2 Crónicas 11:1-23
11 Rehoboam Jerusalenman chayamushpaca chai ratomi Judapaj familiamantapish, Benjaminpaj familiamantapish macanacunata alli yachaj* 180.000 soldadocunata tandachirca. Paicunataca israelitacunahuan macanacushpa Rehoboamman gobiernota tigrachingapajmi tandachirca.
2 Chai qꞌuipami profeta* Semayamanca Jehová Diosca cashna nirca:
3 “Judá llajtata mandaj Salomonpaj churi Rehoboamtapish, Judá llajtapi, Benjamín llajtapi caj tucui israelitacunatapish cashna ni:
4 ‘Jehová Diosca cancunataca: “Cancunapaj huauquicunahuan macanacungapajca ama huichiyaichijchu. Cada uno cancunapaj huasiman tigraichij. Ñucami chashna tucuchunca saquishcani” ninmi’ ningui” nircami. Paicunaca Jehová Diospaj nishcatami cazurcacuna. Chaimi Jeroboanhuanca mana macanacushpa tigrarcacuna.
5 Rehoboamca Jerusalenpimi causarca. Paica Judá llajtapica muyundijta pircashca llajtacunatami rurarca.
6 Chai llajtacunaca Belén, Etam, Tecoa,
7 Bet-Zur, Socó, Adulam,
8 Gat, Maresá, Zif,
9 Adoraim, Lakís, Azecá,
10 Zorá, Ayalón, Hebronmi carca. Judá llajtapi tiyaj llajtacunapish, Benjamín llajtapi tiyaj llajtacunapish muyundijtami pircashca carca.
11 Ashtahuancarin muyundijta pircashca llajtacunatami ashtahuan sinchiyachirca. Chai llajtacunapica pushajcunatami churarca. Shinallataj micunacunata, aceiteta, vinotami curca.
12 Tucui cai llajtacunamanmi jatun escudocunata, lanzacunata curca. Chashnami chai llajtacunataca ashtahuan sinchita rurarca. Paica Judá llajtata, Benjamín llajtatami mandashpa catirca.
13 Tucui Israelpi caj sacerdotecunapish, levitacunapish paicunapaj allpacunata saquishpami Rehoboampaj parte tucurcacuna.
14 Jeroboanpish, paipaj churicunapish levitacunataca Jehová Diospaj sacerdote shina sirvina puestocunatami quichushcacuna carca. Chaimantami levitacunaca paicunapaj michina allpacunata, ima shujtaj charinacunatapish saquishpa Judaman, Jerusalenman shamurcacuna.
15 Jeroboanca paipaj propio sacerdotecunatami adorana lugarcunapi* sirvichun, cabraman rijchaj demoniocunata sirvichun, pai rurashca bizicunata sirvichun churarca.
16 Israelitacunapaj familiacunaca tucui shunguhuan israelitacunapaj Jehová Diosta sirvinatami decidishca carcacuna. Paicunapaj ñaupa yayacunapaj Jehová Diosman sacrificiocunata rurangapajmi sacerdotecunata, levitacunata Jerusalenman catishpa rircacuna.
17 Shinallataj quimsa huatatami Judá llajtapaj gobiernota sinchiyachircacuna. Salomonpaj churi Rehoboamtapishmi apoyarcacuna. Paicunaca quimsa huatacunatami Diostaca David laya, Salomón laya cazushpa causarcacuna.
18 Rehoboamca Jerimotpaj ushushi Mahalat huarmihuanmi cazararca. Jerimotca Davidpaj churimi carca. Shinallataj Mahalatca Abihailpaj ushushimi carca. Abihailca Eliabpaj ushushimi carca. Eliabca Jesepaj churimi carca.
19 Tiempohuanca Mahalatca Rehoboamhuanmi Jeús, Semarías, Zaham churicunata charirca.
20 Rehoboamca Mahalathuan cazarashca qꞌuipaca Absalonpaj nieta Maacá huarmihuanmi cazararca. Tiempohuanca paica Rehoboamhuanca Abías, Atái, Zizá, Selomit churicunatami charirca.
21 Rehoboamca paipaj shujtaj huarmicunamanta, caishuj huarmicunamantapish* yallica Absalonpaj nieta Maacatami ashtahuantajca cꞌuyarca. Rehoboamca 18 huarmicunata, 60 caishuj huarmicunatami charirca. Shinallataj paica 28 churicunata, 60 ushushicunatami charirca.
22 Rehoboamca Maacapaj churi Abiastami paipaj huauquicunapuramantaca mandachun churarca. Paica Abiastami rey cachun munarca.
23 Ashtahuanpish alli yuyashpami huaquin paipaj churicunataca tucui Judá llajtacunaman, Benjamín llajtacunaman cacharca. Chai llajtacunaca muyundijta pircashcami carca. Shinallataj paicunamanca tucui imalla minishtishcatami curca. Achca huarmicunatapishmi paicunapaj mashcarca.
Notacuna
^ Hebreo rimaipica: “agllashca” ninmi.
^ O “Diosta sirvij”.
^ Hebreo rimaipica: “alto lugarcunapi” ninmi.
^ O “concubinacunamantapish”.
