1 Crónicas 26:1-32
26 Punguta cuidajcunaca cashnami chꞌicanyachishca carcacuna. Coreitacunamantaca Corepaj churi Meselemiasmi carca. Meselemiasca Asafpaj huahua huahuacunapuramantami carca.
2 Meselemiasca cai churicunatami charirca: puntaca Zacariasmi carca, puntapaj qꞌuipaca Jediaelmi carca, ishquipaj qꞌuipaca Zebadiasmi carca, quimsapaj qꞌuipaca Jatnielmi carca,
3 chuscupaj qꞌuipaca Elammi carca, pichcapaj qꞌuipaca Jehohananmi carca, sujtapaj qꞌuipaca Elieho-Enaimi carca.
4 Obed-Edompish cai churicunatami charirca: puntaca Semayami carca, puntapaj qꞌuipaca Jehozabadmi carca, ishquipaj qꞌuipaca Joami carca, quimsapaj qꞌuipaca Sacarmi carca, chuscupaj qꞌuipaca Netanelmi carca,
5 pichcapaj qꞌuipaca Amielmi carca, sujtapaj qꞌuipaca Isacarmi carca, canchispaj qꞌuipaca Peuletaimi carca. Cai huahuacunahuanmi Diosca Obed-Edomtaca bendiciashca carca.
6 Paipaj churi Semayaca cai churicunatami charirca. Cai churicunaca sinchi runacuna, tucui imatapish allita rurajcunami carca. Chaimi paicunaca familiata* pushajcuna tucurca.
7 Semayapaj churicunaca Otní, Refael, Obed, Elzabadpishmi carca. Elzabadpaj huauquicunapish Elihú, Semakiasmi carca. Cai cꞌaricunaca tucui imatapish allita rurajcunami carca.
8 Tucui caicunami Obed-Edompaj churicuna carca. Paicunapish, paicunapaj churicunapish, paicunapaj huauquicunapish tucui imatapish allita ruraj cꞌaricunami carca. Shinallataj sirvingapajpish alli yachashcacunami carca. Obed-Edommantaca tucuica 62-mi carca.
9 Meselemiasca churicunatapish, huauquicunatapishmi charirca. Tucuica imatapish allita ruraj 18 cꞌaricunami carcacuna.
10 Shinallataj Meraripaj churicunamanta Hosaca cai churicunatami charirca: pushaj churica Simrimi carca (paitaca mana punta churi cajpipish paipaj yayami pushaj cachun churarca),
11 Simripaj qꞌuipaca Hilquiasmi carca, Hilquiaspaj qꞌuipaca Tebaliasmi carca, Tebaliaspaj qꞌuipaca Zacariasmi carca. Hosapaj churicunapish, huauquicunapish tucuica 13-mi carcacuna.
12 Punguta cuidajcunapaj chꞌicanyachishcacunata pushajcunapish, paicunapaj huauquicunapish Jehová Diospaj huasipica chꞌican chꞌican trabajota rurashpami sirvijcuna carca.
13 Chaimi yayacunapaj familiacunata pushajcunamanta jatun familia cajpipish, uchilla familia cajpipish cada punguta maijanlla japina cashcata ricungapaj sortearcacuna.
14 Sorteajpica Selemiaspajca inti llujshin ladomanmi urmarca. Cutin paipaj churi Zacariaspaj sorteajpica janaj ladomanmi urmarca. Zacariasca alli yuyashpa consejajmi carca.
15 Obed-Edompaj sorteajpica ura ladomanmi urmarca. Paipaj churicunataca huaquichina cuartocunata cuidachunmi churarcacuna.
16 Supimpajpish, Hosapajpish inti huashicun ladomanmi urmarca. Chaica Saléket nishca Pungu cꞌuchupi, urcuman rina huichi jatun ñan cꞌuchupimi saquirirca. Shuj ladopica shuj grupo guardiacunami carca. Paicunapaj ladopica caishuj grupo guardiacunapishmi carca.
17 Inti llujshin ladopica sujta levitacunami tiyarca. Janaj ladomanpish cada punllami chuscu levitacuna tiyarca. Ura ladomanpish cada punllami chuscu levitacuna tiyarca. Huaquichina cuartocunapipish ishqui, ishqui guardiacunami tiyarca.
