1 Samuel 7:1-17
7 Quiryat-Jearim llajtamanta runacuna shamushpami Jehová Diospaj Arcata aparcacuna. Paicunaca lomapi saquirij Abinadabpaj huasimanmi Arcataca huichiyachircacuna. Shinallataj Abinadabpaj churi Eleazartami Jehová Diospaj Arcata cuidachun agllarcacuna.*
2 Quiryat-Jearimman Arcata apamushcamantaca achca tiempomi pasarca. Arcaca 20 huatacunatami chaipi pasarca. Israel llajtapi tucui causajcunaca Jehová Diostami mashcai callarircacuna.*
3 Samuelca Israelpi causajcunataca: “Cancuna Jehová Diospajman tucui shunguhuan tigrashun nishpaca shujtaj llajtamanta dioscunata, Astoret* shuti rurashcalla dioscunatapish anchuchishpa Jehová Diosllata tucui shunguhuan sirvichij. Chashna rurajpimi Diosca cancunataca filisteocunapaj maquimanta quishpichinga” nircami.
4 Israelitacunaca Baal dioscunata, Astoret shuti rurashcalla dioscunata anchuchishpami Jehová Diosllata sirvi callarircacuna.
5 Chaimi Samuelca: “Mizpá llajtapi tucui israelitacunata tandachichij. Chaipimi ñucaca Jehová Diosta cancunamanta mañasha” nirca.
6 Shina nijpimi israelitacunaca Mizpá llajtapi tandanacurcacuna. Chashnami yacuta llujshichishpa Jehová Diospaj ñaupajpi chai yacuta tallircacuna. Shinallataj chai punllaca ayunarcacunapishmi. Chashna rurashpami paicunaca: “Jehová Diospaj ñaupajpimi juchata rurashcanchij” nircacuna. Samuelca Mizpá llajtapimi israelitacunapaj juez shina sirvi callarirca.
7 Filisteocunaca israelitacuna Mizpá llajtapi tandanacushcatami yachaj chayarcacuna. Chaimi filisteocunata mandajcunaca israelitacunahuan macanacungapaj huichiyarcacuna. Chaita yachaj chayashpami israelitacunaca filisteocunata manchai callarircacuna.
8 Chaimi israelitacunaca Samuelmanca: “Ñucanchij Jehová Dios ñucanchijta ayudachun, filisteocunapaj maquimanta ñucanchijta quishpichichun paita mañanataca ama saquichu” nircacuna.
9 Chashna nijpimi Samuelca shuj huahua ovejata japishpa Jehová Diosman rupachishca ofrendata shina curca. Samuelca Jehová Dios israelitacunata ayudachunmi rogarishpa mañarca. Chaimi Jehová Diosca pai mañashcata cutichirca.
10 Samuel rupachishca ofrendata cungacamami filisteocunaca israelitacunapaj contra macanacungapaj cꞌuchuyacurcacuna. Chai punllami Jehová Diosca filisteocunapaj jahuapi sinchita cꞌulun nichishpa paicunata muspachirca. Chashnami filisteocunaca israelitacunapaj ñaupajpi tucuchishca carcacuna.
11 Israelitacunaca Mizpá llajtamanta llujshishpami filisteocunata catircacuna. Shinallataj israelitacunaca Bet-Car pueblo ura ladocamami filisteocunata huañuchishpa catircacuna.
12 Chai qꞌuipaca Samuelca shuj rumita japishpami Mizpá, Jesaná llajtacunapaj chaupipi churarca. Chai rumitaca Ebenézer* nishpami shutichirca. Paica: “Cunancamami Jehová Diosca ñucanchijta ayudacushca” nircami.
13 Israelitacunaca filisteocunatami misharcacuna. Chaimantami filisteocunaca Israel llajtamanca ña mana ashtahuan yaicurcacuna. Jehová Diosca Samuel causashca tucui punllacamami filisteocunapaj contra carca.
14 Filisteocuna israelitacunata quichushca llajtacunataca israelitacunami cutinllataj japircacuna. Chai llajtacunaca Ecronmantaca Gatcamami carca. Israelitacunaca chai llajtacunapaj allpacunatami filisteocunapaj maquimanta tigra japircacuna.
Shinallataj israelitacunaca amorreocunahuanmi tranquilo causarcacuna.
15 Samuelca huañuna horascamami israelitacunata juzgashpa causarca.
16 Samuelca cada huatami Betel llajtata, Guilgal llajtata, Mizpá llajtata visitaj carca. Tucui chai llajtacunapimi israelitacunataca juzgaj carca.
17 Samuelca Ramá llajtamanmi tigraj carca. Chaipimi paipaj huasica carca. Chaipipish israelitacunatami juzgaj carca. Ramá llajtapimi Jehová Diospaj altartapish shayachirca.
Notacuna
^ Hebreo rimaipica: “chuyayachircacuna” ninmi.
^ O “Diospaj ñaupajmimi llaquirircacuna”.
^ “Astoret” shutita huasha diccionariopi ricui.
^ “Ebenézer” shutica ‘ayudaj rumi’ nisha ninmi.
