1 Crónicas 12:1-40
-
David rey cachun ayudajcunamanta (1-40)
12 Davidca Quispaj churi Saulpaj culpamantami Ziclagpi miticushpa causacurca. Pai Ziclagpi cajpimi sinchi macanacuj runacunaca Davidhuan tandanacungapaj shamurcacuna. Paicunami macanacuicunapica Davidta ayudajcuna carca.
2 Paicunaca macanacungapajmi arcocunata charircacuna. Shinallataj alli maquihuanpish, lluqui maquihuanpish rumicunata shitajcuna, arcohuan flechacunata shitajcunami carcacuna. Cai runacunaca Benjaminpaj familiamanta Saulpaj huauquicunami carca.
3 Cai sinchi macanacujcunata pushajca Ahiezermi carca. Paita ayudajca Joasmi carca. Cai ishqui cꞌaricunaca Guibeá llajtamanta Semaapaj churicunami carca. Azmavetpaj churicuna Jezielpish, Peletpish paicunahuanmi carca. Shinallataj Beracá runapish, Anatot llajtamanta Jehú runapish paicunahuanmi carca.
4 Gabaón llajtamanta Ismayá (paica 30 macanacujcunata pushaj, paicunamanta sinchi macanacujmi carca), Jeremías, Jahaziel, Johanán, Guederá llajtamanta Jozabad,
5 Eluzái, Jerimot, Bealías, Semarías, Harif llajtamanta Sefatías,
6 Corepaj familiamanta Elcaná, Isías, Azarel, Joézer, Jasobeampish paicunahuanmi carca.
7 Guedor llajtamanta Jerohampaj churicuna Joelá, Zebadiaspish paicunahuanmi carca.
8 Gadpaj familiamanta huaquincunaca miticuna chaquishca pambapimi Davidpaj lado tucurcacuna. Paicunaca sinchi macanacujcuna, macanacunata alli yachajcuna, jatun escudocunahuan, lanzacunahuan macanacungapajpish listomi cajcuna carca. Paicunapaj ñahuicunaca leonpaj ñahuicuna shinami carca. Shinallataj urcupi causaj gacela animalcuna shinami paicunaca utca callpajcuna carca.
9 Paicunata pushajca Ezermi carca. Paipaj qꞌuipaca Abdías, ishquipaj qꞌuipaca Eliab,
10 quimsapaj qꞌuipaca Mismaná, chuscupaj qꞌuipaca Jeremías,
11 pichcapaj qꞌuipaca Atái, sujtapaj qꞌuipaca Eliel,
12 canchispaj qꞌuipaca Johanán, pusajpaj* qꞌuipaca Elzabad,
13 iscunpaj qꞌuipaca Jeremías, chungapaj qꞌuipaca Macbanaimi carca.
14 Paicunami Gad familiamanta soldadocunata mandajcuna carca. Paicunamanta mana tanto fuerzata charijca 100 soldadocunatami mishaj carca. Cutin ashtahuan fuerzata charijca 1.000 soldadocunatami mishaj carca.
15 Cai runacunaca Jordán jatun yacu mirarishpa regaricujpimi huatapaj primer quillapi chai yacuta chꞌimbarcacuna. Chashnami paicunaca pugru pambapi causajcunataca inti llujshin ladoman, inti huashicun* ladoman callpachishpa cacharcacuna.
16 Benjaminpaj familiamanta, Judapaj familiamanta huaquin runacunaca David maipi miticushca cashcamanmi shamurcacuna.
17 David chaimanta llujshishpaca paicunapaj ñaupajpi shayarishpami: “Cancuna alli munaicunahuan ñucata ayudanaman shamushca cajpica ñucaca cancunahuan amigomi tucusha. Shinapish ñuca ima mana allita mana rurashca cajpipish ñucata umashpa contracunaman entreganaman shamushpaca, ñucanchij ñaupa yayacunapaj Dios chaita ricushpa juzgachun” nirca.
18 Amasaica 30 macanacujcunata pushajmi carca. Diosca paipaj jucha illaj espíritu santota paiman cujpimi Amasiaca:
“David canhuanmi canchij. Jesepaj churi David canta sirvijcunami canchij.
Ñucanchij Dios ayudacushcamantami canpish, canta ayudajcunapish sumaj causaita charinguichij” nircami.
Chaimi Davidca paicunata chasquishpa grupo soldadocunata mandajcuna cachun churarca.
19 Davidca filisteocunahuan tandanacushpami Saulpaj contra macanacunaman shamurca. Chaipimi Manasespaj familiamanta huaquin cꞌaricunaca Saulpaj soldadocunata saquishpa Davidpaj lado tucurcacuna. Filistea llajtamanta mandajcunaca paicunapura parlanacushpami: “Davidca paipaj amito Saulpaj lado tucushpaca ñucanchijtamari huañuchinga” nishpa Davidta llujshichishpa cacharcacuna. Chaimantami Davidca filisteocunataca mana ayudarca.
