Abrahanqa qollmi shonqu nunam karqan

Alläpa achachaptinmi Abrahanqa arwäkur o llantukur carpan hawanchö këkan. Tsënö këkarmi, kimaq shamïkaq forastërokunata karuman rikärin. * Tsëmi hinan hora sharkur ëqillapa taripëkur, quedakur hamariyänampaq invitan. “Huk pakipi tantata” convidarirpis, alli mikïtam ruratsirqan: tsëllaraq rurashqa tantata, mantequïllata, lëcheta y más allin kaq ëtsatam churapurqan. Tsënö ruranqanwanqa manam alli chaskikoq kanqanllatatsu rikätsikurqan, sinöqa, qollmi shonqu kanqantawanmi, tsëtam qateqninchö rikärishun (Génesis 18:1-8).

¿IMATAQ QOLLMI SHONQU KËQA? Allitukoq y gälakoq këpitaqa alläpa hukläyam. Qollmi shonqu nunaqa musyanmi imallachöpis hukkuna pëpita más yachaq kayanqanta (Filipenses 2:3). Hinamampis, wiyakunmi wakinkuna niyanqanta y listom këkan pitapis sirwinampaq.

¿IMANÖTAQ ABRAHAN TSËTA RIKÄTSIKURQAN? Kushishqam nuna mayinta sirwirqan. Qallananchö parlanqantsiknöpis, tsë kiman nunakunata rikanqan höram sirwir qallëkurqan. Warmin Säraqa hinan höram mikïta rurar qallëkurqan. Y Abrahanqa manam chaskirqanllatsu ni mikïninkunallatsu convidarqan, sinöqa kikin ëqillapa ëwarmi pishtayänampaq kaq animalta akrarqan y chätsikuriyaptin sirwirirqan. Tsëkunata rurayänampaq sirweqninkunata mandanampa rantinmi, kikin rurarqan. Pëpaqqa manam penqakïpaqtsu karqan wakinkunata sirwiqa.

Wiyakurqanmi mandädonchö këkaqkunata. Bibliaqa huk ishkë kutillam willakun Särawan Abrahan parlayanqampaq. Tsënö  kaptimpis, ishkë kutim willakun imata ruranampaqpis Sara ninqannölla Abrahan ruranqanta (Génesis 16:2; 21:8-14). Y huk kutiqa, warmin ninqanmi qallananchö “alläpa piñatsirqan”. Tsënö kaptimpis, warmin ninqan alli kanqanta Jehová niptinmi qollmi shonqu karnin rurarqan.

¿IMATATAQ YACHATSIMANTSIK? Rasumpëpa qollmi shonqu karqa, wakinkunata sirwinapaq listo këkänapaq kaqtam. Tukïchö yanaparmi kushishqa kashun.

Hina pipis imata nimanqantsiktapis imanö chaskikunqantsikmi rikätsikun qollmi shonqu kanqantsikta o mana kanqantsiktapis. Más alliqa nimanqantsikta chaskikïmi, y manam despreciashwantsu noqantsik tsënö mana pensashqa karllaqa (Proverbios 15:22). Tsënö këqa más yanapan ima cargoyoqpis kaqkunatam. Precisaq cargoyoq John shutishqa nunam kënö nin: “Watakuna pasanqanmannömi yachakurqö alli patronqa trabajaqninkuna imata pensayanqantapis willëta mana mantsayänanta ashinqanta”. Nïkurmi kënö nin: “Qollmi shonquraqmi kanëki pipis mandädïkichö këkaq nishunqëki alli kanqanta cuentaman churanëkipaqqa. Manam ni pï, ni patronpis llapantaqa musyantsu”.

Tsëmi Abrahantanö Jehová alli nawinwan rikämänata munarqa, wakinkuna nimanqantsikta chaskikushun y pëkunapaq mana allishtukurnin imallatapis rurashun. Yarpäshun, “Diosnintsicqa manam yanapantsu musyaq tucoqcunata; peru qollmi shonquyoqcunataqa alli queninwanmi yanapan” (1 Pedru 5:5).

[Päginapa ura kuchunchö willakï]