Silviam kënö nin: “Universidächö estudianqä witsanqa, estudiaq mayïkunaqa religiösu kayanqantam niyaq, tsënö nikarpis pruëbata qoyanqä höraqa copiakuyaq y drogakuyaqmi. Religionninkunaqa manam kawëninkunachö yanapaqtsu”.

Lionelmi kënö nin: “Trabajaq mayïkunam mana qeshyëkarnin, ‘qeshyämi’ nir faltayämoq. Pëkunapaqqa religionqa mana utilisäna adornu cuentallam”.

Imanöpis kawëninkunachö portakuyänampaq kaqtaqa, cäsi manam imachöpis religionninkunaqa yanapantsu. Mëtsikaqmi ‘allapa relijiosu tucur, Diostapis ardella sirweq tucuyan; peru rurenincunawanqa Diosta juc cuchumanmi churariyan’ (2 Timoteu 3:5). Y pushaqnin religiösukunaqa, manam pëkunapaq alli ejemplutsu kayashqa, ni Bibliawan yachatsiyashqatsu imanö alli kawayänampaq kaqtapis. Tsënö kaptinmi, mëtsikaq nunakuna pensayan, imanö kawakuyanqanta Dios cuentapaq mana churanqanta.

Bibliaqa willakun Diospa sentimientun kanqanta y imanö portakunqantsikta cuentaman churanqantam. Mana wiyakoq këninkunawanmi israelïtakunaqa Diospa ‘shonqunta alläpa nanatsiyarqan’ (Salmu 78:40). Peru juk nuna rasumpa arrepentikur cambiaptinqa ‘sielucho masran cushicuyan’ (Lücas 15:7). Teytantsik Jehovä imanö kanqanta alleq musyarninqa masmi pëta kuyashun, kuyanqantam kuyashun y chikinqantam chikishun (Amos 5:15).

Jehoväpa testïgunkunapaq parlarmi juk periödicu kënö nirqan: ‘Familiakuna alli kawakuyänampaq y nunakuna alli trabajador y honrädu kayänampaqmi pëkunaqa yanapakuyan’ (The Deseret News, de Salt Lake City, Utah, Estädus Unïdus). Jina nirqanmi: ‘Testïgukunaqa alläpa allim portakuyan. Cigärruta shoqï (shoquy), borrachë, qellëpaq pukllë, jukwan jukwan punukï y ollqu pura o warmi pura punukïqa, Dioswan alli këninkunata ushakätsinqantam creiyan’.

¿Imanötaq Testïgukunata yanapashqa Dios imanö kanqanta reqiyanqan? Silviam kënö nin: “Salud asuntuchö suwakï y ulikïqa (llullakuyqa) fäcil-llam. Tsëmanqa rasllam pipis ishkirinman. Peru tsëkunata Jehovä * imanö rikanqanta musyanqämi yanapamashqa tsëman mana ishkinäpaq. Kikïwan yamë y kushishqa këkanqätam nita puëdï”. Silviaqa segürum këkan creikunqankuna alli kawanampaq yanapashqa kanqanta.