20 Manasespaj familiamanta huaquin cꞌaricunaca Ziclag llajtapi David cajpimi paipaj lado tucurcacuna. Manasespaj familiamanta 1.000 gentecunata pushajcunaca caicunami carca: Adná, Jozabad, Jediael, Miguel, Jozabad, Elihú, Ziletaipishmi carca.
21 Cai runacunaca sinchi, mana manchajcunami carca. Paicunami David achca shuhuacunahuan macanacucujpica ayudarca. Shinallataj paicunaca soldadocunata mandajmi tucurcacuna.
22 Cada punllami runacunaca Davidta ayudangapaj shamujcuna carca. Chaimi Davidpaj soldadocunaca Diospaj soldadocuna shina yallitaj mirarirca.
23 Macanacuiman ringapaj allichirishca soldadocunata pushajcunaca caicunami carca. David Hebronpi cajpimi cai soldadocunaca Davidpaj lado tucurcacuna. David mandanataca paicunami Jehová Dios mandashca shina Davidman curcacuna.
24 Judapaj familiamantaca 6.800 cꞌaricunami jatun escudocunahuanpish, lanzacunahuanpish macanacuiman ringapaj allichirishca carcacuna.
25 Simeonpaj familiamantaca macanacungapaj sinchi, mana manchaj 7.100 soldadocunami tiyarca.
26 Levitacunapaj familiamantaca 4.600 runacunami tiyarca.
27 Aaronpaj churicunata pushajca Jehoiadami carca. Paihuanca 3.700 runacunami tiyarca.
28 Paicunapurapica Sadoc shuti sinchi, mana manchaj jovenmi tiyarca. Paipaj yayapaj familiamanta pushajcunaca 22 runacunami tiyarca.
29 Benjaminpaj familiacunamantaca 3.000 runacunami tiyarca. Paicunaca Saulpaj huauquicunami carca. Paicunamanta achcacunaca Saulpaj lado tucushpami Saultapish, paipaj familiatapish ayudanataca manataj saquircacuna.
30 Efrainpaj familiamantaca 20.800 sinchi, mana manchaj cꞌaricunami tiyarca. Cai cꞌaricunaca paicunapaj familiacunapimi* rijsishcacuna carca.
31 Manasespaj chaupi familiamantaca 18.000 runacunami tiyarca. Paicunaca Davidta reyta rurangapajmi agllashcacuna carca.
32 Isacarpaj churicunamantaca 200 pushajcunami tiyarca. Paicunaca imalla tucuna cashcata intindijcuna, Israel llajtapish imata rurana cashcata yachajcunami carca. Tucui paicunapaj huauquicunapish mandashcacunata cazujcunami carca.
33 Zabulonpaj familiamantaca 50.000 soldadocunami macanacuiman ringapaj allichirishca carcacuna. Paicunaca tucui laya macanacunatami charircacuna. Tucui paicunami Davidtaca tucui shunguhuan apoyarcacuna.
34 Neftalipaj familiamantaca 1.000 pushajcunami tiyarca. Paicunahuanca 37.000 jatun escudocunata, lanzacunatapish charij cꞌaricunami tiyarca.
35 Danpaj familiamantaca 28.600 runacunami macanacuiman ringapaj allichirishca carcacuna.
36 Shinallataj Aserpaj familiamanta macanacuiman ringapajca 40.000 soldadocunami allichirishca carcacuna.
37 Jordán jatun yacu caishuj ladopica Rubenpaj familiamanta, Gadpaj familiamanta, Manasespaj chaupi familiamantapish 120.000 soldadocunami tiyarca. Paicunaca tucui laya macanacunacunatami charircacuna.
38 Tucui cai soldadocunaca macanacuiman ringapajmi allichirishca carcacuna. Chai soldadocunaca David Israel llajtata mandachunmi reyta rurangapaj shuj yuyailla tucushpa Hebronman shamurcacuna. Shinallataj israelitacunamanta caishujcunapish tucuicunami Davidta reyta rurangapajca shuj yuyailla carcacuna.
39 Chai soldadocunaca Davidhuanmi quimsa punllacunata Hebronpi saquirircacuna. Davidpaj huauquicunami chai soldadocuna micuchun, ubyachunca allichishcacuna carca.
40 Israel llajtapi achca cushicui tiyashcamantami chai cꞌuchullapi causajcunapish, Isacar, Zabulón, Neftalí llajtacunapi causajcunapish micunacunata burrocunapi, camellocunapi, mulacunapi, huagracunapi apamurcacuna. Paicunaca harinata, higocunata llapishpa rurashca tortacunata, chaquishca uvacunata, vinota, aceiteta, achca huagracunata, ovejacunatapishmi apamurcacuna.
