1 Crónicas 11:1-47
11 Tiempo qꞌuipaca tucui israelitacunami Davidhuan Hebronpi tandanacushpaca cashna nircacuna: “¡Ñucanchijca caipimi canchij! Cambaj familiapurallatajmi* canchij.
2 Canca ñaupamantami Israel llajtataca macanacuicunapi pushaj carcangui. Chai punllacunapica Saulmi mandaj carca. Ñucanchij Jehová Diosca cantaca: ‘Canmi ñuca pueblo Israelta michingui, canmi ñuca pueblo Israelta pushangui’ nircami” nircacunami.
3 Israelitacunata tucui pushajcunaca* rey Davidtami Hebronpi ricunaman shamurcacuna. Chaipimi Davidca paicunahuan Jehová Diospaj ñaupajpi ari ninacurcacuna.* Chai qꞌuipami paicunaca Jehová Dios Samuelman nishca shinallataj Davidtaca Israel llajtapi rey cachun agllarcacuna.
4 Chai qꞌuipaca Davidpish, tucui israelitacunapishmi Jerusalenman rircacuna. Jerusalén llajtataca Jebús nishpapishmi rijsincuna. Chai llajtapimi jebuseocunaca causajcuna carca.
5 Jebuspi causaj gentecunaca Davidmanta burlarishpami: “¡Canca caimanca mana nunca yaicunguichu!” nircacuna. Shinapish Davidca jatun pircacunayuj Sión llajtatami mishashpa japirca. Cunanca chai llajtaca Davidpaj Llajtami* can.
6 Davidca: “Maijanpish jebuseocunata punta huañuchijca soldadocunata mandajmi tucunga” nircami. Zeruyapaj churi Joabmi huañuchinaman puntapi llujshirca. Chashnami paica soldadocunata mandaj tucurca.
7 Qꞌuipaca Davidca jatun pircacunayuj llajtapimi causangapaj saquirirca. Chaimantami cai llajtataca Davidpaj Llajta nishpa shutichircacuna.
8 Davidca Miló* nishca lomamanta callarishpaca tucui llajtapimi pircacunata, shujtaj huasicunatapish shayachirca. Cutin caishuj mirga llajtataca Joabmi shayachirca.
9 Jahua pacha soldadocunata mandaj Jehová Dios paihuan cashcamantami Davidca ashtahuan ashtahuan poderta charishpa catirca.
10 Davidpaj sinchi macanacujcunata pushajcunaca caicunami carca. Paicunami tucui israelitacunahuan tandanacushpa Davidtaca rey cachun ayudarcacuna. Jehová Dios israelitacunaman nishca shinami paitaca rey cachun ayudarcacuna.
11 Davidpaj sinchi macanacujcunapaj listaca caimi can: hacmonitapaj churi Jasobeam, paica quimsa sinchi macanacujcunata pushajmi carca. Paimi shuj cutinca 300 runacunata paipaj lanzahuan huañuchirca.
12 Jasobeampaj qꞌuipaca Ahohitapaj huahuacunamanta Dodopaj churi Eleazarmi carca. Paica quimsa sinchi macanacujcunamanta shujmi carca.
13 Eleazarca Davidhuanmi Pas-Damimpi carca. Chaipimi filisteocunaca macanacungapaj tandanacushca carca. Shinapish chaipica cebadata tarpushca shuj allpami tiyarca. Shinallataj soldadocunaca filisteocunamanta miticushpami rishcacuna carca.
14 Shinapish Eleazarca cebadata tarpushca allpa chaupipi saquirishpami filisteocuna chagrata ama quichuchun macanacushpa, filisteocunata huañuchishpa catirca. Chashnami Jehová Diosca jatunta mishashpa paipaj pueblota quishpichirca.
15 Adulam jutcupi Davidta ricungapajca 30 pushajcunamanta quimsami rumicuna tiyan quinriman uriyarcacuna. Cutin filisteo soldadocunaca Refaím pugru pambapimi carpa huasicunapi saquirircacuna.
16 Davidca miticuna jutcupimi carca. Chaicamaca shuj grupo filisteo soldadocunaca Belenpimi tandanacushca carcacuna.
17 Davidca imata munacushcata huillashpami: “¡Belén pungu ladopi caj pugyumanta asha yacuta ubyashpaca allichari canman!” nirca.
18 Chaita uyashpami quimsa pushajcunaca filisteocunapaj carpa huasicuna maipi saquiricujman a la fuerza yaicushpa, Belén pungu ladopi saquirij pugyumanta yacuta llujshichishpa Davidpaj aparcacuna. Shinapish Davidca chai yacutaca mana ubyasha nircachu. Ashtahuanpish Jehová Diospajmi tallirca.
