MANA alli tiempukunapa pasarqa cäsi llapantsikmi pillapis yanaparamänata ashintsik. Problëmakunapa pasarqa ashintsik tsëkunapa pasashqa amïgutam, tsënöpa käyimarnintsik o mayamarnintsik yanapamänapaq. Y tsënö amïgun alläpa alliqa.

Diosman mañakïta munaqkunapis tsënöllam rurayan. Tsëmi wakinkunaqa santukunallaman mañakuyan, alläpa jatun y alläpa karuchö Dios këkanqanta pensar. Tsë santukunaqa pëkunanölla pruëbakunapa y imëka mana allikunapa pasashqa karninshi comprendita y yanapëta puëdiyan. Tantiyarinapaq, imatapis oqrapakushqa o suwapuyashqa kayaptinqa, san Antonio de Padua nishqan santutam mañakuyan. Wakinkunanam, animalninkuna qeshyaptin san Francisco de Asís nishqan santuman mañakuyan, o imallapitapis llakishqa këkarqa, san Judas Tadeu nishqan santuta mañakuyan.

Peru, ¿Bibliaqa nintsuraq santukunaman mañakunapaq? ¿Tsë mañakïkunata Dios wiyantsuraq? ¿Ima ninraq Dios santukunaman mañakushqa? Mañakïnintsiktaqa Dios wiyananta munantsikmi, tsëmi pë ima ninqanta musyëta munantsik.

Catölicukunaqa santukunaman mañakï alli kanqanta creirmi pëkunaman mañakuyan, porqui santukunaqa “mana dejëtash Teyta Diosman noqantsikpaq mañakïkäyan”, tsëtaqa rurëta puëdiyan “porqui Patsachö allikunata rurashqa karninshi” (Catecismo de la Iglesia Católica). Tsëmi nunakuna santukunaman mañakurninqa creiyan Diospa lädunchö karnin imëkanöpapis yanapëkuyänampaq kaqta.

¿Bibliaqa yachatsikunku tsënö creinapaq? Wakinkunaqa awmi niyanmi, y tsënö creiyänampaqqa romänu cristiänukunapaq Pablu qellqanqanchöshi këkan: “Wauqicuna y panicuna, Teytantsic Jesucristurecur y Santu Espiritu cuyanacunantsicpaq yanapamashqantsicrecurmi canan rogacuyaq Diosman imëpis noqapaq mañacuyänequipaq” (Romänus 15:30). ¿Pabluqa cristiänu mayinkunamanku mañakïkarqan tsënöpa pëkuna mañakïninta Diosman chätsipuyänampaq? Manam. Pabluqa nikarqan juk cristiänupis pëpaq Diosman mañakïta puëdinqantam. Tsëmi, Diospa lädunchö këkaqkunaman y pëkuna nunakunapa mañakïninta Diosman chatsiyänampaq creiqa alläpa jukläya Pablu ninqampita. Tsëqa, ¿imanirtaq santukunaman mañakushwantsu?

Juan libruchömi Jesusqa kënö nirqan: “Noqam näni cuenta cä. Rason caqta willacoqmi cä. Jina caweniquicunapis noqam cä. Y noqaman marcäcurllam pipis Dios Yayaman chäyanqa”  (Juan 14:6). Jina nirqanmi: “Imatapis jutïcho mañacuyanqequita Dios Yaya qamcunapaq ruranqam” (Juan 15:16). Jesusqa manam pëman mañakunapaqtsu nirqan, y përaq mañakïnintsikta Diosman chätsinampaq kaqtatsu. Mañakïnintsik wiyashqa kanampaqqa kikin Diosllamanmi mañakunantsik, Jesuspa jutinllachö y manam ni pipa maschöqa.

Juk kutim, apostulninkuna mañakïta yachatsiyänampaq Jesusta niyarqan, tsëmi kënö yachatsirqan: “Mañacurnin queno niyanqui: ‘Sielucho quecaq Dios Yayalläcuna, jutillequi allapa respetuwan alabashqa catsun’” (Lücas 11:2). Tsëmi cada mañakunqantsik höraqa Diosllaman mañakunantsik y manam Jesusmantsu ni jukmantsu. Jesus rikätsikunqannöpis, Diosllamanmi imëpis mañakunantsik, Jesuspa jutinchö y manam ni mëqan santukunapa jutinchötsu.

Jinamampis, mañakïnintsikqa alläpa precisaqmi adoracionnintsikchö, y Diospa rantin jukta adorëqa Biblia yachatsikunqampa contranmi (Juan 4:23, 24; Apocalipsis 19:9, 10).

Juk kutichömi, juk wamra mallaqarnin teytanta mañanqampaq igualatsikïwan Jesus yachatsikurqan. ¿Juk teytaqa wamranta rumintsuraq tantapa rantin qoykunman o juk culebrantsuraq pescädupa rantin qoykunman? (Matëu 7:9, 10.) Wamrankunata kuyaq teytaqa manachi tsëta rurëkunmantsu.

Teytakuna imanö rikäyanqampaq parlarlla juk igualatsikïta rikärishun. Yarpakurkï, wamrëkiwan shumaq kawakuyänëkirëkur y imëpis wiyanëkipaq procurashqa kankiman karqan. Tsëna wamrëki juk precisaq mañakïta rurëta munashunkiman, peru piñakunëkita o ajäkunëkita mantsarnin jukwan mañakushunkiman. ¿Imanöraq sientikunkiman? ¿Y tsënölla imëpis ruraptinqa? ¿Gustashunkimantsuraq? Manachi. Juk alli teytaqa munan wamrankuna imëpis pëta directu parlapäyänanta y wanayanqanta mana mantsashpa mañayänantam.

Teytanta mikïta mañaq wamrapaq parlarmi Jesusqa kënö nirqan: “Si qamcuna mana alli ruraq quecarpis tsuriquicunata allicunata qoyanqui, sielucho quecaq Dios Yayanäqa mas alli carmi, mas allicunata qoyäshunqui mañacuyaptiqueqa!” (Matëu 7:11). Awmi, juk alli teytaqa allikunatam wamranta qoyta munan, tsëmi, tsëpitapis masraq ciëluchö teytantsikqa wiyamënintsikta y mañakunqantsikta qomënintsikta munan.

Jutsantsikpita alläpa penqakushqa këkarpis pëman directu mañakunatam Diosqa munan. Pëqa manam pitapis churashqatsu mañakïnintsikta wiyanampaq. Bibliam kënö nimantsik: “Qepi cuenta lasäshoqnikita Jehoväman churë, y pëqa yanapashunkim” (Salmu 55:22). Manam santukunaman ni piman mañakushwantsu, tsëpa rantinqa sinchikunantsikmi Dioswan alli këta y tsënöpa imatapis mana mantsashpa pëman mañakunapaq. Jehovällamanmi mañakunantsik, y manam pëta mantsashwantsu.

Kamakoq Diosnintsikqa noqantsikpaq yarpachakunmi. Pëqa problëmantsikkunachö yanapamënintsiktam munan y pëman witinapaqmi invitamantsik (Santiägu 4:8). ¡Imanö agradecïdum këkantsik “mañakïkuna Wiyaq” Diosman witita puëdinqantsikpita! (Salmu 65:2.)