Los Angeles nishqan markapitam karqä (California, Estädus Unïdus), y täranqä sitiukunaqa reqishqa karqan drögakunata alläpa rantikuyanqampita y pandillërukuna kanqampitam. Teytäpa segundu kaq tsurinmi karqä.

Wamra kanqä witsanqa, evangëlicu iglesiamanmi mamänï apayämaq. Peru jövinyärirqa, tsëchö yachakunqäta manam cuentapaq churaqtsu kä. Domingupaqa tsë iglesiapa grüpunchömi cantaq kä, peru wakin junaqkunaqa, fiestakunamanmi ëwakoq kä, drogakoq kä y jukwan jukwanmi pununakoq kä.

Imatapis nirayämaptinqa rasllam piñakoq kä. Pelyata gananärëkurqa imëkatapis armatanömi utilizaq kä. Iglesiachö yachakunqäqa manam imachöpis yanapamarqantsu. Antis kënömi neq kä: “Vengakïqa Señorpam y tsëpaqmi noqata utilizäman”. Cäsi 1970 wata qallanan witsankuna 18 watayoqnö këkaptïmi, Panteras Negras nishqan grüpu ruranqan gustar qallëkamarqan, pëkunaqa llapankunapaq igualdä kanampaqmi marchakunata rurar maqakur puriyaq. Tsënölla ruraq juk grüpumanmi tsëpitaqa yëkurirqä. Atska kutim marchakunata rurayarqä, tsërëkurmi escuëlachö cläsikunapis karqantsu.

Peru mastaran rurëta munarqä. Ichik tiempullachömi chikikïnï alläpa mana alli rurëkunaman chätsimarqan. Tantiyarinapaq, Estädus Unïduschö Africapita esclävukunata mana alli tratayanqan pelïcula rikaqmi cïnita ëwayaq kayä. Tsënö tratayanqampita alläpa piñakurmi, cïnichö këkaq yulaq jövinkunata maqayaq kayä, jina yulaqkuna täräyanqan sitiukunamampis ëwayaqmi kayä maqayänäpaq.

Tsë witsampaqqa mana alli rurënïkunapita y autoridäkunata mana wiyakuyanqäpitam wawqïkunapa y noqapapis atska denunciäkuna karqan. Mana alli reqishqa grüpuchömi menor kaq wawqïqa karqan y pëkunawanmi pureq kä. Kawënïqa mas mana allimanmi chäkïkarqan.

Juk amïgüpa teytankunam Testïgu kayarqan, y pëkunam reunionninkunaman invitayämarqan. Punta ëwanqällachömi cuentata qokurirqä jukläya kayanqanta. Llapampam Bibliankuna  kayäpoq y utilizäyaqmi. ¡Hasta mas jövinkaqkunapis ichik discursukunatam rurayaq! Espantakurqämi Diospa jutin Jehovä kanqanta musyarir y jutinta utilizäyaqta wiyar (Salmu 83:18). Tukïläya nacionpita karnimpis, juk color o juk kasta këkar mana chikinakuyanqanqa clärum rikäkurqan.

Reunionkunaman ëwëqa gustamaqmi, peru manam Bibliapita yachatsiyämänantaqa munarqätsu. Juk ampim, reunionchö kanqäyaq, cantantikuna presentakäyanqanman wakin amïgükuna ëwayarqan y cuëru casäcanta qochiyänanrëkurmi juk jövinta maqar wanïkatsiyarqan. Waräninqa alabakur-ran puriyarqan. Y juiciuchöpis manam penqakuyaqtsu. Y cäsi llapantam condenayarqan wanuyanqanyaq carcelaräyänampaq. ¡Alläpam kushikurqä pëkunawan tsëman mana ëwanqäpita! Tsëmi Bibliata estudiar qallanäpaq y kawënïta cambianäpaq decidirqä.