19 Davidca: “Ñucaca Diostami respetani, ¡caitaca manataj rurashachu! Maitataj cai runacunapaj yahuartaca ubyashayari. ¿Manachu paicunapaj causaitaca peligropi churashcacuna? Yacuta apamungapajca paicunapaj causaitamari peligropi churashcacuna” nircami. Shina nishpami Davidca mana ubyasha nirca. Davidpaj quimsa sinchi macanacujcunaca caicunatami rurarcacuna.
20 Joabpaj huauqui Abisaimi shujtaj quimsa runacunata pushaj tucurca. Paica 300 runacunatami paipaj lanzahuan huañuchirca. Chaimantami Abisaica caishuj quimsa runacuna shinallataj rijsishca carca.
21 Cai quimsa runacunamantaca, Abisaimi paipaj ishqui compañerocunatapish yalli ashtahuan rijsishca carca. Shinallataj paica pushajmi carca. Shinapish Abisaica punta quimsa runacuna laya ashtahuan rijsishcaca mana carcachu.
22 Jehoadapaj churi Benayaca mana manchaj runami carca. Paica Cabzeel llajtapimi achca cosascunata rurarca. Moabmanta Arielpaj ishqui churicunatapishmi huañuchirca. Shinallataj Benayaca shuj rasu punllapimi jutcuman yaicushpa shuj leonta huañuchirca.
23 Shuj jatun egipcio runatapishmi huañuchirca. Chai runaca ishqui metrocuna yallitami* midirca. Benayaca shuj caspillatami charicurca. Cutin egipcio runaca paipaj maquipica telar caspi shina jatun lanzatami charicurca. Chashna cajpipish egipcio runahuan macanacushpami paipaj lanzata quichushpa chaillahuantaj huañuchirca.
24 Caicunatami Jehoiadapaj churi Benayaca rurarca. Paipish punta quimsa sinchi macanacujcuna shinallatajmi rijsishca carca.
25 Benayaca 30 soldadocunata ashtahuan yalli cashpapish caishuj quimsa sinchi macanacujcunata pushajcunahuanca mana igual carcachu. Chashna cajpipish Benayataca Davidca paita cuidaj guardiacunata mandachunmi churarca.
26 Soldadocunamanta sinchi macanacujcunaca caicunami carca: Joabpaj huauqui Asahel, Belenmanta Dodopaj churi Elhanán,
27 Harodmanta Samot, pelonitacunapuramanta Hélez,
28 Tecoamanta Iquespaj churi Irá, Anatotmanta Abí-Ézer,
29 husatitacunapuramanta Sibecái, ahotitacunapuramanta Ilái,
30 netofatitacunapuramanta Maharái, netofatitacunapuramanta Baanapaj churi Héled,
31 benjaminitacunapaj Guibeá llajtamanta Ribaipaj churi Itái, Piratonmanta Benaya,
32 Gaas pugru pambacunamanta Hurái, Bet-arbamanta Abiel,
33 Bahurimmanta Azmávet, saalbonitacunapuramanta Eliahbá,
34 guizonitacunapuramanta Hasempaj churicuna, hararitacunapuramanta Saguepaj churi Jonatán,
35 hararitacunapuramanta Sacarpaj churi Ahiam, Urpaj churi Elifal,
36 mekeratitacunapuramanta Héfer, pelonitacunapuramanta Ahíya,
37 Carmelomanta Hezró, Ezbaipaj churi Naarái,
38 Natanpaj huauqui Joel, Hagripaj churi Mibhar,
39 ammonitacunapuramanta Zélec, berotitacunapuramanta Naharái, paica Zeruyapaj churi Joabpaj escudota apaj runami carca.
40 Itritacunapuramanta Irá, itritacunapuramanta Gareb,
41 hititacunapuramanta Urías, Ahlaipaj churi Zabad,
42 rubenitacunapuramanta Sizapaj churi Adiná, paica rubenitacunata pushajmi carca. Paihuanca 30 sinchi macanacujcunapishmi carca.
43 Maacapaj churi Hanán, mitnitacunapuramanta Josafat,
44 Astarotmanta Uzía, Aroermanta Hotampaj churicuna Sama, Jeielpish,
45 Simripaj churi Jediael, paipaj huauqui tizitacunapuramanta Johapish,
46 mahavitacunapuramanta Eliel, Elnaampaj churicuna Jeribái, Josavías, Moabmanta Itmapish,
47 Eliel, Obed, mezobaitacunapuramanta Jaasielpishmi carcacuna.
Notacuna
^ Hebreo rimaipica: “Cambaj tullu, cambaj aichami” ninmi.
^ Hebreo rimaipica: “ancianocunaca” ninmi.
^ O “pactota rurarcacuna”.
^ “Davipaj Llajta” shimita huasha diccionariopi ricui.
^ “Miló” shimica hebreo rimaipica ‘jundachishca’ nisha ninmi.
^ Hebreo rimaipica: “5 codos” ninmi. Shuj codoca 44.5 centimetrocunatami charirca. Ayuda B14-ta ricui.
