Guatemäla nacionpa Acul karu markanchömi yurikurqä. Familiäqa, mäyapita ixiles nishqan kastapitam. Españolta yacharpis, kastäkuna parlayanqan idiömatapis yachakurqämi. Nacionnïchöqa 36 watapam guërra karqan, y tsë witsanmi winarqä. Tsëchöqa ixiles kastakunam mëtsikaq wanuyarqan.

Chusku watayoq këkaptïmi, qanchis watayoq wawqïqa granäda bombawan pukllëkarqan y makinchömi pashtëkurqan, pëqa wanurirqanmi y noqaqa wiskum quedarirqä. Tsëpita patsëmi Guatemäla nacionchö wiskukunata cuidayänan wayichö tärarqä, y tsëchömi brailli nishqanchö qellqashqata leyita yachakurqä. Manam entiendirqätsu cuidayämaqnïkuna wakin wamrakunawan juntakunäta imanir michäyämanqanta, y wamra mayïkuna imanir mana witipäyämanqanta. Imëpis japallällam kakoq kä, ishkë killapa permïsü qoyämaptin wayïchö mamänïwan juntu këtaqa alläpam shuyëkoq kä, pëqa alläpam kuyamaq. Peru 10 watayoq këkaptïmi wanukïkurqan. Alläpam llakikurqä, porqui pëllam kuyamaqnïqa karqan.

11 watayoq këkarmi, teytallapita wawqïwan y familianwan täraq ëwakurqä. Wananqäkunachöqa yanapayämarqanmi, peru llakikïnïchöqa manam ni pï yanapamëta puëdirqantsu. Höraqa waqarmi Diosta culpar kënö neq kä: “¿Imanirtaq mamänï wanushqa? ¿Imanirtaq wiskuyarqö?”. Tsënö desgraciakunapa pasanqäqa Diospa voluntänin kanqantam niyämaq. Tsëmi, alläpa chiki y castigakoq kanqanta Diospaqqa pensaq kä. Puëdirninqa wanutsikïkümanmi karqan.

Wisku quedakunqäqa paqwë mana defendikï yachaqtam jaqiramarqan. Wamra këkaptïmi atska kuti violayämarqan, pipis mana yanapamänampaq kaqta pensarmi ni imë denunciarqätsu. Manam ni pï parlapämaqllatsu. Llakishqallam sientikoq kä, y pimampis mana markäkurmi, ni piwan juntakoqtsu kä.

13 watayoq këkaptïmi, Jehoväpa testïgunkuna escuëläpa recrëun höra Bibliapita parlapäyämarqan. Llakipämarnïmi  juk profesöra, pëkuna watukayämänampaq mañakushqa kanaq. Wiskukuna rikäyänampaq y wanushqakuna kawariyämunampaq kaqta Biblia änikunqantam Testïgukunaqa niyämarqan (Isaïas 35:5; Juan 5:28, 29). Pëkunata wiyëqa gustamaqmi, peru mana parlapäkoq karmi, upällalla kakoq kä. Tsënö kaptïpis, pëkunaqa kuyakïninkunata y pasenciankunatam rikätsiyämarqan y Bibliapita yachatsiyämänampaqmi watukayämarqan. Y tsëpaqqa 10 kilömetrutam chakipa y jirkapa shayämoq.

Wawqïqa willamarqan Testïgukunaqa waktsalla kayanqanta peru shumaq vistishqa kayanqantam. Imallatapis regälü apayämunqanmi, kuyayämanqanta rikätsikoq. Tsëmi rikätsimarqan, rasumpa kaq cristiänukunalla tsënö sacrificiuta rurayanqanta.

Bibliapitam yachakur qallëkurqä braillichö qellqashqa publicacionkunawan y alleqmi entiendeq kä, peru wakin yachatsikïman creiqa manam fäciltsu karqan. Tantiyarinapaq, Dios kuyamanqanta y wakin nunakunapis pënölla kuyayämanqanta. Entiendirqämi mana allikuna pasananta Dios imanir permitinqanta, peru kuyakoq teytatanö rikëqa manam fäciltsu karqan. *

Bibliata yachakunqämannömi pensënï cambiarirqan. Tantiyarinapaq, sufrinqantsikta Dios rikar alläpa llakikunqantam entiendirirqä. Sirweqninkunapaqmi Diosqa kënö nin: “Markäpa llakikïnintam rikarqö [...;] allim musyä nanatsikur imanö sufrikäyanqanta” (Exodu 3:7). Jehovä alläpa kuyakoq kanqanta entiendirirmi, munanqanta ruranäpaq y pëllapaqna kawanäpaq decidirirqä. Y 1998 watachömi Testïgu kanapaq bautizakurirqä.

Bautizakurinqäpita watanö pasariptinmi, wiskukunapaq cläsiman ëwarqä Escuintla markata. Y tsë markachö juk cristiänum musyarirqan noqapaqqa Acul nishqan markayaq reunionkunaman ëwëqa alläpa sasa kanqanta, porqui jirkaparan ëwanä karqan. Yanapamänanrëkurmi tsë wawqiqa amänullachö juk Testïgu familiata ashirqan wayinchö quedakunäpaq y reunionkunaman ëwar yanapayämänampaq. Kanankamayaqpis familiantanömi cuidayäman.

Kë cristiänu mayïkunapa kuyakïninkunapitaqa mëtsikatam willayaqman. Kananqa rasumpa kaq religionchömi këkä (Juan 13:34, 35).

Kananqa mananam, mana sirweqnöqa sientikünatsu, musyämi imapaq kawanqäta. Wisku kanqäman yarparäkunapa rantinmi, kananqa llapan tiempüwan Bibliapita yachatsikurnin ocupädu kakü. Y juk congregacionpa pushaqninmi kä y amänuchö këkaq congregacionkunachöpis discursutam rurä. Jina alläpam agradecikü waranqëpayan ëwayanqan reunionkunachö discursukunata ruranqäpitapis.

2010 watam, El Salvador nacionta ëwarqä Soltërukuna Bibliapita Yachakuyänampaq Escuëlaman (kananqa, “Diospa Gobiernumpita Yachatsikoqkunapaq Escuëlam”). Tsëmi yanapamashqa cristiänu mayïkunata mas yanapanäpaq. Jina rikätsimashqam alläpa väleq y Jehoväpaq alläpa kuyashqa kanqäta, pëqa pï mëpis pëpa munëninta rurayänantam permitin.

Jesusqa kënömi nirqan: “Qaraquimi mas cushiqueqa chasquir cushiquipitapis” (Hëchus 20:35). Kananqa alläpa kushishqa nunam kä, tsënö kanäpaq kaqtaqa manam pensarqätsu, kananqa yanapakïta puëdinqätam sientï.