“Tsë gobiernukunapa tiempunchömi, ciëluchö këkaq Dios, mana ushakaq gobiernuta churanqa. Tsë gobiernupa rantinqa mananam jukqa yëkunqanatsu. Y chipyëmi ushakätsinqa tsë llapan gobiernukunata, y kikinllanam imëyaqpis kanqa.” (Daniel 2:44.)

Diospa Gobiernunqa ciëluchömi këkan y Jesucristum mandakoqninqa. Pëmi, kë Patsachö llapan mandakoqkunapa rantin mandakunqa y Diospa munënin ciëluchö rurakanqannölla kë Patsachöpis rurakänampaqmi yanapakunqa (Mateu 6:9, 10). Tsë Gobiernupa rantinqa mananam nunapa gobiernun yëkunqanatsu, tsëmi Jesucristupa ‘mandaquininchoqa imecamayaqpis cawakushun’. Yamë kawakïqa segürum kanqa (2 Pëdru 1:11).

“Diablupis shumaq anjelmanmi ticrarin. Tsemi diablupa sirweqnincunapis, mana alli ruraq quecar, alli tucur puriyan. ¡Peru juc junaqmi rurenincunamanno castigashqa cayanqa!” (2 Corintius 11:14, 15.)

Mana alli religionkuna Diablupa kayanqanmi musyakärinqa. Y religionrëkur chikinakï y wanutsinakïkunapis entëru Patsachömi ushakanqa. Tsënöpam, ‘rasonpa cawaq Diosta’ kuyaqkunaqa, ‘marcäquiwan’, “espïrituwan y rasumpa kaqwan” adorayanqa. Awmi, ¡yamë y juknölla kawakïmi kanqa! (1 Tesalonicensis 1:9; Efesius 4:5; Juan 4:23, NM.)

“Pellatam llapan nunacuna sirwiyanqa, y pellam Diosnincunapis canqa. Cananqa mananam waqayanqanatsu ni llaquiyanqanatsu, mananam imancunapis nananqanatsu, ni wanuyanqanatsu. Porqui tse sufrimientucunaqa ushacärishqanam.” (Apocalipsis 21:3, 4.)

Jehoväqa këta ruramunqa Jesus noqantsikpaq wanunqanrëkurmi (Juan 3:16). Jesucristupa yanapakïninwanmi  nunakunaqa jutsannaqna tikrariyanqa. Sufrimientukunaqa manam kanqanatsu, porqui Jehovällam ‘Diosnincuna canqa’, tsëmi “waqayanqanatsu”. Ichikllachönam jutsa y sufrimientukuna ushakanqa. Y “Patsachöqa alli nunakunallam täräyanqa, y tsëchömi imëkamayaqpis kawayanqa” (Salmu 37:29).

‘Jesucristum mantsanepaq culebrata tsarircamorqan. Tse culebraqa unepita engañacoq Diablum y Satanasmi. Petam tse anjel waranqa (1,000) watayaq cadenawan cadenarcorqan. Tseno cadenarcurmi, wanwanyarëcaq uchkuman jitarcur llawirerqan; y puncuntanam alli buenu segurarcorqan, asta waranqa watayaq jinantin nasioncho nunacunata manana engañananpaq.’ (Apocalipsis 20:2, 3.)

Diabluqa mananam engañamënintsikta puëdinqanatsu, y demoniukunatanam cadenarkur ‘wanwanyarëcaq uchkuman’ jitarkuyanqa, tsëchöqa manam imatapis rurëta puëdiyanqanatsu. Manam munayanqanmannöqa nunakunata dominayanqanatsu. ¡Satanaswan mana alli espïritukuna manana kanqan Patsachö kawakïqa, alläpa shumaqmi kanqa!

Ushanan junaqkunaqa ushanqa “jatun sufrimientu” kanqan witsankunam. Jesusmi kënö nirqan: “Porqui jatun sufrimientum kanqa mana imëpis kashqannö; mundu qallanampita hasta kananyaq manam tsënöqa kashqaraqtsu, y manam ni yapëqa tsënö kanqanatsu” (Mateu 24:21, NM).

Sufrimientuqa jatunmi kanqa nirqa, mana imëpis rikanqantsikkuna kanampaq kaqtam rikätsikïkan, tsëmi “Llapan Kallpayoq Diosnintsikpa jatun guerranman” chätsikunqa, tsë guërrataqa Armagedon nirpis reqiyanmi (Apocalipsis 16:14, 16, NM).

Alli rurëta kuyaqkunaqa, kë Patsachö mana allikuna ushakänantam alläpa munëkuyan. Wakinllata rikärishun Diospa Gobiernunchö ima bendicionkuna kanampaq kaqta.

“Mana yupetapis puedipaq” nunakunam, juk mushoq patsachö yamë kawakuyanqa: Diospa Palabranmi nimantsik, “mana yupetapis puedipaq” nunakuna ‘jatun sufrimientuta’ kawëkar pasarnin, juk alli y mushoq Patsachö kawakuyänampaq kaqta (Apocalipsis 7:9, 10; 7:14, NM; 2 Pëdru 3:13). Salvakoqkunaqa, Jesucristu ‘Diospa achcasnin nunacunapa jutsancunarecur wanonqampitam’ agradecikuyanqa (Juan 1:29).

Diospa yachatsikïninqa allikunatam apamunqa: Mushoq Patsachöqa, “llapan nunakuna[m] Jehoväta chipyëpa reqiyanqa” (Isaïas 11:9). Diospa yachatsikïninqa yanapamäshun kamanqankunawan y nunakunawan shumaq kawanapaqmi. Diosmi këta awnimantsik: “Noqam Jehovä Diosniki kä, kikikipa biennikipaq yachatsishoqniki, y alli nänipa ëwanëkipaq Pushashoqniki” (Isaïas 48:17).

Kuyashqa kastantsikkunam kawariyämunqa: Patsachö këkarninmi Jesusqa amïgun Läzaruta kawaritsimurqan (Juan 11:1, 5, 38-44). Tsëmi rikätsikun Diospa Gobiernunchö mandakoq karnin imata ruramunampaq kaqta (Juan 5:28, 29).

Yamë kawakï y alli rurëkunam imëyaqpis kanqa: Jesucristupa gobiernunchöqa mananam mana alli rurë kanqanatsu. Shonquta rikëta puëdirninmi, Jesusqa pï alli y mana alli kanqanta musyanqa. Lluta rurëninkunata mana jaqita munaqkunaqa manam mushoq Patsachö kawëta puëdiyanqatsu (Salmu 37:9, 10; Isaïas 11:3, 4; 65:20; Mateu 9:4).

Kë yachatsikïchöqa alli kawakïman chätsikoq wakin kaq profecïakunallatam rikarquntsik. Diospa Gobiernun Patsata mandakamuptinqa, ‘alläpa alli kawakïmi’ imëpis kanqa (Salmu 37:11, 29). Y nunakunata llakitseq llapan sufrimientukunam ushakanqa. Diosmi Palabranchö këta awnimantsik: ‘Cananqa llapantapis mushoqmannam tumaratsishaq’ y “que nenqäcunataqa llapantam cumplishaq; porqui noqaqa manam ulicütsu” (Apocalipsis 21:5).