1 Corintios 15:1-58
-
Cristota causachishcamanta (1-11)
-
Huañushcacunata mana causachina cajpica ñucanchij crishcaca yangallami canman (12-19)
-
Cristota causachishpami Diosca huañushcacunata causachinata ricuchirca (20-34)
-
Aichayuj cuerpomantapish, espíritu cuerpomantapish (35-49)
-
Mana huañunamantapish, mana ismunamantapish (50-57)
-
Amitopajta ruranapi siempre ocupado canamanta (58)
15 Cunanca huauquicuna, cancunaman alli huillaicunata ñuca huillashcatami yuyachisha nini. Chai alli huillaicunata ñuca huillajpimi cancunaca chasquircanguichij. Chaimantami sinchiyarishpa caticunguichij.
2 Ñuca huillashca alli huillaicunata catishpaca quishpichishcami canguichij. Ashtahuanpish chaita mana rurashpaca cancunaca yangallami Jesusta catijcuna tucushcanguichij.
3 Ñucaca tucuimanta yalli allicunatami chasquircani. Chaicunallatatajmi cancunamanpish yachachircani: Dios quillcachishcacunapi nishca shinaca Cristoca ñucanchij juchacunamantami huañurca.
4 Shinallataj Dios quillcachishcacunapi nishca shinaca pambashcami carca, quimsa punllapimi causachishca carca.
5 Causachishca qꞌuipaca Cefasmanmi* ricurirca. Chai qꞌuipaca 12 apostolcunamanmi ricurirca.
6 Cutin chai qꞌuipaca 500 yalli tandanacushca huauquicunamanmi ricurirca. Paicunamantaca achcacunami ñucanchijpurapi causacunrajcuna. Cutin maijancunaca ñami huañushcacuna.*
7 Chai qꞌuipaca Santiagomanmi ricurirca. Cutin chaipaj qꞌuipaca tucui apostolcunamanmi ricurirca.
8 Ultimopica ñucamanmi ricurirca. Chaimantami ñucaca manaraj huacharina horaspi huacharishca huahua shina cani.
9 Ñucaca tucui apostolcunamanta último apostolmi cani. Diospaj congregacionta catirashpa llaquichishcamantaca apóstol nishcallapish mana caipajmi cani.
10 Shinapish Dios yallitaj llaquij cashcata ricuchishcamantami ñucaca apóstol cani. Diosca yallitaj llaquij cashcataca mana yangamanta ñucamanca ricuchishcachu. Ashtahuanpish ñucaca tucui caishuj apostolcunatapish yallimi trabajashcani. Chashnapish caitaca mana ñuca fuerzahuanchu rurashcani. Ashtahuanpish Dios yallitaj llaquij cashcata ñucaman ricuchishcamantami chashna rurashcani.
11 Caishuj apostolcuna cashpapish, ñuca cashpapish chaillatatajmi huillanchij. Chai huillashcatami cancunaca crishcanguichij.
12 Ñucanchijca huañushcacunapaj chaupimanta Cristota causachishca cashcatami huillacunchij. Shinaca ¿ima nishpataj cancunamanta maijancunaca huañushcacunaca mana causachishcachu canga ninguichijyari?
13 Huañushcacuna mana causachishca cana cajpica Cristopish mana causachishcachu canman carca.
14 Cristota mana causachishca cajpica ñucanchijca yangallami huillacunchijman. Cancunapaj crishcapish yangallami canman.
15 Ashtahuanpish huañushcacunata mana causachina cajpica Diospish Cristotaca mana causachinmanchu carca. Shinashpaca Diosmi Cristota causachirca nishpaca Diosmantami llullacunata nicunchijman.
16 Huañushcacunata mana causachina cajpica Cristopish mana causachishcachu canman carca.
17 Shinallataj Cristota mana causachishca cajpica cancuna crishcapish yangallami canman. Cancunaca cancunapaj juchapirajmi causacunguichijman.
18 Cristota catij cashcamanta huañushcacunapishmi* huiñaipaj huañushcacuna canman.
19 Ñucanchijpish cai causaipajlla Cristopi shuyashpaca caishuj gentecunata yallimi llaquipi causacunchijman.
