnöpis contrakïta ashiptinqa? (3 Juan 9.) Llapan congregacionpaqchi mana alli kanman. Imanöllam unë tiempochö cristiänokunapa yamë kawakïninkunata Satanás ushakätsita tïrarqan, tsaq tsënöllam kanan witsampis ruran. ¿Imanö? Masqa, huk cristiano kikinllaman yarpararnin llapampita más precisaq këta munananta ashirmi. Tsëmi anciänokunaqa qollmi shonqu kayänan y llapampis huknölla trabajayänan. Y congregacionchö kaqkunaqa alläpam agradecikuyan anciänokuna qollmi shonqu karnin huknölla trabajayaptin.
‘Willapäyäshurniqui’
15. ¿Imanirtaq anciänokuna cristiano mayinkunata consejayan?
15 Hina Pabluqa parlarqanmi anciänokunapa sasa pero precisaq rurëninkunapaqpis, y tsëqa Diospa ushankunata willapëmi. Escrituras Griegas Cristianas nishqanchöqa, apóstol Pablullam ‘willapäyäshurniqui’ nir traducishqa këkaq palabrata qellqarqan. Tsë palabraqa, consejë y alli claro atikë o anyay ninanmi, pero manam qayapëpa ninantsu (Hech. 20:31; 2 Tes. 3:15). Tsëmi corintiokunaman kënö nir Pablu cartakurqan: “Manam quecunataqa escribimü penqacatsiyarniquitsu; antis tsurï cuenta cayaptiquim, allapa cuyayarniqui consijapäriyaq” (1 Cor. 4:14). Këchö ninqannöpis, Pabluqa cristiano mayinkunata kuyarnin y pëkunapaq yarpachakurmi consejarqan.
16. ¿Imatataq huk anciano yarpänan cristiano mayinta willapänan kaptinqa?
16 Huk anciano pitapis willapänan kaptinqa, shumaqllapam ruranan. Pablunömi kallpachakunan willapäkïnin kuyakïwan, llakipäkïwan y cristiano mayinta yanapanampaqnö kanampaq (lei 1 Tesalonicenses 2:11, 12). Hina alläpam precisan ‘Teyta Diospa palabranta wiyashqantanolla yachatsicunan. Tsenopam wiyaqnincunapis rasonpa caq yachatsiquiman alli marcäcur cawacuyanqa’ (Titu 1:5-9).
17, 18. ¿Imatataq yarpänantsik huk anciano willapämanqantsik hora?
17 Anciänokunaqa musyayanmi hutsasapa karnin, höraqa cuentata mana qokur imatapis lluta niriyanqanta (1 Rey. 8:46; Sant. 3:8). Hina musyayanmi mëqan cristiänopaqpis mana alli rurënimpita parlapäyanqanqa ‘nananqanta y waqaripaq’ kanqanta (Heb. 12:11). Tsëmi mëqan cristiänotapis willapäyänampaqqa, puntata alli yarpachakur y mañakur-raq kayan. Tsëmi mëqan anciänopis willapäramashqaqa, alläpa kuyamarnintsik rurëkanqanta yarpänantsik.
18 Këman pensarishun: huk qeshya tsarïkamashwan y musyashwantsu imapita kanqanta. Tsëna huk alli doctorta tarïkushwan y willaramashwan imawan qeshyanqantsikta, pero willamanqantsikqa gustamashwantsu. ¿Tsërëkurtsuraq doctorwan piñakurkushwan? Manachi tsëtaqa rurashwantsu. ¿Y operacionwanraq o imapis nanatsikoq tratamientowanraq kachakänapaq kaqta nimashqaqa? Tsëwan kachakänantsik këkaptinqa, ninqantachi rurashwan. ¿Llakinashwantsuraq piñapëpanö nimashqaqa? Qallananchöqa itsachi, pero manachi tsërëkurllaqa manana hampikur kakushwantsu. Hina tsënöllam huk anciano piñapëpanö willapämashqapis tsërëkurllaqa mana wiyakur kashwantsu. Yarpänantsikmi alli kaqpita mana rakikärinantsikrëkur Jehoväwan Jesus anciänokunawan yanapëkämanqantsikta.
Anciänokunaqa Jehoväpa qarëninmi
19, 20. ¿Imanötaq “nunacunata qarenin[tsic]” qomanqantsikpita Jehová Diosta agradecikunqantsikta rikätsikuntsik?
19 Pipis imatapis qarëkamashqaqa, ¿imanöraq agradecikunqantsikta rikätsikushwan? Utilizarninchi. Tsënöllam Jehoväpis Jesucristurëkur ‘nunacunata qaretanö’ qomarquntsik, tsë qarëkunaqa kayan anciänokunam. ¿Imanötaq agradecikunqantsikta rikätsikuntsik? Discursayämuptin shumaq wiyakurnin y niyämunqanta rurëta tïrarnin. Comentanapaq tapukayämuptin kushishqa parlakurnin. Y Jehoväpita yachatsikunapaq o tukïta ruranapaq patsätsiyämunqanta rurarninmi. Hina consejamanqantsik imanö yanapamanqantsiktapis willarishwanmi. Y familiankunatapis alläpam agradecikuntsik, pëkunata qoyänampaq kaq tiempota noqantsikta qomanqantsikpita.
20 ¡Alläpam agradecikuntsik anciänokuna gänas gänaslla trabajayanqampita, dirigimanqantsikpita y willapämanqantsikpita! Pëkunaqa kayan Jehová Diospa alläpa valoryoq ‘qarëninmi’.
¿Yarpankiku?
• ¿Imanirtaq Tesalonica markapita cristiänokunaqa anciänokunata respetayänan karqan?
• ¿Imatataq “allapa empeñuncunawan” anciänokuna noqantsikrëkur rurayan?
• ¿Imanötaq yanapamantsik anciänokuna dirigimanqantsik?
• ¿Imatataq yarpänantsik huk anciano consejamashqa?
[Yachakunapaq kaqpa tapukïninkuna]
[29 kaq päginachö dibüju]
¿Agradecikuntsikku anciänokuna noqantsikrëkur llapan rurayanqanta?