2 Crónicas 2:1-18
-
Salomonca Diospaj huasita shayachingapajmi tucuita allichirca (1-18)
2 Salomonca Jehová Diospaj shutita jatunyachingapajmi shuj huasita shayachichun mandarca. Shinallataj pai mandangapajpish shuj huasitami* shayachichun mandarca.
2 Salomonca 70.000 trabajadorcunatami* churarca. Urcucunapi rumicunata pꞌaquij 80.000 runacunatapishmi churarca. 3.600 runacunatapish trabajadorcunata ricushpa trabajachichunmi churarca.
3 Salomonca Tiro llajtata mandaj rey Hiramman cashna nishpa huillachunpishmi cacharca: “Ñuca yaya David pai causangapaj shuj huasita shayachicujpica canca cedro caspicunatamari cacharcangui. Chashnallataj ñucamanpish cachapai.
4 Cunanca ñuca Jehová Diospaj shutita jatunyachingapajmi shuj huasita* shayachigrini. Chai huasitaca Diospajlla chꞌicanyachingapaj, mishquijllata ashnacuj inciensota paipaj ñaupajpi rupachingapaj, montonashca tandacunata* chaipi siempre churangapaj, rupachishca ofrendacunatapish tutamantapi, chishipi, sabadopi, llullu lunapi, ñucanchij Jehová Diospaj chꞌican chꞌican fiesta punllacunapi cungapajpishmi shayachigrini. Caitaca israelitacunaca huiñai huiñaicamami pajtachinataj can.
5 Ñucanchij Diosca tucui dioscunata yalli jatun Diosmari. Chaimantami ñuca shayachigrishca huasica yallitaj sumaj canga.
6 Shinapish ¿Diospaj shuj huasitaca pitaj shayachi tucunyari? Jahua pachapish, ashtahuan jahua pachamanta jahuaman caj jahua pachacunapish paipaj shuj huasita rurangapajca mana pajtanchu. ¿Ñucaca paipaj shuj huasita shayachingapajca imataj caniyari? Shinapish paipaj ñaupajpi sacrificiocunata rupachishpa cushnichingapajmi shuj huasillata shayachi tucuni.
7 Cunanca orohuan, cullquihuan, cobrehuan, fierrohuan, morado puchcahuan, puca carmesí puchcahuan, azul puchcahuan alli trabajanata yachaj, alli labranata yachaj shuj artesano runata cachai. Paica Judapipish, Jerusalenpipish alli trabajaj ñuca artesanocunahuanmi trabajanga. Paicunataca ñuca yaya Davidmi agllarca.
8 Líbano urcucunamantaca cedro caspicunata, enebro caspicunata, sándalo caspicunatapish cachapai. Ñucaca canta sirvijcuna Líbano urcucunapi yuracunata pꞌitinata alli yachajcuna cashcatami yachani. Ñucata sirvijcunaca canta sirvijcunahuanmi tandalla trabajangacuna.
9 Chashnami paicunaca achca caspicunata allichingacuna. Ñuca shayachigrishca huasica yallitaj sumajmi cana can.
10 Yuracunata pꞌitishpa canta sirvij yantajcunamanca cai micunacunatami cusha: 20.000 coro trigota,* 20.000 coro cebadata,* 440.000 litro* vinota, 440.000 litro aceitetami cusha” nircami.
11 Tiro llajtamanta rey Hiramca Salomonmanca: “Jehová Diosca paipaj pueblota cꞌuyashcamantami canta rey cachun agllashca” nishpami quillcashpa cacharca.
12 Shinallataj Hiramca cashnapishmi nirca: “Israelitacunapaj Jehová Diosca alabashca cachun. Paimi jahua pachatapish, cai allpatapish rurarca. Paimi rey Davidmanca alli yachaj, alli yuyaiyuj, intindij shuj churita cushca. Chaimi Davidpaj churica Jehová Diospaj shuj huasita shayachinga. Pai mandangapajpish shuj huasitami shayachinga.
13 Tucui laya trabajocunata ruranata alli yachaj artesano Hiram-Abí runatami cachani.
14 Paica Danpaj huahua huahuacunamanta shuj huarmipaj churimi can. Paipaj yayaca Tiromantami carca. Paica orohuan, cullquihuan, cobrehuan, fierrohuan, rumihuan, caspicunahuan, morado puchcahuan, azul puchcahuan, alli telahuan, puca carmesí puchcahuan trabajangapaj alli experienciata charijmi can. Ima labranacunatapish alli ruranata yachajmi can. Shinallataj maijan dibujota rurachun cujpipish paica alli rurajmi can. Paica imatapish alli ruraj cambaj* artesanocunahuan, cambaj yaya ñuca amito Davidpaj imatapish alli ruraj artesanocunahuanmi trabajanga.
15 Ñuca amito, canta sirvijcunaman cusha nishca trigota, cebadata, aceiteta, vinota cachapai.
16 Ñucanchijca Líbano urcucunamanta yuracunataca can mashna minishtishcatami pꞌitishun. Cai yuracunataca huatashpami mama cuchapi huambuchishpa Jopecama apashun. Chaimantami canca yuracunataca Jerusalenman huichiyachina cangui” nircami.
17 Salomonca paipaj yaya rurashca shinallatajmi Israel llajtapi causacuj shujtaj llajtamanta shamushca tucui runacunata shuj censota rurarca. Tucuica 153.600 cꞌaricunami carca.
18 Salomonca 70.000 trabajadorcunatami* churarca. Urcucunapi rumicunata pꞌaquij 80.000 runacunatapishmi churarca. 3.600 runacunatapish trabajadorcunata ricushpa trabajachichunmi churarca.
Notacuna
^ O “palaciotami”.
^ O “aparijcunatami”.
^ O “Diospaj huasita”. “Diospaj huasi” shimita huasha diccionariopi ricui.
^ Caipica Diosman cushca tandamantami parlacun. “Diosman cushca tanda” shimita huasha diccionariopi ricui.
^ Shuj coro trigoca 352 libracuna yallitami charirca. Ayuda B14-ta ricui.
^ Shuj coro cebadaca 286 libracuna yallitami charirca.
^ Hebreo rimaipica: “20.000 batos” ninmi. Shuj batoca 22 litrocunatami charirca.
^ Cambaj nishpaca Salomonmantami parlacun.
^ O “aparijcunatami”.