18 Huasi corredorpi inti huashicun ladoman caj jatun ñan cꞌuchupica chuscu levitacunami tiyarca. Shinallataj huasi corredor cꞌuchupica ishqui levitacunami tiyarca.
19 Caicunami punguta cuidajcunapaj chꞌicanyachishca grupocuna carca. Paicunaca Corepaj huahua huahuacunamanta, Meraripaj huahua huahuacunamantami carcacuna.
20 Levitacunamanta Ahiyaca Diospaj huasipi achca valij cosascunata huaquichina cuartocunata ricuchunmi churashca carca. Shinallataj paica Diospajlla chꞌicanyachishca achca valij cosascunata huaquichina cuartocunatapish ricuchunmi churashca carca.
21 Ladanpaj churicunamantaca Jehielimi chaipi carca. (Guersonpaj huahua huahuacunamantami Ladanca shamurca. Ladanpaj churi Jehielica Ladanpaj familiacunata pushajcunapuramantami carca).
22 Shinallataj Jehielipaj churicunapish, Zetampish, Zetampaj huauqui Joelpishmi carca. Paicunaca Jehová Diospaj huasipimi achca valij cosascunata huaquichina cuartocunata cuidajcuna carca.
23 Amramitacunapuramanta, izharitacunapuramanta, hebronitacunapuramanta, uzielitacunapuramantaca
24 Pushaj Sebuelca huaquichina cuartocunatami cuidaj carca. Paica Guersompaj churi, Moisespaj churimi carca.
25 Sebuelpaj huauquicunaca Eliezerpaj huahua huahuacunamantami carca. Paicunaca Rehabías, Jesayá, Joram, Zicrí, Selomotpishmi carca.
26 Selomotpish, paipaj huauquicunapish Diospajlla chꞌicanyachishca achca valij cosascunata huaquichina cuartocunata cuidangapajmi encargado carcacuna. Cai cosascunataca rey David, yayacunapaj familiacunata pushajcuna, 1.000 gentecunata pushajcuna, 100 gentecunata pushajcuna, soldadocunata mandajcunami chꞌicanyachishcacuna carca.
27 Paicunaca macanacuicunapi quichushca cosascunatami Diospajlla chꞌicanyachishcacuna carca. Jehová Diospaj huasita allichingapajmi chashna rurarcacuna.
28 Shinallataj Selomit, paipaj huauquicunapish Dios ricuchishcata huillaj Samuel, Quispaj churi Saúl, Nerpaj churi Abner, Zeruyapaj churi Joab Diospajlla chꞌicanyachishca cosascunatami cuidajcuna carca. Maijanpish imata Diospajlla chꞌicanyachishcacunataca Selomitpish, paipaj huauquicunapishmi cuidajcuna carca.
29 Izharitascunapuramanta Kenaniaspish, paipaj churicunapish Diospaj huasi canllapimi pushajcuna cachun, israelitacunapaj juezcuna cachun churashcacuna carca.
30 Hebronitacunapuramantaca Hasabiaspish, paipaj huauquicunapish 1.700 tucui imatapish allita ruraj cꞌaricunami carca. Paicunaca Israel llajtapi, Jordán inti huashicun ladopi causaj israelitacunatami pushajcuna carca. Paicunaca Jehová Diospaj rurana tucui trabajocunata, reypaj rurana trabajocunatapishmi pushajcuna carca.
31 Hebronitacunapuramantaca hebronitacunata pushajca Jeriyami carca. Paica yayapaj familiata pushajcunamantami carca. 40 huatacunata David mandacujpimi Davidpaj runacunaca hebronitacunapuramanta sinchi, tucui imatapish allita ruraj runacunata mashcarcacuna. Chai runacunataca Galaadpi saquirij Jazerpimi japircacuna.
32 Paipaj huauquicunaca tucui imatapish allita ruraj 2.700 runacunami carca. Paicunaca yayacunapaj familiacunata pushajcunami carca. Rey Davidca paicunamanmi rubenitacunata, gaditacunata, Manasespaj chaupi familiata mandachun autoridadta curca. Shinallataj paicunami Diospajpish, reypajpish tucui cosascunata rurajcuna carca.
Notacuna
^ Caipica yayapaj familiamantami parlacun.
