2 Crónicas 12:1-16
12 Rehoboampaj gobiernoca sinchimi tucurca. Chaimi paipish sinchi tucurca. Chai qꞌuipami Rehoboamca Jehová Diospaj Leyta saquirca. Tucui israelitacunapish Diospaj Leytami saquircacuna.
2 Israelitacuna Jehová Diosta saquishcamantami pichca huatacunata rey Rehoboam mandacujpica Egipto llajtamanta rey Sisacca Jerusalenta llaquichinaman huichiyarca.
3 Rey Sisacca 1.200 carretacunata, 60.000 caballopi purijcunata, mana yupaipaj yallitaj soldadocunatami charirca. Tucui paicunaca Egiptomantami Sisac runahuan shamurcacuna. Cai soldadocunaca libiocuna, sukiyimcuna, etiopecunami carca.
4 Sisacca Judapi tiyaj muyundijta pircashca llajtacunatami mishashpa japirca. Chashnami Jerusalenmanpish chayarca.
5 Profeta Semayaca Rehoboamtapish, Judá llajtata mandajcunatapish ricunamanmi shamurca. Paicunaca Sisac runata manchashcamantami Jerusalenpi tandanacushcacuna carca. Paicunamanca: “Jehová Diosca: ‘Cancunami ñucataca saquishcanguichij. Chaimi ñucapish Sisacpaj maquipi cancunataca saquishcani’ ninmi” nircami.
6 Chashna nijpimi israelitacunata mandajcunapish, reypish humillarishpaca: “Jehová Diosca cashcata rurajmi can” nircacuna.
7 Jehová Diosca paicuna humillarishcatami ricurca. Chaimi Semayaca Jehová Diosmanta cai huillaita chasquirca. Diosca: “Paicunaca humillarishcacunami. Chaimantami paicunataca mana tucuchisha. Ñallami paicunataca quishpichisha. Sisac runa Jerusalenta tucuchichunpish mana saquishachu.
8 Shinapish paicunaca Sisac runata sirvijcunami tucungacuna. Chashnami ñucata sirvinapish, shujtaj llajtamanta reycunata sirvinapish chꞌican cashcata yachangacuna” nircami.
9 Egipto llajtamanta rey Sisacca Jerusalenta llaquichinamanmi huichiyarca. Chashnami Jehová Diospaj huasimantapish, reypaj huasimantapish* valishca cosascunata aparca. Tucuitami aparca, Salomón rurashca oro escudocunatapishmi aparca.
10 Chaimi rey Rehoboamca oro escudocunapaj randica cobremanta escudocunata rurarca. Chaicunataca guardiacunata* mandajcuna cuidachunmi churarca. Paicunaca reypaj huasi pungupi cuidajcunami carca.
11 Jehová Diospaj huasiman rey cada shamushcatami guardiacunaca escudocunata apashpa paihuan rijcuna carca. Chai qꞌuipaca guardiacunapaj cuartopimi cutinllataj huaquichijcuna carca.
12 Rey humillarijpimi Jehová Diosca pꞌiñarishca canata saquirca. Chashnami paicunataca mana tucui tucuchirca. Shinallataj Judá llajtapica alli ruraicunami tiyarca.
13 Rey Rehoboamca Jerusalenpimi ashtahuan poderyuj tucushpa catirca. Chashnami paica mandashpa catirca. Rehoboamca 41 huatacunata charishpami rey tucurca. Paica Jerusalenpica 17 huatacunatami mandarca. Chai llajtatami Jehová Diosca paipaj shutita chaipi jatunyachichun tucui israelitacunapaj familiacunamanta agllashca carca. Rehoboampaj mamaca Ammón llajtamanta Naamá shutimi carca.
14 Shinapish Rehoboamca paipaj shungupica Jehová Diosta mashcanataca mana decidishcachu carca. Chaimantami mana allicunata rurarca.
15 Rehoboampaj causaimantaca callarimanta tucuringacamami cada familiamanta registrashcacunapi quillcashca tiyacun. Chaica profeta Semayapaj quillcashca shimicunapi, muscuipi shina ricushcacunata huillaj Idopaj quillcashcacunapipishmi tiyacun. Rehoboamhuan Jeroboanhuanca siempremi macanacuicuna tiyarca.
16 Qꞌuipaca Rehoboamca huañurcami.* Paitaca Davidpaj Llajtapimi pambarcacuna. Chai huashaca paipaj churi Abiasmi catij rey tucurca.
Notacuna
^ O “palaciomantapish”.
^ Hebreo rimaipica: “callpajcunata” ninmi.
^ O “paipaj ñaupa yayacunahuanmi samarirca”.
