1 Samuel 26:1-25
26 Tiempo qꞌuipaca Zif llajtamanta runacunaca Guibeaman rishpami Saulmanca: “Davidca Hakilá lomapi, Jesimón* chꞌimba ladopimi miticushca can” nircacuna.
2 Chaimi Saulca Israelmanta ashtahuan alli macanacuj 3.000 soldadocunahuan Zif chaquishca pambapi Davidta mashcanaman uriyarcacuna.
3 Saulca ñan cꞌuchupi caj Hakilá lomapimi carpa huasicunapi saquirirca. Hakilá lomaca Jesimón chꞌimbapimi can. Shinapish Davidca chaquishca pambapi causacushpami Saúl paita mashcanaman shamushcata uyarca.
4 Chaimi Davidca Saúl ciertotaj chai cꞌuchullapi cashcata yachangapaj huaquin runacunata pacalla ricunaman cacharca.
5 Chai qꞌuipaca Davidca Saulpaj carpa huasicuna maipi cashcamanmi rirca. Chai lugarman chayashpaca Saulpish, Saulpaj soldadocunata mandaj Abnerpish maipi dormicujtami ricurca. Abnerca Nerpaj churimi carca. Saulca carpa huasicuna chaupipimi dormicurca. Cutin paipaj soldadocunaca paipaj muyundijpimi carpa huasicunapi carcacuna.
6 Davidca hititacunapuramanta Ahimelecta, Joabpaj huauqui Zeruyapaj churi Abisaitaca: “Saúl saquiricushca carpa huasicunamanca ¿pitaj ñucahuan uriyasha nin?” nishpami tapurca. Chashna nijpimi Abisaica: “Ñucami canhuan rigrini” nishpa cutichirca.
7 Amsa tutapimi Davidpish, Abisaipish carpa huasicunaman yaicurcacuna. Chaipimi Saúl paipaj uma cꞌuchupi lanzata allpapi satichishpa dormicujta japircacuna. Abnerpish, soldadocunapish Saulpaj muyundijpimi dormicurcacuna.
8 Abisaica Davidmanca: “Diosmi cambaj contrataca cambaj maquipi entregacun. Paita lanzahuan pambacama pasajta satichun saquihuai. Lanzata pambacama yaicujta shuj cutinlla satinallamari minishtirin” nircami.
9 Pero Davidca Abisaimanca: “Paitaca ama llaquichichu. ¿Pitaj Jehová Dios agllashca runapaj jahuapi paipaj maquita churashpaca mana culpayuj cai tucungari?” nircami.
10 Shinallataj Davidca caitapishmi nirca: “Causaj Jehová Diospaj shutipimi jurani. Paitaca Jehová Diosllatajmi huañuchinga. Mana cashpaca ima shinami tucuicuna huañunchij, chashnallatajmi paipish shuj punllaca huañunga. Mana cashpaca shuj macanacuiman rishpami chaipi paipaj causaita chingachinga.
11 Jehová Dios ima shina yuyashcata yachashpaca, ¡maitataj Jehová Dios agllashca runapaj jahuapica ñuca maquitaca churanallatapish yuyashayari! Chaimanta Saulpaj uma cꞌuchupi caj lanzata, jarra yacutapish japishpa jacu” nircami.
12 Chai qꞌuipaca Saulpaj uma cꞌuchupi caj lanzata, jarra yacutami Davidca japirca. Chashna rurashpami chaimanta rircallacuna. Tucuicuna dormicushcamantami chaitaca ni pi mana ricurcacuna, ni pi mana yacharcacuna. Jehová Diosmi paicuna huañuita dormichun saquishca carca. Chaimantami ni maijan mana rijcharircacuna.
13 Davidca pugru pamba caishuj ladoman pasashpami urcu puntapi saquirirca. Paica Saúl maipi cashcamantaca carupimi carca.
