1 Tesalonicenses 1:1-10
1 Ñucaca Pablomi cani. Silvanopish,* Timoteopish caipimi ñucahuan can. Cai cartataca Tesalónica llajtapi caj congregacionmanmi cachanchij. Cancunaca Yaya Dioshuanpish, Amito Jesucristohuanpishmi shuj shinalla canguichij:
Diosca yallitaj llaquij cashcata ricuchichun. Sumaj causaitapish cancunaman cuchun.
2 Ñucanchij mañacushpaca tucui cancunata yuyarishpami Diostaca siempre pagui ninchij.
3 Diospi feta charishcamantapish, cꞌuyaimantapish cancuna allicunata rurashcataca ñucanchij Yaya Diospaj ñaupajpica mana nunca cungarinchijchu. Ñucanchij Amito Jesucristopi shuyacushcamanta llaquicunata ima shina ahuantashcatapish manataj cungarinchijchu.
4 Dios cꞌuyashca huauquicuna, cancunata Dios agllashcataca yachanchijmi.
5 Cancunaca ñucanchij shimillahuan alli huillaicunata huillashcataca mana uyarcanguichijchu. Ashtahuanpish espíritu santo ayudajpimi uyarcanguichij. Ñucanchij huillashca shimicuna mana llulla cashcataca tucui shunguhuanmi crircanchij. Ñucanchij huillashca shimicunami cancunataca achcata ayudashca.
6 Cancunaca achca llaquicunahuan cashpapish huillashcataca cushicuihuanmi chasquircanguichij. Chai cushicuitaca espíritu santomi cun. Chaimi cancunaca Amito Jesús shinallataj, ñucanchij shinallataj rurashcanguichij.
7 Chaita rurashpami cancunaca Macedonia llajtapi, Acaya llajtapi caj tucui Jesusta catijcunapaj alli ejemplo tucurcanguichij.
8 Cancuna huillashcamantami Jehová* Diospaj shimitaca Macedonia llajta gentecunapish, Acaya llajta gentecunapish, tucui ladocunapi causaj gentecunapish uyashcacuna. Shinallataj cancuna Diospi feta charishcatapish tucui ladocunapi caj gentecunami uyashcacuna. Chaimantami imata mana ni tucunchij.
9 Chai gentecunaca punta cutin cancunahuan ñuca ima shina rijsinacushcata, cancunapaj rurashcalla dioscunata ima shina saquishcata, causaj, mana llulla Diosta sirvijcuna tucungapaj paipajman cancuna tigrarishcatapishmi parlashpa catincuna.
10 Cancunaca paipaj Churi jahua pachamanta shamunata shuyangapajmi Diospajman tigrarircanguichij. Diosca paipaj Churi Jesustami huañushcacunapaj chaupimanta causachirca. Jesusmi Dios pꞌiñarishpa llaquichinamanta ñucanchijtaca quishpichinga.
Notacuna
^ “Silvano” shutica Silaspaj caishuj shutimi.
^ “Jehová” shutita huasha diccionariopi ricui.
