2 Crónicas 20:1-37
20 Chai qꞌuipaca moabitacuna, ammonitacuna, Ammonmanta shujtaj runacunapish* Jehosafatpaj contra macanacunamanmi shamurcacuna.
2 Chaimi Jehosafatmanca: “Achcacunamari cambaj contra macanacungapaj mama cucha* ladocunamanta, Edommanta shamushcacuna. Paicunaca Hazazón-Tamar llajtapimi cancuna. Chai llajtataca En-Guedí nishpapishmi rijsincuna” nishpa huillarcacuna.
3 Chaita uyashpami Jehosafatca manchaita charishpa Jehová Diosta mashcai callarirca. Shinallataj Judá llajtapi tucui cajcunatami shuj ayunota rurachun mandarca.
4 Judá llajtapi causaj gentecunaca Jehová Diosta tapungapajmi tandanacurcacuna. Paicunaca Judá llajtapi tiyaj tucui llajtacunamantami Jehová Diosta tapungapaj shamurcacuna.
5 Jehosafatca Judamanta, Jerusalenmanta tandanacushcacunapaj chaupipimi Jehová Diospaj huasi mushuj patio ñaupajpi shayarishpaca
6 cashna nirca:
“Ñucanchij ñaupa yayacunapaj Jehová Dioslla, ¿jahua pachapica manachu can solo Dios cangui? ¿Canca manachu tucui llajtacunapaj mandajcunata mandaj cangui? Cambaj maquipica fuerzapish, poderpishmi tiyan. Cantaca ni pi mana mishai tucungachu.
7 Ñucanchij Dioslla, ¿manachu cambaj pueblo Israelpaj ñaupajmanta cai allpapi causajcunataca llujshichishpa cacharcangui? ¿Cai allpacunata manachu cambaj amigo Abrahanpaj huahua huahuacunaman huiñai huiñaipaj curcangui?
8 Chashnami paicunaca chaipi causai callarircacuna. Cambaj shutipajpish chaipimi shuj huasita* rurarcacuna. Paicunaca:
9 ‘Macanacuimanta, castigomanta, ungüimanta, yaricaimanta ñucanchijta llaquicuna japijpica cai huasi ñaupajpi, cambaj ñaupajpimi shayarishun (cambaj shutica cai huasipimi can). Shinallataj llaquirishpami cambaj ayudata mashcashun. Canca ñucanchijta uyashpami quishpichingui’ nircacunami.
10 Cunanca Ammonmanta, Moabmanta, Seír urcucunamanta runacunami caipi cancuna. Israelitacuna Egipto allpacunamanta llujshishpa, paicunapaj allpacunata quichushpa chaipi tiyarichunca mana saquircanguichu. Ashtahuanpish israelitacunaca paicunamanta caruyashpami paicunataca mana tucuchircacuna.
11 Cunanca paicunaca mana allita rurashpami pagancuna. Paicunaca herenciata shina can cushca allpamanta ñucanchijta llujshichingapajmi shamuncuna.
12 Ñucanchij Dioslla, ¿paicunataca manachu castigagringui? Paicunaca ñucanchijta llaquichingapajca achcacunamari shamucuncuna. Ñucanchijca imata ruranata mana yachanchijca. Pero ñucanchij ñahuicunaca can ayudachunmi shuyacun” nircami.
13 Chashna ningacamaca Judamanta tucui gentecunami Jehová Diospaj ñaupajpi paicunapaj huarmicunahuan, paicunapaj huahuacunahuan, paicunapaj uchilla huahuacunahuanpish shayacurcacuna.
14 Shinaca Jahazielca tandanacushcacunapaj chaupipimi Jehová Diospaj espirituta chasquirca. Jahazielca Zacariaspaj churimi carca. Zacariasca Benayapaj churimi carca. Benayaca Jeielpaj churimi carca. Jeielca Mataniaspaj churimi carca. Levitacunapuramanta Mataniasca Asafpaj huahua huahuacunamantami carca.
15 Jahazielca cashnami nirca: “¡Tucui Judá llajtapi, Jerusalén llajtapi causajcunapish, can rey Jehosafatpish caita uyaichij! Jehová Diosca caitami nin: ‘Tucui chai gentecunataca ama manchaichijchu, ama chujchuichijchu. Cai macanacuipica mana cancunachu macanacunguichij, Yaya Diosmari macanacunga.
16 Paicunahuan macanacungapaj caya uriyaichij. Paicunaca Ziz nishca ñantami huichiyacungacuna. Cancunaca paicunahuanca pugru pamba tucuripimi tupanguichij. Chai pugru pamba tucurica Jeruel chaquishca pamba chꞌimbanijpimi can.
17 Cancunaca cai macanacuipica mana macanacunachu canguichij. Cancunapaj puestocunapi casijlla caichijlla. Jehová Dios cancunata ima shina quishpichijta ricuichij. Judapi, Jerusalenpi causaj gentecuna ama manchaichijchu, ama chujchuichijchu. Cayaca paicunahuan macanacungapaj llujshinguichijlla. Jehová Diosmi cancunahuan canga’ ninmi” nircami.
18 Chai ratomi Jehosafatca pambacama cumurishpa Diosta adorarca. Shinallataj Judapi tucui cajcunapish, Jerusalenpi causajcunapish Jehová Diospaj ñaupajpi cumurishpami Jehová Diosta adorarcacuna.
