1 Tesalonicenses 4:1-18
4 Huauquicuna panicuna, ñucanchij yachachishca shinallatajmi Dios munashca shina causacunguichij. Shinapish cunanca Amito Jesuspaj shutipimi chaita ashtahuan rurashpa catichun mañapanchij, rogapanchij.
2 Amito Jesuspaj shutipi cancunaman mandashcacunata cushcataca allimi yachanguichij.
3 Diosca cancuna jucha illajcuna cachun, huainayanamanta* caruyachunmi munan.
4 Jucha illaj cangapaj, Diospaj ñaupajpi alli ricuringapajpish* cada unomi quiquin cuerpota jarcarinata yachana canguichij.
5 Diosta mana rijsij llajta gentecuna shinaca ama caichijchu. Paicunaca shuj cꞌarihuan o shuj huarmihuan yallitaj chayarina munaitami charincuna. Chai munaicunataca manataj saquincunachu.
6 Maijanpish paipaj huauquitaca ima millaita mana ruranachu can, mana llaquichinachu can. Chashna rurajcunataca Jehová* Diosca castigangami. Caicunamantaca ñami cancunaman huillarcanchij. Shinallataj achijtami intindichircanchij.
7 Diosca ñucanchijtaca mapa causaita charichunca mana cayarcachu. Ashtahuanpish jucha illajcuna cachunmi cayarca.
8 Maijanpish cai yachachishcacunata mana chasquijca mana runacunatachu mana chasquin. Ashtahuanpish cancunaman espíritu santota cuj Diostami mana chasquin.
9 Cutin cancunamanca familia ucupi shina cꞌuyaita ricuchinamantaca mana quillcanata minishtinchijchu. Diosllatajmi cancunamanca caishuj chaishuj cꞌuyanacunata yachachicun.
10 Caitaca ñami Macedoniapi caj tucui huauquicunahuan ruracunguichij. Shinapish huauquicuna, chaita ashtahuan rurashpa catichunmi animanchij.
11 Ñucanchij mandashca shinallataj sumajta causangapaj, shujtajcunapaj ruraicunapi ama satiringapaj,* cancunapaj maquihuan trabajangapajpish sinchita esforzarichij.
12 Chashnami cancunaca imata mana minishtinguichij, gentecunapish cancuna alli causacujtami ricungacuna.
13 Huauquicuna, huañushcacunahuan* ima tucuna cashcata intindichunmi munanchij. Chashnami cancunaca imata mana shuyacuj shinaca mana llaquilla canguichij.
14 Jesús huañushcata, paita causachishcatapishmi crinchij. Chaita crishpaca Jesusta catij huañushcacunatapish* Jesushuan tandalla cachun Dios causachinatami crinchij.
15 Jehová* Dios nishca shinaca caitami ninchij: Amito Jesús tigramuna punllacunacama* causacujcunaca jahua pachapimi causachishca cashun. Shinapish ñaupaman huañushcacunatarajmi puntapica causachinga. Paicunapaj qꞌuipami ñucanchijtaca causachinga.
16 Ñucanchij Amito Jesusca jahua pachamanta uriyamushpami Diospaj trompetahuan, angelcunata mandaj vozhuan sinchita caparinga. Chaipica Cristohuan shuj shinalla huañushcacunami puntaca causachishca cangacuna.
17 Chai qꞌuipami causacujcunaca Amito Jesushuan huairapi tupangapaj paicunahuan tandalla pꞌuyupi huichiyashun. Chashnami Amito Jesushuan huiñai huiñaita cashun.
18 Shinaca caishujmanta chaishujmanta cai shimicunahuan cushichinacushpa catichij.
Notacuna
^ Griego rimaipica: “pornéia” ninmi. “Huainayana” shimita huasha diccionariopi ricui.
^ O “gentecuna respetachunpish”.
^ “Jehová” shutita huasha diccionariopi ricui.
^ O “mitiringapaj”.
^ O “huañuipi dormirishcacunahuan”.
^ O “huañuipi dormirishcacunatapish”.
^ “Jehová” shutita huasha diccionariopi ricui.
^ Griego rimaipica: “parousía” ninmi.