20 Cristomi huañushcacunapaj chaupimanta causachishca carca. Paimi huañushcacunamantaca punta causarirca.
21 Ima shinami huañuica shuj runallamanta callarirca, chashnallatajmi huañushcacunapish shuj runallamanta causaringacuna.
22 Adanmantaca tucui gentecunami huañurca. Shinallataj Cristomantaca tucuicunami causachishca cangacuna.
23 Shinapish cada unomi ordenpi causachishca cangacuna: puntaca Cristomi causachishca cashca. Qꞌuipaca Cristopaj cajcunami causachishca cangacuna. Paicunaca Cristo tigramuna punllacunapimi* causachishca cangacuna.
24 Chai qꞌuipami, tucuripica Cristoca tucui gobiernocunata, tucui autoridadcunata, poderta charijcunatapish tucuchishpa paipaj Yaya Diosman Gobiernotaca entreganga.
25 Cristoca tucui pꞌiñajcunata paipaj chaqui ucupi Dios churangacamami mandashpa catinga.
26 Tucui pꞌiñajcunamantaca huañuimi ultimopica tucuchishca canga.
27 Diosca “Cristopaj chaqui ucupimi tucuita churarca”. Shinapish Diosca Cristopaj chaqui ucupimi tucuita churarca nishpaca Diosllataj Cristota cazuna cashcataca mana nicunchu. Ashtahuanpish Diosmi tucuita Cristopaj chaqui ucupi churarca.
28 Shinapish Churipaj chaqui ucupi tucuita Dios churashca qꞌuipami, Churipish tucuita paipaj chaqui ucupi churaj Diosta cazunga. Chashnami Diosca pailla tucuita mandanga.
29 Mana chashna cajpica, ¿huañungapajllaca imapajtaj bautizarincunari? Huañushcacuna mana causachishca cana cajpica, ¿huañungapajllaca imapajtaj paicunapish bautizarincunari?
30 Shinashpaca yangamantami ñucanchij causaitaca punllanta llaquipi churanchijman ¿nachu?
31 Huauquicuna, ñucaca punllantami huañuchisha nishca causani. Ñucanchij Amito Cristo Jesusta catijcuna cashcamanta cushicuj shinallatajmi chaitaca mana llullani.
32 Ñucapish shujtaj runacuna shinallatajmi Éfeso llajtapica pꞌiña animalcunahuan macanacushcani, ¿chaica imapajtaj valinyari? Huañushcacuna mana causachishca cana cajpica “micushunchij, ubyashunchij cayaca huañushunmi”.
33 Shujtajcuna pandachichunca ama saquichijchu. Mana alli gentecunahuan tandanacushpaca alli ruraicunata ruranatami cungaringuichij.
34 Maijancunaca Diosmantaca imata mana yachancunachu. Chaimanta cashcata rurashpa yuyaita japichij, juchatapish ama rurashpa catichijchu. Caitaca cancuna pingarichunmi chashna nini.
35 Shinapish maijanca: “¿Huañushcacunaca ima shinataj causachishca cangari? ¿Ima laya cuerpohuantaj jataringacunari?” ningachari.
36 ¡Yuyai illaj! Can tarpushca muyuca mana huiñanllachu, huiñangapajca puntapica huañunrajmi, ¿chaitaca manachu yachangui?
37 Canca ña huiñashca yurataca* mana tarpunguichu, ashtahuanpish muyutami trigota cashpapish o shujtaj muyuta cashpapish tarpungui.
38 Shinapish Diosca pai munashca shinami muyutaca* huiñachin. Shinallataj cada muyu huiñashpaca mana chai layallataj huiñanchu.
39 Mana tucui cuerpocunachu chai shinallataj can: gentecunapaj, huagracunapaj, pajarocunapaj, pescadocunapaj cuerpocunaca chꞌican chꞌicanmi can.
40 Jahua pachapi caj cuerpocunapish, cai pachapi caj cuerpocunapish tiyanmi. Ashtahuanpish jahua pachapi caj cuerpocunaca shujtaj shina sumajmi. Cai pachapi caj cuerpocunapish shujtaj shina sumajmi.
41 Intipish shujtaj shinami achijyachin. Lunapish shujtaj shinami achijyachin. Estrellacunapish shujtaj shinami achijyachin. Shinapish cada estrellami chꞌican chꞌican achijyachin.
