Hungrïa nacionpa Székesfehérvár nishqan markachömi yurikurqä. Peru llakikïpaqqa Ishkë kaq Jatun Guërrachö pasakunqanta qonqëta mana puëdinqämi.

Awilükunawanmi winarqä, pëkunataqa alläpam yarparä, y masqa awilïta Elïsabethtam. Pëmi Diosman creinäpaq yachatsimarqan. Kima watayoq kanqäpita patsëmi Padrenuestru resakïta cada paqas yachatsimaq. Tsënö kaptimpis, manaraq 30 watäta cumplirmi ima ninan kanqanta musyarirqä.

Awilükunaqa wamra kanqäpita patsëmi wätayämarqan y teytäkunaqa paqasta junaqtam trabajar kakuyarqan juk shumaq wayïkuna rantiyänanrëkur. Tsënö kaptimpis, cada ishkë semänatayanmi llapan familiäkuna juntakäyaq mikuyänäpaq. Tsë witsantaqa alläpa kuyëpam yarparä.

1958 watachömi teytäkuna munayanqanqa cumplikärirqan, munayanqan wayitam rantiriyarqan. ¡Kananqa pëkunawan juntum kawakïta puëdirqä! Peru tsë kushikïnïqa ichikllam karirqan, porqui joqta killa pasarinqanllachömi teytäqa cancerwan wanurirqan.

Alläpa llakishqam quedarirqä. Y Diosta kënö ninqätam yarpä: “Papänïta salvëkunëkipaqtaq mañakurqaq. ¡Alläpam pëtaqa wanä! ¿Imanirtaq mañakunqaqta wiyamarqëkitsu?”. Pasëpam musyëta munëkurqä teytä mëchö këkanqanta. Tsëmi kënö tapukurqä: “¿Ciëlutatsuraq ëwakushqa o mëchöraq këkan?”. Teytayoq wamrakunataqa chikipaqmi kä.

Atska watakunapam cäsi cada junaq pantionta ëwaq kä. Papänï pamparanqanman qonqurïkurmi kënö mañakoq kä: “Diosllä, teytä mëchö këkanqantam musyëta munä”. Jina mañakurqämi imapaq kamamashqantsikta entiendïkatsimänampaqpis.

13 watayoq këkarnam, aleman idiömata yachakunäpaq churakarqä, tsë idiöma librunkunachö llapan tapukïnïkunapa respuestanta tarinärëkur. Y 1967 watapaqnam, Jëna nishqan  markata estudiaq ëwakurqä, tsëqa unë witsan Alemania orientalchömi karqan. Tsëchö filösofukunapa librunkunatam cäsi llapanta leyirqä, y masqa leyirqä nuna imanir kawanqan kaq willakïkunatam. Tsë libruchö yachatsikïkuna allinö kaptimpis, tapukïnïkunapa respuestantaqa manam ni mëqanchö tarirqätsu. Tsëmi tapukïnïkunapa respuestanta tarinäpaq Diosta mañakïkarqälla.

1970 watapaqnam Hungrïa nacionta kutirirqä, y tsëchömi warmï kanampaq kaq Roseta reqirirqä. Tsë witsampaqqa Hungrïa nacionqa alläpa mana alli gobiernuwanmi këkarqan, tsëmi casakuriyanqäpita ichik tiempulla Austria nacionpa qeshpir ëwakuyarqä. Tsëmanqa ëwayarqä tsëpita Australiaman chayänärëkur y tsëpitana Sydneyman, porqui tsëchöqa tiümi tärarqan.

Ichik tiempu pasariptinllam, Australiachöqa trabäjuta taririrqä. Juk kutim, trabajaq mayï nimarqan Bibliachö llapan tapukïnïkunapa respuestanta tarinäpaq kaqta, y tsëpaq yachatsikoq ishkë librukunatam qaramarqan. Rasllam llapanta leyirirqä, peru mastam yachakïta munarqä, tsëmi tsë libruta qellqamoq Testïgukunaman cartakurirqä y mas publicacionkunatam mañakurirqä.

Casakuyanqäpita juk watata cumpliriyanqä junaqmi, juk Testïgu watukayämarqan. Mañakunqä publicacionkunatam apamurqan y Bibliapita yachatsimänampaqmi änimarqan. Tsë höram änirirqä. Alläpam yachakïta munarqä, tsëmi semänachö ishkë kuti yachakoq kä, y cada yachakuyanqäqa chusku höram duraq.

Alläpam kushikurqä Testïgukuna Bibliawan yachatsiyämanqampita. Ungaru idiöma Bibliächö Diospa jutinta rikäratsiyämaptinqa manam creirirqätsu, 27 watapam misaman ëwashqa karqä, peru manam ni imë wiyashqatsu karqä Diospa jutin Jehovä kanqantaqa. Alläpam gustamarqan Bibliawan cläru yachatsiyämanqan. Juk yachakunqäqa karqan, wanushqakuna ni imata mana mäkuyanqantam, imëka punïkaq cuenta këkäyanqanta (Eclesiastes 9:5, 10; Juan 11:11-15). Jina musyarirqämi Dios änikunqan mushoq Patsachöqa wanï manana kanampaq kaqta (Apocalipsis 21:3, 4). Kananqa paqwëmi markäkö wanushqakunata “Teyta Dios cawaritsinanpaq caqta” y teytäwan tinkunäpaq kaqta (Hëchus 24:15).

Rose warmïmi tukïnöpa yanapamarqan. Ishkë killallachömi yachakuyänäpaq kaq publicacionta yachakur ushariyarqä y tsënöpam Diospa kaqta mas yachakuyarqä. Y Testïgukunapa llapan reunionninkunamanmi ëwar qallëkuyarqä y alläpa kuyakoq, shumaq chaskikoq y juk familianölla kayanqanmi alläpa gustayämarqan (Juan 13:34, 35).

1976 watachönam Australia nacionta ëwakuyänäpaq permïsuyämarqan. Chärirllam Testïgukunata ashir qallëkuyarqä, pëkunaqa imëka kastäkuna cuentam chaskirayämarqan. Y 1978 watachömi Jehoväpa testïgun kayänäpaq bautisakuyarqä.

Tapukïnïkunapa respuestantam tarirqö, y alläpa kuyakoq Teyta Jehovätapis (Santiägu 4:8). Y Jehovä änikunqan Patsachö teytäwan tarinakuyanäpaq shuyäkïnïmi kananqa kapaman (Juan 5:28, 29).

Y 1989 watachönam, Hungrïata kutikuyarqä familiäkunata, amïgökunata y wakin nunakunata Jehoväpita yachatsiyänäpaq. Mëtsikaqtam Diospita parlapäyashqä. Y joqta chunkam Jehoväpa testïgun këman chäyashqa y jukqa kuyashqa mamänïmi.

17 watapam tapukïnïkunapa respuestanta Dios contestamänampaq mañakurqä, 39 watanam pasarishqa pë contestamanqampitaqa. Kanampis mañakïkällam, peru kënönam mañakö: “Gracias kuyashqa teytallä Jehovä, jövin kënïchö llapan tapukïnïkunapa respuestanta musyatsimanqëkipita”.