1 Crónicas 15:1-29
15 Davidca paipaj huasicunataca Davidpaj Llajtapimi shayachishpa catirca. Shinallataj Diospaj Arcata churangapajmi shuj lugarta allichishpa shuj carpa huasita shayachirca.
2 Chashna shayachicushpami Davidca: “Diospaj Arcataca pi mana apanachu can, levitacunallami apana can. Jehová Diosca paicunatami Jehová Diospaj Arcata apachun, paita siempre sirvichunpish agllashca” nirca.
3 Chai qꞌuipami Davidca Jehová Diospaj Arcata pai allichishca lugarman apangapaj tucui israelitacunata Jerusalenpi tandachirca.
4 Davidca Aaronpaj huahua huahuacunatapish, levitacunatapishmi tandachirca.
5 Paicunaca Cohatpaj huahua huahuacunamantaca pushaj Uriel, 120 paipaj huauquicunapishmi carca.
6 Meraripaj huahua huahuacunamantaca pushaj Asaya, 220 paipaj huauquicunapishmi carca.
7 Guersompaj huahua huahuacunamantaca pushaj Joel, 130 paipaj huauquicunapishmi carca.
8 Elizafanpaj huahua huahuacunamantaca pushaj Semaya, 200 paipaj huauquicunapishmi carca.
9 Hebronpaj huahua huahuacunamantaca pushaj Eliel, 80 paipaj huauquicunapishmi carca.
10 Uzielpaj huahua huahuacunamantaca pushaj Aminadab, 112 paipaj huauquicunapishmi carca.
11 Ashtahuanpish Davidca sacerdote Sadoc, Abiatar, levitacunamanta Uriel, Asaya, Joel, Semaya, Eliel, Aminadabtapishmi cayarca.
12 Chaipimi Davidca paicunataca cashna nirca: “Cancunaca levitacunapaj yayacunapaj familiamanta pushajcunami canguichij. Chaimanta cancunapish, cancunapaj huauquicunapish chuyayarishpa jucha illaj tucuichij. Israelitacunapaj Jehová Diospaj Arcatapish ñuca allichishca lugarman huichiyachichij.
13 Punta cutin Arcataca cancuna mana apashcamantami Jehová Diosca ñucanchijhuan yallitaj pꞌiñarirca. Pai mandashca shina mana rurashcamantami chashna pꞌiñarirca” nircami.
14 Chaimantami sacerdotecunapish, levitacunapish israelitacunapaj Jehová Diospaj Arcata huichiyachingapajca chuyayarishpa jucha illaj tucurcacuna.
15 Chaimi levitacunaca Moisés mandashca shina Diospaj Arcataca caspicunata churashpa rigra jahuapi aparcacuna. Paicunaca Jehová Dios nishca shinami aparcacuna.
16 Shinallataj Davidca levitacunata pushajcunamanca cancunapaj huauqui cantajcunata cushicuihuan cantachun, tocana instrumentocunahuan, cuerdata charij instrumentocunahuan, arpacunahuan, cimbalocunahuan cantachun, tocachun churanguichij nishpami mandarca.
17 Chaita rurachunca levitacunaca paicunapuramanta Joelpaj churi Hemanta, Berekiaspaj churi Asafta, Cusayapaj churi Etantapishmi churarcacuna. Etanca Meraripaj familiamantami carca.
18 Paicunahuanca paicunapaj familiapurallamantatajmi shujtaj grupo tiyarca. Paicunaca Zacarías, Ben, Jaaziel, Semiramot, Jehiel, Uní, Eliab, Benaya, Maaseya, Matitías, Elifelehu, Micneyapishmi carca. Shinallataj punguta cuidajcunaca Obed-Edom, Jeielmi carca.
19 Cantaj Hemán, Asaf, Etanca cobremanta rurashca cimbalocunatami tocana carcacuna.
20 Shinallataj Zacarías, Aziel, Semiramot, Jehiel, Uní, Eliab, Maaseya, Benayaca notas altapi* afinashca cuerdata charij instrumentocunapimi tocajcuna carca.
21 Cutin Matitías, Elifelehu, Micneyá, Obed-Edom, Jeiel, Azaziasca notas bajapi* afinashca arpacunapimi tocajcuna carca. Paicunaca musicata dirigingapajmi chashna tocajcuna carca.
22 Kenaniasca levitacunatami pushaj carca. Paica alli yachaj cashcamantami Arcata ima shina apajta ricuraj carca.
23 Berekiaspish, Elcanapish Diospaj Arcata cuidajcunami carca.
24 Cutin sacerdote Sebanías, Josafat, Netanel, Amasái, Zacarías, Benaya, Eliezerpish Diospaj Arca ñaupajpimi sinchita trompetacunapi tocajcuna carca. Shinallataj Obed-Edom, Jehiaspish Arcata cuidashpami sirvijcuna carca.
25 Davidpish, israelitacunata pushajcunapish,* 1.000 gentecunata pushajcunapish cushicushpami Obed-Edompaj huasimanta Jehová Dioshuan ari ninacushca arcata apanaman huichiyarcacuna.
26 Levitacuna Jehová Dioshuan ari ninacushca arcata apacujpica Diosmi ayudarca. Chaimantami paicunaca canchis malta torocunata, canchis carnerocunata curcacuna.
27 Davidca Diospaj Arcata apaj levitacuna shinallataj, cantajcuna shinallataj, Kenanías shinallatajmi alli telamanta rurashca sin mangas churanata churashca carca. Kenaniasca Diospaj Arcata apajcunata ricuj, chai cantajcunapajpish pushajmi carca. Davidca linomanta rurashca efodtapishmi churashca carca.
28 Tucui israelitacunami Jehová Dioshuan ari ninacushca arcataca yallitaj cushicuihuan, gachupi tocashcacunahuan, trompetacunahuan, cimbalocunahuan, cuerdata charij instrumentocunahuanpish, arpacunahuanpish sinchita tocashpa huichiyarcacuna.
29 Jehová Dioshuan ari ninacushca arcaca Davidpaj Llajtamanmi chayarca. Chaiman chayajpimi Davidca cushicushpa, saltashpa bailacurca. Chaitami Saulpaj ushushi Micalca jahua ventanamanta urilla ricurca. Chaita ricushpaca Micalca paipaj shungupimi Davidtaca pꞌiñai callarirca.
Notacuna
^ Hebreo rimaipica: “alamotpi” ninmi. “Alamot” shimita huasha diccionariopi ricui.
^ Hebreo rimaipica: “seminitpi” ninmi. “Seminit” shimita huasha diccionariopi ricui.
^ Hebreo rimaipica: “ancianocunapish” ninmi.