42 Chashnallatajmi causachishcacunahuanpish tucunga. Huañushca* cuerpoca ismunmi. Ashtahuanpish causachishca cuerpoca mana ismunchu.
43 Pingaipi pambashca* cashpaca causachijpica jatunyachishcami canga. Irquillata pambashca* cashpaca causachijpica poderyujmi canga.
44 Aichayujta tulluyujtami pamban,* ashtahuanpish causachijpica espíritu cuerpohuanmi jatarin. Shinallataj aichayuj tulluyuj cuerpo tiyajpica espíritu cuerpopish tiyanmi.
45 Chaimantami Dios quillcachishcapica: “Punta cꞌari Adanca causaiyujmi tucurca” nin. Cutin último Adanca causaita cuj espiritumi tucurca.
46 Shinapish puntaca mana espíritu cuerpochu tiyarca. Ashtahuanpish aichayuj tulluyuj cuerpomi tiyarca. Chai qꞌuipami espíritu cuerpoca tiyarca.
47 Punta cꞌarica cai allpamantami. Paica ñutu allpamanta rurashcami. Cutin catij cꞌarica jahua pachamantami.
48 Ñutu allpamanta rurashcacunaca ñutu allpamanta rurashca punta cꞌari shinallatajmi. Cutin jahua pachapi cajcunaca jahua pachamanta shamuj shinallatajmi.
49 Ima shinami ñutu allpamanta rurashca cꞌariman rijchaj canchij. Chashnallatajmi jahua pachamanta shamujmanpish rijchaj cashun.
50 Shinapish huauquicuna, caitami cancunamanca nisha nini: aichapish, yahuarpish Diospaj Gobiernopica* mana yaicui tucunchu. Shinallataj imapish ismujca mana ismujca mana cai tucunchu.
51 ¡Ricuichij! Dios pacalla charicushcatami cancunamanca huillani: mana tucuicunachu huañushun.* Ashtahuanpish Diosmi tucui ñucanchijcunataca cambianga.
52 Ñapishmi ñahui quimllai shinallapi tucuri trompeta tocashca uyarijpica ñucanchijca cambiashca cashun. Trompetata tocajpimi huañushcacunaca causachishca cangacuna. Paicunaca mana ismuj cuerpotami charingacuna.
53 Ismujlla cuerpoca mana ismuj cuerpomi tucuna can. Huañujlla cuerpopish mana huañuj cuerpomi tucuna can.
54 Ismujlla cuerpo mana ismuj cuerpo tucujpi, huañujlla cuerpopish mana huañuj cuerpo tucujpica Dios quillcachishcapi nishcami pajtaringa. Chaipica: “Huañuica huiñaipajmi tucuchishca canga” ninmi.
55 “Huañui, ¿mishangapaj cambaj poderca maipitaj canyari? Huañui, ¿can tujsishpa huañuchinaca maipitaj canyari?”
56 Tujsishpa huañuchijca juchami. Moisesman cushca leymantami juchaca poderta charin.
57 ¡Shinapish Diostami pagui ninchij. Paimi ñucanchij Amito Jesucristomanta huañuita mishachun ayudan!
58 Chaimanta ñuca cꞌuyashca huauquicuna, sinchiyarishpa catichij, imapish cuyuchichunca ama saquichijchu. Shinallataj Amitopajta rurana mana yangalla cashcata yachashcamanta, Amitopajta ruranapi siempre ocupado caichij.
Notacuna
^ “Cefas” shutica Pedropaj caishuj shutimi.
^ O “huañuipi dormirishcacuna”.
^ O “huañuipi dormirishcacunapishmi”.
^ Griego rimaipica: “parousía” ninmi.
^ Griego rimaipica: “cuerpotaca” ninmi.
^ Griego rimaipica: “cuerpotaca” ninmi.
^ Griego rimaipica: “Tarpushca” ninmi.
^ Griego rimaipica: “tarpushca” ninmi.
^ Griego rimaipica: “tarpushca” ninmi.
^ Griego rimaipica: “tarpun” ninmi.
^ “Diospaj Gobierno” shimita huasha diccionariopi ricui.
^ O “huañuipi dormirishun”.
