Unë witsankuna imanö kawayanqan​—Chakrakunachö imanö trabajayanqan

“[Jesusmi] disipuluncunata queno nerqan: —Cosecha poqicaqnomi nunacuna ellipaq quecayan. Tseno captinpis, wallcallam elloqcuna cayan. Tsemi Teyta Diosman mañacuyë elloqcuna mas atscaq cayänanpaq.” (MATEO 9:37, 38.)

JESUSQA chakrapaq y tukï herramientakunapaq parlarmi precisaq yachatsikïkunata entiendetsikurqan (Mateo 11:28-30; Marcos 4:3-9; Lucas 13:6-9). Tsënöqa yachatsikurqan mëtsika watakunapana murukoq nunakunata yachatsinanrëkurmi, y wiyaqninkunaqa allim entiendeyaq reqiyanqankunapita parlapar yachatsikuptin. Pëqa musyaqmi tsënö yachatsikuptin wiyaqninkuna alli entiendiyänampaq kaqta (Mateo 7:28).

Tsëkunapaq parlar Jesus yachatsikunqanta y maskunapaq Biblia parlanqantaqa entiendeshun, unë witsan murukoqkuna imanö murupakuyanqanta, ima herramientakunata utilizäyanqanta y ima sasakunapa pasayanqanta musyarninmi.

Pensari juk israelita chakrapa trabajaq yarqïkaqman. Llapan textokunata lei, tsënöpam musyarinki unë witsan imanö trabajayanqanta.

Murï witsan

Juk murukoq israelïtam nawinman Inti o Rupay mana chänampaq urkunman makinta churarkur wayin punkuchö shëkan, y kushishqam patsa waraq vientota shütarin. Alläpa achachëwan pasëpa chukrukashqa allpatam tamya ñampüratsishqa. Yapyapakï tiempom chärishqa. Tsëmi takllanta umbrukurkur chakranta ëwakun.

Chakraman chärirqa yuntantam yügurin, nïkurmi puntanman takshalla clavo churashqa shukshuwan o akishawan  yuntakunata tuksiparnin yapyar qallëkun. Takllapa puntanqa rumi rumi chakratam kichan; manam allpata apakurkurtsu ëwan, sinöqa chakrata rachitsirmi surcota kichan (1). Surcokuna mana wiksu yarqunampaqmi wakman këman takllanta kuyutsir ëwan. Tsëmi yapyanqan höraqa qepaman rikantsu (Lucas 9:62). Chakranllachömi yapyan, manam masmanqa yarquntsu.

Tsënömi mëtsika surcoyoq kar chakraqa imëka naqtsarishqanöraq muruyänampaq listo quedarin. Nïkurnam murukoqqa juknin makinwan juk bolsa cebädata tsarirkur, juknin kaq makinwanqa cebädata maqtsir maqtsir ëwan (2). Chakra kuchun nänikunaman cebada ishkinampa rantin o trukan “alli allpaman” ishkinampaqmi shumaq maqtsin (Lucas 8:5, 8).

Cebädata maqtsirirqa tsapatsiyanran. Tsëpaqqa pishqukuna cebädata manaraq ushpayaptin o uchuyaptinmi, yuntakunapa yügunman rastrïllota tsarirkatsir, entero chakrachö muruta tsapatsin. Nïkurnam azadón lampawan allpata kuyupätsin (3) y qorakunata llupin (Mateo 13:7).

Seguë witsan

Atska killakunanam pasarishqa y allinam tamyapashqapis. Poqushqana cebädapa espïgankunaqa achachëchömi wakman këman kuyur këkäyan. Murukïkunaqa poquräkunnam (Juan 4:35).

Seguë witsanqa murukoqwan familian alläpa trabäjoyoqmi kayan. Juk segaqmi juk kaq makinwan cebädakunata tsarin y juknin makinwannam höcewan segan (4). Wakinkunanam segashqa cebädakunata ëllur manöjokunata watayan (5), nïkurnam ashnukunaman o carrëtakunaman cargarkur (6) ëraman apayan.

Ciëlochö pukutë mana kaptinmi alläpa achachan. Llapan familiam higos jawanman ëwëkur juk rato jamariyan. Asi asilla parlarmi tantata, ankashqa gränota, aceitünaskunata, hïgoskunata, tsaki frütakunata mikuyan y alalaq yakunkuna upuyan (Deuteronomio 8:7).

Amänun chakrachönam, quedashqa espïgakunata pallapakoqkuna juntëkäyan (7). Wakinkunaqa waktsa y chakrannaqmi kayan (Deuteronomio 24:19-21).

 Tsëpitanam murukoqqa manöjokunata ëraman mashtaramun. Yuntakunaqa ërachö mashtarëkaq manöjokuna janampam trillo nishqanta tumar tumar qarachäyan (8) (Deuteronomio 25:4). Tsë qerupita rurashqa trillo jawanchöqa afilashqa rumikuna y roqukoq metalkunam kan, tsëkunam espïgakunata kichan.

Murukoqqa, tardeyaptin viento yurimoqtam shuyaran (Rut 3:2). Ventaq o jitaqqa Inti o Rupay jeqanqan hörakunam jarutsishqa cebädata horquetawan tsarirkatsir (9) vientoman jitan (Mateo 3:12). Tsënam gränoqa patsaman ishkin y päjantanam viento apakun. Kutin kutinmi jarutsishqa cebädata horquetanwan jitan gränollana quedanqanyaq.

Patsa waräriptinnam, warminwan wamrankuna cebädata cerniyan (10) aqukunata rakiyänampaq. Cebädakunaqa jatun canastakunamanmi winakan y aqukunatanam jitariyan. Alli cosëcham kashqa. Wakin kaqtam kuntukunaman o uyllukunaman churayan (11) y wakin kaqtanam gränokuna guardakuyänanman.

Tsë llapanta usharirmi tsë murukoqqa sutapäkurin y tsë markachö llapan chakrakunaman rikachakurin. Alläpa kushishqam raströjollana quedashqa chakrakunata rikärir yarpärin alläpa utipaq trabajo ruranqankunata. Üvasninkunata, olïvosninkunata, granädonkunata y hïgosninkunata uryapar këkaq nunakunatam o runakunatam rikärin. Amänun huertachö trabajëkaq vecïnonmi saludarin, tsë vecïnonqa pepïnokunata, lentëjaskunata, pushpukunata, pörokunata, garbanzokunata y ceböllakunatam ëllunqa. Tsë murukoqqa juk rätom wiyarärin, nïkurmi ciëloman rikëkur llapan qarëninkunapita Diosta agradecikurnin mañakurin (Salmo 65:9-11).

[26-28 kaq päginakunachö dibüjukuna]

(Imanö yarqamunqanta rikëta munarqa, kikin publicacionta rikäri)