Éxodo 16:1-36
16 Chai qꞌuipaca tucui israelitacunaca Elimmantami rircacuna. Tiempohuanca Elimhuan, Sinaihuan* chaupipi saquirij Sin nishca chaquishca pambamanmi chayarcacuna. Paicunaca Egipto llajtamanta llujshishca ishqui quillapaj 15 punllapimi chayarcacuna.
2 Chai chaquishca pambapimi tucui israelitacunaca Moisesmanta, Aaronmanta quejari callarircacuna.
3 Israelitacunaca paicunataca: “¡Egipto llajtapi Jehová Diospaj maquipi huañunami alli canman carca! Chaipica mangacuna junda aichata micungapajmi tiyarij carcanchij. Tandatapish huijsa jundatami micuj carcanchij. Pero cancunaca cai chaquishca pambapi tucuicuna yaricaihuan huañuchunmi pushamushcanguichij” nircacunami.
4 Chaimi Jehová Diosca Moisestaca cashna nirca: “Jahua cielomantami tamyata shina tandata cachagrini. Chaimi tucuicuna canllaman llujshishpa paicuna minishtishcata cada punlla japina can. Ñucaca paicuna ñuca leyta cazujta o mana cazujta ricungapajmi pruebapi churasha.
5 Pero sexto punllapica ishqui punllapaj tandashcatami preparana can” nircami.
6 Chai qꞌuipaca Moisespish, Aaronpish tucui israelitacunatami cashna nircacuna: “Egipto llajtamanta Jehová Dios cancunata llujshichishcataca chishi ladomi yachaj chayanguichij.
7 Cayandij tutamantaca Jehová Dios cancuna quejarishcata uyashcamantami Jehová Diospaj jatun poderta ricunguichij. ¿Ñucanchijmanta cancuna quejarichunca ñucanchijca pitaj canchijyari?” nircacunami.
8 Moisesca cashnapishmi nirca: “Jehová Diosca huijsa pajtata micuchunmi cancunamanca chishi ladoca aichata, tutamanta ladoca tandata cunga. Chaipimi cancuna quejarishcata Jehová Dios uyashcata cuentata cunguichij. ¿Ñucanchijca pitaj canchijyari? Cancunaca mana ñucanchij contrachu quejaricunguichij. Ashtahuanpish Jehová Diospaj contrami quejaricunguichij” nircami.
9 Chai qꞌuipami Moisesca Aarontaca: “Tucui israelitacunataca: ‘Jehová Diospaj ñaupajman shamuichij. Paica cancuna quejarishcatami uyashca’ ni” nirca.
10 Aarón tucui israelitacunahuan parlashca qꞌuipallami paicunaca tigrarishpa chaquishca pambata ricui callarircacuna. Chaipimi paicunaca Jehová Diospaj sumaj achijnicujta pꞌuyupi ricurcacuna.
11 Jehová Diosca Moisesmanca caitapishmi nirca:
12 “Israelitacuna quejarishcataca uyashcanimi. Paicunamanca: ‘Tutayaitaca aichatami micunguichij. Cutin tutamanta ladoca tandatami huijsa pajtata micunguichij. Chashnami ñucaca cancunapaj Jehová Dios cashcata yachanguichij’ ni” nircami.
13 Chai chishica achca codorniz pajarocuna shamushpami carpa huasicuna muyundijpi jundarca. Cutin tutamanta ladoca carpa huasi muyundijpimi shulla tamya urmashca carca.
14 Shulla tamya ña chaquirijpica pambataca rasu shina uchilla granocunami taparca.
15 Israelitacuna chaita ricushpa, ima cashcata mana yachashpaca caishuj chaishuj tapunacushpami: “¿Chaica imatajyari?” nircacuna. Chashna nijpimi Moisesca cashna nirca: “Caica cancuna micuchun Jehová Dios cushca tandami.
16 Jehová Diosca: ‘Cada uno micuna pajtata tandachun. Cancunapaj carpa huasipi causajcunapajca cada unopaj shuj omerta* japichun’ nishpami mandashca” nircami.
17 Israelitacunaca chaitami rurarcacuna. Maijancunaca achcatami japircacuna, shujtajcunaca ashallatami japircacuna.
18 Omerhuan midijpica achcata tandajpish mana yallitaj charircachu, ashallata tandajpish mana menosta charircachu. Cada unomi micuna pajtata tandarcacuna.
