1 Crónicas 10:1-14
-
Saulpish, paipaj churicunapish huañushcamanta (1-14)
10 Filisteocunaca israelitacunahuanmi macanacucurcacuna. Chaipica israelita runacunaca filisteocunamantami miticushpa rircacuna. Guilboa urcupica achcacunami huañurcacuna.
2 Filisteocunaca Saultapish, paipaj churicunatapish manchanaitami catircacuna. Chashnami Saulpaj churicunapajman cꞌuchuyashpaca Jonatanta, Abinadabta, Malki-Suatapish huañuchircacuna.
3 Macanacuica Saulpaj contrami yallitaj mirarirca. Arcohuan flechacunata shitajcunaca Saúl maipi cashcata yachaj chayashpami paita chugrichircacuna.
4 Chaimi Saulca paipaj escudota apaj runataca: “Chai circuncisionta mana rurachishcacuna shamushpa ñucata llaquinaita ama huañuchichunca cambaj espadata llujshichishpa, chai espadahuan ñucata sati” nirca. Shinapish escudota apaj runaca achcata manchashcamantami chaitaca mana rurasha nirca. Chaimantami Saulca paipaj espadallatataj japishpa satirirca.
5 Saúl huañujta ricushpami escudota apaj runapish paipaj espadallahuantaj satirishpa huañurca.
6 Chashnami Saulpish, paipaj quimsa churicunapish huañurcacuna. Saulpaj familiapish, tucui paihuan cajcunapishmi tandalla huañurcacuna.
7 Pugru pambapi caj tucui israelitacunaca tucuicuna miticushpa rijta, Saulpish, paipaj churicunapish huañushcatami ricurcacuna. Chaimi paicunapish paicunapaj llajtacunata shitashpa, miticushpa rircacuna. Qꞌuipaca filisteocunami chai llajtacunaman shamushpa chaipi causai callarircacuna.
8 Cayandij punlla filisteocuna chai huañushcacunapaj valishca cosascunata quichunaman ricushpami Guilboa urcupica Saulpaj, paipaj churicunapaj huañushca cuerpocunata japircacuna.
9 Chaiman chayashpaca Saulpaj churanacunatami llujshichircacuna. Paipaj umatapish pꞌitishpa, tucui macanacunatapishmi quichurcacuna. Chashnami Filistea llajtapi causaj tucui gentecunaman, paicunapaj rurashcalla dioscunamanpish huillachun shuj huillajta cacharcacuna.
10 Shinallataj Saulpaj macanacunataca filisteocunapaj diospaj huasipimi churarcacuna. Paipaj umatapish Dagonta adorana huasipimi huarcurcacuna.
11 Galaadmanta Jabés llajtapi tucui causajcunaca filisteocuna Saulta imallata rurashcatami yachaj chayarcacuna.
12 Chaimantami Jabesmanta tucui macanacujcuna rishpaca Saulpaj huañushca cuerpotapish, paipaj churicunapaj huañushca cuerpotapish Jabesman aparcacuna. Jabespi caj jatun yura ucupimi paicunapaj tullucunataca pambarcacuna. Shinallataj canchis punllacunatami ayunarcacuna.
13 Saulca Jehová Diosta mana cazushcamantami llaquinaita huañurca. Saulca Jehová Diospi feta mana churarcachu. Chaimantami huañushcacunahuan parlaj huarmitapish tapurca.
14 Jehová Diosta tapunapaj randica chai huarmitami tapurca. Chaimantami paica* Saulta huañuchirca. Paipaj mandanatapish Jesepaj churi Davidmanmi curca.
Notacuna
^ Caipica Jehovamantami parlacun.
