1 Samuel 5:1-12
5 Filisteocunaca Diospaj Arcata japishpami Ebenézer lugarmanta Asdod llajtaman aparcacuna.
2 Qꞌuipaca filisteocunaca Diospaj Arcataca Dagón diosta adorana huasiman apashpami chai rurashcalla Dagón diospaj cꞌuchupi churarcacuna.
3 Asdod llajtapi causajcunaca cayandij punlla utca rishpaca paicunapaj rurashcalla Dagón dios pambapi urisingaman siricujtami japircacuna. Chai rurashcalla diosca Jehová Diospaj Arca ñaupajpimi urmashca carca. Paicunaca chai urmashcata japishpami ñaupa tiyacushcallapitaj churarcacuna.
4 Cayandij punlla utca rishpaca Jehová Diospaj Arca ñaupajpi Dagón dios urisingaman siricujtami ricurcacuna. Chai pungu yaicunpica Dagón diospaj umapish, paipaj ishqui maquicunapishmi utushca siricurca. Pescado shina caj partellami* mana pꞌaquirishca carca.
5 Chaimantami cunan punllacunacama Dagón diospaj sacerdotecunapish, Asdod llajtapi Dagón diosta adorana huasiman yaicujcunapish chai pungu yaicunpica ni pi mana saruncuna.
6 Jehová Diospaj maquica Asdodmanta, chai muyundijpi caj llajtacunamanta gentecunatami hemorroides ungüihuan castigarca.
7 Asdodmanta runacunaca ima tucucushcata ricushpaca: “Israelitacunapaj Diospaj Arcaca mana ñucanchijhuan saquiri tucunchu. Paica ñucanchijtapish, Dagón diostapishmi castigashca” nircacunami.
8 Chaimantami filisteocunapaj tucui mandajcunata tandachishpaca: “¿Israelitacunapaj Diospaj Arcahuanca imatataj rurashunri?” nishpa tapurcacuna. Chaimi paicunaca: “Gat llajtamanmi israelitacunapaj Diospaj Arcataca apana canchij” nircacuna. Chashna nijpimi Arcataca chaiman aparcacuna.
9 Arcata chaiman apajpica Jehová Diosca chai llajtata castigashpami manchachirca. Chai llajtapi causaj tucui gentecunatami uchillacunatapish, jatuncunatapish castigarca. Chaimantami chai gentecunapica hemorroides ungüi llujshirca.
10 Chaimi Diospaj Arcataca Ecrón llajtaman aparcacuna. Arcata chaiman chayachijpica ecronitacunaca: “¡Ñucanchijtapish, ñucanchij llajta gentecunatapish huañuchingapajmari israelitacunapaj Diospaj Arcata apamushcanguichij!” nishpami caparircacuna.
11 Chaimantami filisteocunapaj tucui mandajcunata tandachishpaca: “Israelitacunapaj Diospaj Arcataca caimanta llujshichichij. Ñucanchijpish, ñucanchij llajta gentecunapish ama huañungapajca chai Arcataca maipi cashcallamantaj tigrachichij” nircacuna. Chai llajtapica tucuicuna huañunata yuyashcamantami manchaihuan carcacuna. Diosca paicunataca sinchitami castigashca carca.
12 Mana huañushcacunaca hemorroides ungüihuanmi castigashca carcacuna. Chai llajtapi causaj gentecunaca ayudachun nishpami caparircacuna. Paicuna caparishcaca jahua pachacamami uyarirca.
Notacuna
^ Hebreo rimaipica: “Dagonllami” ninmi. “Dagón” shutita huasha diccionariopi ricui.
