Juk teytam qanchis watayoq wamranta kënö nin: “Mëtsika watakunapanam, Diosqa Patsata y tsëchö llapan kaqkunata kamashqa. Jina kamashqam Intita, Killata y qoyllurkunatapis”. Wamraqa pensëkarmi quedarin, nïkurnam kënö tapurin: “Papä... ¿pitaq Diostaqa rurarqan?”.

Papäninnam contestan, “manam pipis pëtaqa rurashqatsu. Diosqa imëpis kawëkashqallam” nir. Kananqa tsënö contestarinqan wamrata kushishqatam jaqirin. Tsënö kaptimpis, winanqanmannömi papäninta tapunqampita musyëta munëkanlla. Manam creita puëdintsu pipis imëtapis kawanqantaqa. “¿Imanötaq tsëqa? Ciëluwan Patsapis kamakashqa këkaptinqa” nirmi pensan. ¿Mëpitataq Dios shamurqan? neq tapukïpaqa respuestan manaran kanraqtsu.

¿Imatataq Bibliaqa yachatsikun? Teyta wamranta contestanqannöllam. Moisesmi Jehoväta kënö nirqan: “Jirkakunapis manaraq kaptin, o warmi imëka qeshpikoqnö kë patsata manaraq kamanqëkipita patsëmi, imëpita y imëyaqpis qamlla Dios kanki” (Salmu 90:1, 2). Profëta Isaïaspis kënömi nirqan: “¿Manaku musyanki o wiyashqa kanki Jehoväpita? Entëru patsata kamaqqa, imëkamayaqpis kawaq Diosmi” (Isaïas 40:28). Judaspa cartampis rikätsukunmi Diosqa imëpis y “imecamayaqpis” kawaq kanqanta (Judas 25).

Kë versïculukunaqa rikätsikun Dios “Imëkamayaqpis Mandakoq” kanqantam, apostul Pablu ninqannö (1 Timoteu 1:17, NM). Juk parlakïchöqa, imëpis këkashqallam, mëtsika watakuna pasashqa kaptimpis (Apocalipsis 1:8). Diospaqa manam qallanan ni ushanan kantsu, tsëmi juk precisaq imanö kënimpita.

¿Imanirtaq këta crei sasaraq noqantsikpaq? Porqui noqantsikqa kawantsik wallka tiempullam, tsëmi Jehoväwan igualtsu tiemputa rikantsik. Tantiyarinapaq, Jehoväpaqqa juk junaqllam waranqa watanö, imëpis kawashqa kaptin (2 Pëdru 3:8). Kë igualatsikïta rikärishun. Poqushqa pinteq kuruqa kawan pitsqa chunka junaqllam. ¿Entiendinmantsuraq 70 o 80 watakuna kawanqantsikta? ¡Manachi! Dioswan igualatsikushqaqa noqantsikpis tsë pinteq kurunöllam kantsik. Pensënintsikqa ichikllanllam, peru pëpa pensëninqa mas jatunmi (Isaïas 40:22; 55:8, 9). Tsëmi Dios imanö kanqantaqa llapanta entiendita puëdintsiktsu.

Dios imëyaq kawanqanta entiendita mana puëdirpis, tsënö kanqantam rikantsik. Pipis Diosta kamashqa kaptinqa, tsë nunachi Kamakoq kanman. Peru Bibliaqa willakun “llapan imecatapis” Jehovälla ruranqantam (Apocalipsis 4:11). Jinamampis, musyantsikmi juk tiempuchöqa ciëlupis y Patsapis mana kanqanta (Genesis 1:1, 2). ¿Imanötaq yurirqan? Tsëpaqqa Kamaqninqa këkarqannachi. Jina manaraq japallan Tsurin y angelkuna kaptinchi këkarqanna (Job 38:4, 7; Colosensis 1:15). Clärum këkan manaraq imatapis kamarninqa, Dios japallanlla këkanqanta. Pëtaqa manachi kamayarqantsu, porqui pëpita masqa manam pipis ni imapis karqantsu.

Kawënintsik y ciëluwan Patsa kanqanmi rikätsikun juk imëkamayaqpis kawaq Dios kanqanta. Pëmi ciëlutawan Patsata kamarqan y patsätsirqan leykunata llapampis alli kanampaq, tsëpaqqa imëpis kawëkarqanchi. Pëllam llapan kawaq kaqkunata kawënin qorqan (Job 33:4).