1 Samuel 28:1-25
-
Saulca En-Dorpimi huañushcacunahuan parlaj huarmipajman rin (1-25)
28 Chai punllacunapica filisteocunami grupo soldadocunata israelitacunapaj contra macanacuchun tandachirca. Chaimi rey Akisca Davidmanca: “Canpish, cambaj runacunapish ñucahuan macanacunaman rina cashcataca allimi yachangui” nirca.
2 Chaita uyashpami Davidca: “Canta sirvij imata ruragrijtaca allimi yachangui” nishpa cutichirca. Chaimantami Akisca: “Cantaca ñucata siempre cuidaj* cachunmi churasha” nirca.
3 Samuelca ñami huañushca carca. Tucui israelitacunami paimanta llaquirishpa pai causashca Ramá llajtapi Samuelta pambashcacuna carca. Paica chai llajtapimi causaj carca. Saulca Israelmantami huañushcacunahuan parlaj runacunata, adivinocunatapish anchuchishca carca.
4 Filisteocunaca tandanacushpami Sunem llajtaman rishpa, chaipi carpa huasicunapi saquirircacuna. Cutin Saulca Israelmanta soldadocunata tandachishpami Guilboa urcupi carpa huasicunapi saquirircacuna.
5 Saulca filisteo soldadocunata ricushpami yallitaj mancharirca.
6 Saúl imata rurangapaj Jehová Diosta tapujpipish, Jehová Diosca muscuicunahuanpish, Urimhuanpish, profetacunahuanpish mana nunca cutichircachu.
7 Chaimi Saulca paita sirvijcunamanca: “Huañushcacunahuan parlaj shuj huarmita mashcagrichij. Paitami tapugrisha nini” nishpa mandarca. Chashna nijpimi paita sirvijcunaca: “En-Dor llajtapimi huañushcacunahuan parlaj shuj huarmi tiyan” nishpa cutichircacuna.
8 Chaimi Saulca shujtaj laya ropata churarishpa, paita sirvij ishqui runacunata compañachun pushashpa huañushcacunahuan parlaj huarmita tuta ricunaman rirca. Chaiman chayashpaca Saulca: “Espiritucunata cayashpa shamuj punllacunapi ima tucunata adivinahuai. Ñuca pita cayachun nishcata cayai” nircami.
9 Pero chai huarmica: “Saúl imata rurashcataca canca allimi yachana cangui. Paica cai llajtamantami huañushcacunahuan parlajcunata, adivinocunata anchuchirca. Shinaca ¿shuj trampata churashpachu ñucataca huañuchisha ningui?” nishpami cutichirca.
10 Chashna nijpimi Saulca Jehová Diospaj shutipi jurashpaca: “¡Caimantaca canca ima culpayuj mana tucunguichu, chaitaca causaj Jehová Diospaj shutipimi jurani!” nirca.
11 Chaita uyashpami chai huarmica: “¿Pitataj cayachun ningui?” nishpa tapurca. Chashna nijpimi Saulca: “Samueltami cayachun nini” nishpa cutichirca.
12 Chai huarmi “Samuelta”* ricushpaca, sinchita caparishpami Saultaca: “¿Imamantataj ñucata umashcanguiyari? Canca Saulmi cangui” nirca.
13 Rey Saulca: “Ama manchaichu, pero imata ricucushcata huillai” nircami. Shina nijpimi chai huarmica: “Allpamanta pitajshi huichiyacujtami ricuni. Paica shuj dios shinami can” nishpa cutichirca.
14 Chai ratomi paica: “¿Ima shinataj can?” nishpa tapurca. Chaimi chai huarmica: “Huichiyacujca mayorllami can. Paica sin mangas churanata churashcami can” nishpa cutichirca. Saulca “Samuel” cashcata cuentata cushpami pambacama cungurishpa cumurirca.
15 Chaimi “Samuelca” Saultaca: “¿Imamantataj ñucata caiman huichiyachishpaca molestashcangui?” nishpa tapurca. Chashna tapujpimi Saulca: “Ñucaca sinchi llaquipimari cani. Filisteocunaca ñucapaj contramari macanacucuncuna. Diospish ñucamantamari caruyashca. Chaimantami profetacunahuanpish, muscuicunahuanpish ña imata mana cutichin. Chaimi ñuca imata rurana cashcata huillachun canta cayashcani” nishpa cutichirca.
16 Pero “Samuelca” cashnami nirca: “Jehová Diosca canmantami caruyashca. Cunanca paica cambaj enemigomi can. Shinaca ¿imamantataj ñucataca tapunaman shamunguiyari?
17 Jehová Diosca ñucaman huillachishca shinami ruranga. Jehová Diosca Israel llajtata can mandanataca cambaj maquimanta anchuchishpami shujtaj mandajman cunga. Davidmanmi cunga.
18 Canca Jehová Dios nishcacunataca mana cazurcanguichu. Diosta pꞌiñachij amalequitacunatapish mana tucuchircanguichu. Chaimantami cunanca Jehová Diosca chaita ruracun.
19 Shinapish Jehová Diosca israelitacunatapish, cantapish filisteocunapaj maquipimi entreganga. Cayaca cantapish, cambaj churicunatapishmi huañuchingacuna. Chaimi cancunaca ñucahuan canguichij. Shinallataj Jehová Diosca Israelmanta soldadocunataca filisteocunapaj maquipimi entreganga” nircami.
20 Chai ratomi Saulca urmashpa pambapi chutajlla siririshca saquirirca. “Samuel” nishca shimicunata uyashpami Saulca yallitaj manchai callarirca. Shinallataj tucui punlla, tucui tuta imata mana micushcamantami fuerza illaj carca.
21 Chai huarmi Saulpajman cꞌuchuyashpaca Saúl preocupado cashcatami ricurca. Chashna ricushpami chai huarmica: “Ñuca amolla, can mandashcatami cazurcani. Can nishcacunata rurangapajca ñuca causaitapishmi peligropi churarcani.
22 Cunanca ñuca amolla, ñuca nishcata cazupai. Pedazo tandata canman cuchun saqui. Chashnami fuerzasta japishpa can ricushca ñanta cati tucungui” nircami.
23 Chashna nijpipish Saulca mana cazushpami: “Ñucaca imata mana micushachu” nirca. Shina nijpimi paita sirvijcunapish, chai huarmipish micui nishpa rogarijpi paica micurca. Chaimi Saulca pambamanta jatarishpa camapi tiyarirca.
24 Chai huarmica paipaj huasipimi huirayashca shuj bizita charirca. Chai bizita japishpami rato huañuchirca. Shinallataj harinata japishpa masashpami levadura illaj tandata rurarca.
25 Chashnami Saulmanpish, paipaj sirvijcunamanpish chai huarmica micunata curca. Chaimi paicunaca micui callarircacuna. Chai huashaca jatarishpami tutata rircacuna.
