Alli cristiänokuna y alli vecïnokuna

JESUS Patsachö këkarnin, ¿ima ishkë precisaq rurëkunatataq puntaman churarqan? Puntataqa nunakunapa o runakunapa kawëninkunata cambianampaqmi kallpachakurqan, manam nunakuna patsätsiyanqan polïticakunata cambianampaqtsu. Jirkapita Yachatsikunqanchö ima ninqanta rikärishun. Qateqninkuna kachi y aktsi cuenta kayanqanta manaraq nirmi Jesusqa nirqan “Diosta wanaqkunaqa” kushishqa kawakuyanqanta. Jina “qollmi shonqukuna”, “limpio shonqukuna” y “nuna mayinkunawan alli kawakïta asheqkuna[pis]” tsënö kawakuyanqantam nirqan (Mateo 5:1-11, NM). Ishkë precisaq cösaskunata qateqninkuna alli entiendeyänantam Jesusqa munarqan: Diospaq ima alli y mana alli kanqanta cuentaman churar kawakuyänanta, y Diosta llapan shonqunkunawan sirwiyänanta.

Jina Jesusqa nunakunata alläpa sufreqta rikarmi llakiparqan y yanaparqan. Tsënö kaptimpis, manam llapan nunakunapa sufrimientonta ushakätsirtsu qallëkurqan (Mateo 20:30-34). Awmi, qeshyëkaqkunataqa kachakätsirqanmi, pero manam qeshyaqa ushakarqantsu (Lucas 6:17-19). Jina allqutsashqa o äjakushqa nunakunatapis shoqarqanmi, pero tsë mana alli rurëkunaqa manam ushakarqantsu. Hasta mallaqëkaqkunatapis mikutsirqanmi, pero mallaqëqa këkarqanllam (Marcos 6:41-44).

Nunakunapa kawëninkunatam cambiatsiyan y llakikïninkunachömi yanapayan

¿Imanirtaq Jesusqa nunakunapa shonqunta cambianampaq y llakikïninkunachö yanapanampaq churapakarqan? ¿Imanirtaq nunakuna patsätsiyanqan gobiernokunata altsanampaq y llapan jipakïkunata ushakätsinampaqtsu churapakarqan? Porque musyarqanmi tsëkunataqa Gobiernonwan Dios altsanampaq kaqta (Lucas 4:43; 8:1). Tsëmi juk kuti qeshyëkaqkunata kachakätsir sïguinampaq qateqninkuna niyaptin, Jesusqa kënö nirqan: “Acu ewashun waquin caq amanulla marcacunamanraq. Tsecunachopis yachatsicushaqmi. Tsepaqmi que patsaman shamushqa cä” (Marcos 1:32-38). Awmi, wakin nunakunata nanapäkïninkunapita kachakätsirpis, más precisaqpaqqa churarqan alli willakïkunata musyatsikïta y Diospita rasumpa kaqta yachatsikïtam.

Kanan witsan Jehoväpa testïgonkunapis Jesus ruranqannöllam llapan nunakunata Bibliapita yachëkätsiyan. Jina llakikïkunapa pasaq nuna mayinkunatapis tukïnöpam yanapayan. Tsënö kaptimpis, manam llapan mana alli rurëkunata y sufrimientokunata ushakätsiyänampaqqa churapakäyantsu, porque musyayanmi tsëtaqa Diospa Gobiernonlla ruranampaq kaqta (Mateo 6:10). Antis Jesus ruranqantam rurayan: kawëninkuna cambianampaqmi nunakunata yanapayan, y manam nunakuna patsätsiyanqan o kamakätsiyanqan gobiernokunatatsu. Musyanqantsiknöpis, nunakunapa problëmankunaqa manam política asuntochötsu këkan, sinöqa cada nunakunapa mana alli rurëninkunachömi.

Alli vecïnokuna

Jehoväpa testïgonkunaqa musyayanmi alli cristiano këqa alli vecino kë kanqanta. Tsëmi autoridadkunata respetayan, y yachatsikuyanqanchö y publicacionninkunachöpis tsëta rurayänampaqmi nunakunata animayan. Pero  autoridadkuna Diospa kaqta rurayänanta michäkuyaptinqa, Jehoväpa testïgonkunaqa manam tsëta cäsuyantsu. Pëkunaqa “nunacunata cäsuyanqäpitaqa, presisanmi puntata Diosta cäsucuyänä” niyanmi (Hechos 5:29; Romanos 13:1-7).

Jinamampis, wayin wayin ëwarmi nunakunata awniyan Bibliapita grätislla yachatsiyänampaq. Tsënö yachatsikurmi mëtsika millón nunakunata yanapayashqa alli shonqu karnin alli nuna tikrayänampaq. Llapan watakunam mëtsika pachak nunakuna jukwan jukwan punukïta, kukata, washkuta, drögata, qellëpaq pukllëta y tukï viciokunata jaqiyan. Tsë llapan nunakunam Biblia ninqanta wiyakur alli kawakoq y alli kaqta ruraq nunakunaman tikrayashqa (leiri kë revistapa 18 kaq päginanchö këkaq “Bibliam yanapashqa jukläyana kawakuyänampaq” nishqan yachatsikïta).

Bibliapita yachatsikuyanqanqa familiakuna alli kawakuyänampaqpis yanapakunmi. Awmi, familiapura más respetanakuyänampaq y más shumaq parlapänakuyänampaqmi yanapakun. Y familiakuna shumaq y alli kawakuyaptinqa, llapan markapis shumaq y allim kawakuyan.

Kë llapan yachatsikïkunata leirir, ¿ima ninkitaq qam? ¿Religionwan política takukäyanqan alli kanqantaku Biblia rikätsikun? Manam. Tsënö kaptimpis, rasumpa cristiänokunaqa markankunachö alli nunam kayänan. ¿Imanö? Jesus mandakunqannöpis, llapan nunakunapaq kachi cuenta y aktsi cuenta karnin.

Cristu yachatsikunqanta wiyakoqkunaqa kikinkuna, familiankunachö y markankunachömi kushishqa kawakuyan. Qampis Bibliapita yachakïta munarqa, markëkichö Jehoväpa testïgonkunawan parlari. *

[Päginapa ura kuchunchö willakï]

[10 kaq päginachö ninqan]

Jesusqa nunakunapa kawëninkunata cambianampaqmi kallpachakurqan, manam nunakuna patsätsiyanqan polïticakunata cambianampaqtsu

[11 kaq päginachö ninqan]

Jehoväpa testïgonkunaqa musyayanmi alli cristiano këqa alli vecino kë kanqanta