Pensari tsëllaraq juk nacionman chärinqëkita. Tsëchöqa nunakuna, costumbrikuna, mikïkuna y qellëpis reqinqëkipita alläpa jukläya kanqantam cuentata qokurinki, tsëqa llakishqa y pantakashqachi sientikunkiman.

Jina, tsënöllam pasakunman Bibliata leyir qallaptikipis. Mana reqinqëki unë nunakunapaq willakïtam tarinki. Atska markakunatam reqinki, filisteukuna nishqantanö y mushoq costumbrikunatam, llakikur röpankunata rachiyanqantam yachakunki. Jina, manä nishqan mikïpaq y dracma nishqan qellëpaqpis leyinkim (Exodu 16:31; Josuë 13:2; 2 Samuel 3:31; Lücas 15:9). Itsa tsëqa pantakashqatanö sientitsishunkiman. Juk nacionchö këkarqa, pillapis yanapashuptikiqa agradecikunkimanchi. Tsëqa, ¿manatsuraq pillapis Bibliata entiendinëkipaq yanapashunëkita munankiman?

Manaraq Jesus shamuptin 1500 watakuna Bibliata qellqar qallayanqampita patsëmi, nunakuna entiendiyänampaq yanapakï kashqa. Tantiyarinapaq, Israelpa punta kaq pushaqnin Moisesmi entienditsikurqan tsë tiempuchö qellqashqana kaqkunata (Deuteronomiu 1:5).

Juk waranqa watakuna pasarinqanchöpis, karqanraqmi Bibliapita yachatsikoqkuna. 455 wata J.m.sh.. atskaq judïukuna wamrankunawan Jerusalen pläzata ëwayarqan. Bibliapita yachatsikoqkunaqa “Diospa leynin ninqantam sinchipa leyir sïguiyarqan, y ima ninan kanqantam tantiyatsikuyarqan, y leyiyanqanta shumaq käyiyänampaqmi yanapar sïguiyarqan” (Nehemïas 8:1-8).

Y 500 watakunanö pasarishqanchönam, kikin Jesucristupis tsënölla yachatsikurqan. Tsëmi, nunakunaqa maestru nishpa masqa reqiyaq (Juan 13:13). Cada ünuta y atskaq ëllukashqa nunakunatapis, yachatsirqanmi. Juk kutichömi Jirkapita Yachatsikunqanchö mëtsikaq nunakunata parlaparqan. Nunakunaqa “allapa espantacur mantsacäcuyarqan tse yachatsiquininpita” (Mateu 5:1, 2; 7:28). 33 watachönam, Jesusqa Jerusalenpita Emaus markaman ëwëkaq ishkë discïpulunkunata, ‘Diospa palabranta willapar cäyitsirqan’, tsë ima ninan kanqantam alleq entienditsirqan (Lücas 24:13-15, 27, 32).

Jesucristupa qateqninkunapis Diospa Palabrantam yachatsikuyarqan. Juk kutim, Etiopïa nacionchö gobiernupaq trabajaq nuna, Diospa Palabranta leyikarqan. Tsënam discïpulu Felïpi witïkur kënö tapurqan: “¿Tse leyenqequita cäyinquicu?” nir. Tsë nunanam kënö contestarqan: “¿Imanoparaq cäyishaq, pipis mana cäyicatsimaptin?” Tsënam Felïpiqa shumaq entienditsirqan (Hëchus 8:27-35).

Unë tiempuchö Diospa Palabrampita yachatsikoqkuna kayanqannöllam, kanampis 239 nacionkunachö y markakunachö Jehoväpa testïgunkunaqa yachatsikïkäyan (Mateu 28:19, 20). Cada semänam 9 millonpitapis mas nunakunata, Biblia imata yachatsikunqanta entiendiyänampaq yanapëkäyan. Tsë nunakunapitaqa mëtsikaqmi Cristuman mana creeq costumbriyoq kayan. Tsë yachatsikïqa debaldillam, wayikichö o më sitiuchöpis puëdinkim yachakïta, jina telëfunupa o internetpapis yachakunkimanmi.

Yachakïta munarqa Jehoväpa testïgunkunawan parlari. Biblia entiendinan fäcil-lla kanqantam rikärinki. Bibliaqa “allim yachatsicunantsicpaq, mana allita rurayaptin willapänantsicpaq, piñapänantsicpaq y allicunallatana ruranantsicpaqpis. Tse palabrata wiyacurmi, Teyta Diospa wamrancunaqa listuna quecayanqa allicunallatana rurayänanpaq” (2 Timoteu 3:16, 17).