Juk color nunakunata chikirninmi, Testïgukuna imanö tratanakuyanqanta rikarnin espantakurqä. Tantiyarinapaq, yulaq kasta Jehoväpa testïgunmi juk nacionta viajanan kaptin, yana kasta familia Testïgukunata wamrankunata cuidayäpunampaq jaqiyarqan. Jina yulaq kasta Testïgu familiam juk waktsa yana wamrata wätayänampaq ëllukurkuyarqan. Tsënömi Testïgukunaqa rikätsikuyarqan Juan 13:35 textuchö Jesus kënö ninqanta: ‘Jucniqui jucniqui cuyanacuyanqui, tsënöpam llapan nunacuna musyariyanqa disipulücuna cayanqequita’. ¡Rasumpa kaq cristiänukunatam taririrqä!

Bibliapita yachakunqämannömi cuentata qokurirqä imanö kënïta cambianä kaqta. Alläpa piñakoq y maqakoq mana kanäpaqmi shonqupita patsë kallpachakunä karqan (Romänus 12:2). Ichikllapa ichikllapam cambiarqä, y 1974 wata enëru killam Jehoväpa testïgunnö bautizakurirqä.

Bautizäduna këkarpis geniütaqa dominanäran karqan. Juk junaqmi wayin wayin yachatsikïkäyarqä, y cärrüpa radiunta juk ladrun suwëkaqta rikëkurmi, qepanta taripaq ëwëkurqä. Tsarinäpaq këkaptïnam, radiüta patsaman jitarïkur ëwakurqan. Ladrunpita radiüta imanö salvanqäta cristiänu mayïkunata willaptïmi, atska watapana Jehoväta sirweq juk wawqi kënö nimarqan: “¿Imataraq rurankiman karqan ladronta tsarïkurqa?”. Tsënö tapuramaptinmi, cuentata qokurirqä unë geniüta chipyëpa manaraq jaqinqäta.

1974 wata octubri killam llapan tiempüwan yachatsikur qallëkurqä. Nunakunata Bibliapita yachatsirmi killachö cäsi 100 höranö yachatsikoq kä. Tsëpitanam Brooklyn (Nueva York) markachö Jehoväpa testïgunkunapa principal oficïnanchö yanapakunapaq invitarayämarqan. 1978 watanam, Los Angeles markata kutirqä mamänï qeshyaptin. Ishkë wata pasariptinnam Aarhonda paniwan casakurirqä. Pëqa alläpam yanapamarqan mamänïta wanunqanyaq cuidarnin. Tsëpitanam Watchtowerpa Galaad Escuëlaman invitarayämarqan, cläsikuna ushariptinnam Panamä nacionchö misionërunö sirwiyänäpaq invitarayämarqan, y tsëchömi kananyaq sirwikäyä.

Bautizakurirpis geniüta dominëqa sasaran kashqa. Ima pelya kaptimpis rasllam witikuri o tranquïlulla kayänampaqmi yanapakö. Mëtsikaqmi felicitäyämashqa geniüta dominëta yachakunqäpita, hasta warmïpis, y tsënö cambianqäpitaqa espantakümi. Cambianqäqa manam kikïllapitatsu kashqa, sinöqa Diospa Palabranta yachakunqämi yanapamashqa (Hebrëus 4:12).

Bibliam yanapamashqa alli y yamë pasakïchö kawakunäpaq. Kananqa manam pitapis maqänatsu, sinöqa nunakunatam yanapä Diosta reqiyänampaq. Hasta juk unë chikinakuyanqä estudiaq mayïtam yachatsirqö. Bautizakuriptinqa juk tiempupam tsë wayillachö täräyarqä y kananyaqpis alli amïgullam kayä. Kananyaqqa warmïwan noqaqa 80 nunakunapitapis mastam yanapayarqö Jehoväpa testïgun kayänampaq.

Alli cristiänukunawan kushishqa kawakunäpaq Jehovä yanapamanqampitaqa alläpam agradecikü.