14 Chaipimi Davidca soldadocunatapish, Nerpaj churi Abnertapish: “¡Abner! ¿Ñucata uyanguichu?” nishpa caparirca. Chashna caparijpimi Abnerca: “¿Reyta caparishpa puringapajca canca pitaj canguiyari?” nishpa cutichirca.
15 Chaimi Davidca Abnertaca: “Canca mana manchaj runamari cangui ¿nachu? Israel llajtapica can laya shujtajca mana tiyanchu. Shinaca ¿imamantataj cambaj amito reytaca mana alli cuidashcanguiyari? Carpa huasicunamanmari paita huañuchingapaj shuj soldado yaicushca.
16 Cambaj amitotaca mana alli cuidashcanguichu. Jehová Dios agllashca cancunapaj amitota mana alli cuidashcamantami cancunaca huañuna canguichij. Chaitaca causaj Jehová Diospaj shutipimi jurani. ¡Ricui! ¿Reypaj uma cꞌuchupi tiyacuj lanzapish, jarra yacupish maipitaj canyari?” nircami.
17 Chaimi Saulca David parlashcata cuentata cushpaca: “David, ñuca huahualla, ¿canchu parlacungui?” nirca. Chashna nijpimi Davidca: “Ari, ñuca amito reylla, ñucami rimacuni” nishpa cutichirca.
18 Shinallataj Davidca: “Ñuca amito, ¿canta sirvijtaca imamantataj caticunguiyari? ¿Imatataj rurashcaniyari? ¿Ima culpatataj chariniyari?
19 Ñuca amito rey, canta sirvijta uyahuai. Jehová Dios canta ñucapaj contra churashca cajpica shuj grano ofrendatami cugrini. Pai chaita chasquichun.* Pero runacuna canta ñucapaj contra churashca cajpica Jehová Diospaj ñaupajpi maldicishcacuna cachun. Paicunaca Jehová Diospaj herenciapi ama causai tucuchunmi ñucataca llujshichishpa cachashcacuna. Chashnamari ‘¡Shujtaj dioscunata adoranaman ri!’ nicuj shina can.
20 Cunanca Jehová Dios mana causan llajtapi ñuca huañuchunca ama saquihuaichu. Urcucunapi tiyaj yutu pajarota mashcacuj shinamari Israel llajtamanta reyca shuj piquillata mashcanaman llujshishca” nircami.
21 Chashna nijpimi Saulca: “Chaita rurashpaca juchatamari rurashcani. David, ñuca huahualla, tigramui. Mana ashtahuan canta llaquichishachu. Ñuca causai cambaj ñaupajpi valishca cashcataca cunanmi ricuchishcangui. Caicunata rurashpaca ñucaca muspa shina tucushpamari mana allita ruracushcani. Yallitajmari pandarishcani” nishpa cutichirca.
22 Chaimi Davidca cashna nishpa cutichirca: “Reypaj lanzaca caipimi can. Cambaj runacunamanta shuj runa mashcanaman shamuchun.
23 Jehová Diosca cashcata rurajcunaman, paita cazujcunamanpishmi paganga. Jehová Dios cunan canta ñuca maquipi entregajpipish ñucaca Jehová Diospaj agllashca runapaj jahuapica ñuca maquitaca mana churasha nircanichu.
24 Ima shinami cunanca cambaj causai ñucapajca valishca carca, chashnallataj ñuca causaipish Jehová Diospaj ñaupajpica valishca cachun. Shinallataj tucui llaquicunamanta paillataj ñucata quishpichichun” nircami.
25 Chashna nijpimi Saulca: “David, ñuca huahualla, Diosllataj canta bendiciachun. Canca jatun cosascunatamari ruragringui. Tucui can rurashcacunapish allimari llujshinga” nishpa cutichirca. Chashna nijpimi Davidca pai ricushca ñanllatataj catishpa rirca. Cutin Saulca paipaj huasimanmi tigrarca.
Notacuna
^ Caitaca “chaquishca pamba” nishpapishmi traducishcacuna.
^ Caipica perdonta chasquinamantami parlacun.