19 Chai qꞌuipami Moisesca: “Caya tutamantapajca maijanpish ama imata sobrachinguichijchu” nirca.
20 Shinapish Moisestaca mana cazurcacunachu. Maijancuna cayandij tutamantacama ashallatapish saquijpica cꞌurucuna jundashpami ashnai callarirca. Chaimi Moisesca paicunahuan pꞌiñarirca.
21 Tucui tutamantacunami cada uno micui pudishcata tandajcuna carca. Pero ña inti cunujyachijpica saquirishcacunaca yacuyajllami carca.
22 Sexto punllapica ishqui punllapaj micunata japina cashcamantami paicunaca ishqui omerta cada unopaj tandarcacuna. Chaimantami israelitacunata pushajcuna shamushpaca Moisesman tucuita huillarcacuna.
23 Chaimi Moisesca paicunamanca: “Jehová Diosca caitami nin. Cayaca samarina jatun punllami canga. Jehová Diospajlla chꞌicanyachishca sábado punllami canga. Chaimanta imata cusana cashcataca cusaichij. Imata tꞌimbuchina cashcataca tꞌimbuchichij. Ima sobrajpica cayandij punllacama huaquichichij” nirca.
24 Chashna nijpimi paicunaca Moisés mandashca shina cayandij punllapaj huaquichircacuna. Chai micunapica cꞌurucunaca mana llujshircachu, micunaca mana ashnajyarcachu.
25 Chaimantaca Moisesca cashnami nirca: “Cancunaca cunan punlla micuichij. Cai punllaca Jehová Diospaj chꞌicanyachishca sábado punllami can. Cai punllaca micunataca mana pambapi japinguichijchu.
26 Sujta* punllacunatami tandai tucunguichij. Pero séptimo punllapi, sábado punllapica mana imata japinguichijchu” nircami.
27 Chashna jahuapish huaquincunaca séptimo punllapica micunatami tandanaman rircacuna. Pero mana imata japircacunachu.
28 Chaimi Jehová Diosca Moisestaca cashna nirca: “¿Cancunaca ima horacamataj ñuca mandamientocunata, ñuca leycunataca mana cazusha ninguichij?
29 Ñuca, Jehová Dios cancunaman sábado punllata cushcataca ama cungaringuichijchu. Chaimantami sexto punllapica cancunamanca micunataca ishqui punllapaj cuni. Pero séptimo punllapica cancuna maipi cashcapimi saquirina canguichij. Chaimantaca ni maijan mana llujshinachu canguichij” nircami.
30 Chaimi israelitacunaca séptimo punllapica samarircacuna.
31 Israelitacunaca chai tandataca maná nishpami shutichircacuna. Chaica culantro* muyu shinami yurajlla carca, mielhuan rurashca galletas shinami carca.
32 Chai qꞌuipaca Moisesca: “Jehová Diosca: ‘Cancunata Egipto llajtamanta llujshichishpami chaquishca pambapi cajpica maná shuti micunata cararcani. Chaimanta shuj omer maná shuti micunata japishpa cancunapaj huahua huahuacuna ricuchun huaquichichij’ nishpami mandan” nircami.
33 Chaimi Moisesca Aarontaca: “Shuj jarrata japishpa shuj omer maná shuti micunata jundachi. Chaitaca Jehová Diospaj ñaupajpi churai. Chaitami cancunapaj huahua huahuacunaca huatanta ricungacuna” nirca.
34 Chashnami Aaronca Jehová Dios Moisesman mandashca shina chai jarrataca Leyta huaquichina arca* ñaupajpi churashpa huaquichirca.
35 Israelitacunaca gentecuna tiyan llajtaman chayangacamami maná* shuti micunataca 40 huatacunata micurcacuna. Paicunaca Canaán allpa linderocunaman chayangacamami maná shuti micunata micurcacuna.
36 Chunga omerca shuj efatami* charin.
Notacuna
^ “Sinaí” shimita huasha diccionariopi ricui.
^ Shuj omerca 2.2 litrocunatami charirca. Ayuda B14-ta ricui. “Omer” shimita huasha diccionariopi ricui.
^ O “Seis”.
^ O “cilantro”.
^ Cai arcapica importante documentocunatami huaquichijcuna carca.
^ “Maná” shimita huasha diccionariopi ricui.
^ Shuj efaca 24 libracunatami charirca. “Efá” shimita huasha diccionariopi ricui.
