¿Allitsuraq wambrakunata Diospita parlapashwan?

“Chikinakunapaqqa atska religionkunam kan, pero kuyanakunapaqqa manam.” (JONATHAN SWIFT, ESCRITOR IRLANDÉS.)

KËNÖ pensë unë siglo XVIII watakunapita kashqa kaptimpis, kanampis tsënöllam pensayan. Y wakin nacionkunachöqa nunakuna creiyan, wambrakunata Diospita teytankuna mana parlapäyänampaq kaqtam. Diosta adoraq familiakunachö wambrakuna winayaptinqa munayanqankunata rurayänampaq libre mana kayanqantam niyan.

¿Tsënöllaku qampis pensanki? ¿Këchö mëqan niyanqankunataq más alli parecipushunki?

● Teytakuna wambrakunata Diospita parlapäyänanta manam haqiyanmantsu.

● Teytakunaqa shuyaräyänman wambrankuna hatunyarkuyänantaran Diospita parlapäyänampaq.

● Wambrankuna winayanqanmannömi papäninkunaqa religionpita yachatsiyänan. Pero más winarkuyaptinqa kikinkunapa cuentankunapana más yachakuyänampaqmi niyanman.

● Wambrakunaqa munar o mana munarpis teytankunapa religionnintam apayänan.

¿Mana allimanku wambrakunata apanman religionyoq këqa?

Manam ni mëqan teytakunapis wambrankuna mana alli kayänantaqa munayantsu. ¿Rasumpatsuraq wambrakuna religionpita yachakuyänanqa mana alli? Atska watapana tsënö kanqanta musyëta munaq estudiöso nunakunam rikäyashqa teytankunapa religionnin wambrakunata imanö yanapanqanta. ¿Imanö kanqantataq rikäyashqa?

Awmi, pëkunaqa rikäyashqa huk wambra religionyoq familiachö winaptinqa, tsë wambrata winanqanchö yanapanqantam. 2008 watachö Social Science Research revistachö yarqamunqanmi kënö nirqan: “Rikakashqam familiachö religionyoq karninqa wambrakuna teytanwan y mamanwan más kuyanakuyänampaq yanapanqanta”. * Hina këtapis nirqanmi: “Religionwan Diospita yachakïqa wambrakunapa kawëninkunachö alläpa precisanqantam rikätsikun, y familiachö shumaq kawakuyänampaqnäqa masraqmi”. Tsënö kanqantam Jesuspis nirqan: “Kushishqam kayan Diosta wanaqkunaqa, porque pëkunapaqmi Diospa mandakïninqa këkan” (Mateo 5:3, NM).

Y ima nishwantaq, ¿“teytakunaqa shuyaräyanman wambrankuna hatunyarkuyänantaran Diospita parlapäyänampaq” niyanqampaqqa? Kënö pensaqkunaqa qonqariyanmi wambrakunapa pensëninkuna imëka qellqanni papelnö këkanqanta. Tsëmi teytakunaqa kë tapukuyänan: “¿Wambrakunata noqatsuraq imanö kawakuyänampaq y imaman creiyänampaq kaqta yachatsishaq o kë mundo mana allikunata yachatsinantatsuraq haqishaq?”.

¿Imanötaq rurayanman?

Unëpita patsë nunakuna tukïta pasayanqanmi rikätsikun religionyoq këqa chikinakïman apakunqanta. Tsënö kaptinqa, ¿imatataq teytakuna rurayanman Jonathan Swift ninqan wambrankunachö mana cumplikänampaq? ¿Imanötaq wambrankunata Diospita yachatsiyanman nuna mayinkunata kuyayänampaq?

Imanö rurayänampaq kaqtapis musyayanqa kë kiman tapukïkunapa respuestanta rikarninmi: 1) ¿imapitataq yachatsishwan? 2) ¿pitaq yachatsinman? 3) ¿imanötaq más alli yachatsishwan?

[Päginapa ura kuchunchö willakï]