1 Crónicas 20:1-8
20 Chai huata callaripica reycuna macanacunaman llujshina punllacunapimi Joabca ammonitacunapaj llajtapi soldadocunata mandarca. Chaipimi paica chai llajtata tucuchirca. David Jerusalenpi cajpimi Joabca Rabá llajtaman paipaj soldadocunahuan rishpa chai llajta muyundijpi shayarirca. Joabca Rabá llajtapi causajcunahuan macanacushpami paicunata chingachirca.
2 Cutin Davidca Malcampaj* umamantami coronata quichurca. Chai coronaca shuj talento* orota pesashcata, sumaj rumicunatapish charishcatami Davidca ricurca. Chai coronataca Davidpaj umapimi churarcacuna. Paica chai llajtamanta quichushca achca cosascunatami aparca.
3 Rabá llajtapi causaj tucui gentecunatapish llujshichishpami paicunataca rumicunata sierracunahuan cuchushpa trabajachun churarca. Shinallataj fierromanta rurashca hachacunahuan, fierromanta rurashca shujtaj afilashca herramientacunahuan trabajachunmi churarca. Davidca ammonitacuna causashca tucui llajtacunahuanca chashnallatajmi rurarca. Chaita rurashca qꞌuipaca Davidca paipaj soldadocunahuanmi Jerusalenman tigrarcacuna.
4 Chai qꞌuipaca israelitacunaca filisteocunahuanmi Guezerpi macanacurcacuna. Chaipica husatitacunapuramanta Sibecaimi refaimcunapaj huahua huahuacunamanta caj Sipaita huañuchirca. Israelitacunaca filisteocunatami macanacuipi misharcacuna.
5 Cutinmi filisteocunahuan macanacushcacuna carca. Chaipica Jairpaj churi Elhananmi Gatmanta Goliatpaj huauqui Lahmita huañuchirca. Paica telar caspi shina jatun lanzatami charirca.
6 Qꞌuipamanca Gatpimi cutin macanacui tiyarca. Chaipica manchanai shuj jatun runami tiyarca. Chai runaca cada maquipica sujta dedocunata, cada chaquipipish sujta dedocunatami charirca, tucuica 24 dedocunatami charirca. Paica refaimcunapaj huahua huahuacunamantami carca.
7 Chai runa israelitacunata yangapi churashpa, cꞌaminata manataj saquijpimi Simeapaj churi Jonatanca paita huañuchirca. Paica Davidpaj huauquimi carca.
8 Paicunaca Gat llajtamanta refaimcunapaj huahua huahuacunami carca. Paicunatami Davidpish, paita sirvijcunapish huañuchircacuna.
Notacuna
^ “Malcam” shimita huasha diccionariopi ricui.
^ Shuj talentoca 34.2 kilogramocunatami charirca. Ayuda B14-ta ricui.