19 Cutin Cohatpaj huahua huahuacunamanta levitacunapish, Corepaj huahua huahuacunamanta levitacunapish jatarishpami sinchita israelitacunapaj Jehová Diosta alabarcacuna.
20 Cayandij punllaca utca jatarishpami Tecoa chaquishca pambaman rircacuna. Paicuna Tecoaman ricujpimi Jehosafatca jatarishpa: “¡Judá llajtapi, Jerusalén llajtapi causajcuna uyaichij! Cancuna macanacuipi ahuantashpa catingapajca ñucanchij Jehová Diospimi feta churana canguichij. Shinallataj pai churashca profetacunapipish feta churaichij. Chashnami cai macanacuitaca cancuna mishanguichij” nirca.
21 Chaipi caj gentecunata tapushca qꞌuipami Jehová Diosta cantachun huaquin cꞌaricunata agllarca. Paicunaca soldadocunapaj ñaupajta rishpami Diospajlla chꞌicanyachishca sumaj ropata churarishpa Diosta alabarcacuna. Paicunaca: “Diospaj mana tucurij cꞌuyaica huiñai huiñaipajmari. Chaimanta Jehová Diosta pagui nichijyari” nircacunami.
22 Paicunaca cushicuihuanmi Diosta alabai callarircacuna. Ammonmanta, Moabmanta, Seír urcucunamanta runacuna Judá llajtaman yaicucujpimi Jehová Diosca mana yuyashcapi paicunapurallataj huañuchinacuchun yuyaita curca. Chaimantami paicunapurallataj caishuj chaishuj huañuchinacurcacuna.
23 Ammonitacunapish, moabitacunapish Seír urcucunapi causajcunapaj contrami jatarircacuna. Chashnami paicunataca huañuchishpa tucui tucuchircacuna. Seír urcucunapi causajcunata tucuchishca huashami paicunapura huañuchinacurcacuna.
24 Judamanta gentecuna chaquishca pambapi caj chapana torreman chayashpaca achca huañushca gentecuna pambapi siricujtami ricurcacuna. Shujllapish causajca mana tiyarcachu.
25 Jehosafatpish, paihuan caj gentecunapish tucui quichushca cosascunatami apanaman rircacuna. Paicunaca huañushcacunapaj chaupimantaca achca cosascunata, ropacunata, valishca cosascunatapishmi japircacuna. Tucui cai runacunapaj imalla charishca cosascunaca achca cashcamantami quimsa punllacunapi tandarcacuna. Shinapish paicunaca mana tucuita apai tucurcacunachu.
26 Chuscu punllacuna cajpimi Beracá shuti pugru pambapi tandanacurcacuna. Chaipimi Jehová Diosta alabarcacuna.* Chaimantami chai pugru pambataca Beracá* nishpa shutichircacuna. Chai pugru pambaca cunancamami chai shutita charin.
27 Judamanta, Jerusalenmanta caj runacunaca Jehosafatta ñaupachishpami cushilla Jerusalenman tigrarcacuna. Jehová Diosca paicunapaj contracunamanta mishachishpami paicunamanca cushicuita curca.
28 Paicunaca Jerusalenmanca cuerdata charij instrumentocunahuan, arpacunahuan, trompetacunahuanmi chayarcacuna. Shinallataj Jehová Diospaj huasimanmi rircacuna.
29 Israelitacunapaj contracunahuanca Jehová Dios macanacushcatami tucui muyundij llajtacunata mandajcunaca uyarcacuna. Chaimantami paicunaca Diostaca achcata manchai callarircacuna.
30 Jehosafat mandacujpica tranquilo causaimi tiyarca. Shinallataj paipaj Diosca tucui ladocunapimi tranquilo causaita cushpa catirca.
31 Jehosafatca Judá llajtapimi mandashpa catirca. 35 huatacunata charishpami Jehosafatca mandai callarirca. Jerusalén llajtapica 25 huatacunatami mandarca. Paipaj mamaca Silhipaj ushushi Azubá shutimi carca.
32 Jehosafatca paipaj yaya Asapaj ejemplotami alli catirca. Chai ñanmantaca mana caruyarcachu. Jehová Diospaj ñaupajpipish allicunatami rurarca.
33 Pero adorana lugarcunataca* mana anchuchircacunachu. Chai llajtapi causajcunapish paicunapaj ñaupa yayacunapaj Diosta mashcangapajca paicunapaj shungutaca mana allichishcacunachu carca.
34 Jehosafatpaj causaimantaca callarimanta tucuringacamami Hananipaj churi Jehupaj quillcashcacunapi tiyacun. Chai quillcashcacunaca Israel llajtamanta Reycunapaj Libropimi quillcashca tiyacun.
35 Judá llajtata mandaj rey Jehosafatca Israel llajtata mandaj rey Ocoziashuanmi tandanacurca. Israelmanta reyca mana allicunatami ruraj carca.
36 Barcocunata rurashpa chai barcocunata Tarsis llajtaman cachangapajmi Jehosafatca Ocoziashuan tandalla trabajarca. Paicunaca Ezión-Gueberpimi chai barcocunataca rurarcacuna.
37 Shinapish Maresamanta Dodavahu runapaj churi Eliezerca Jehosafatpaj contrami caita nirca: “Ocoziashuan can tandanacushcamantami Jehová Diosca can rurashca trabajocunataca chingachinga” nircami. Chaimi barcocuna ñuturijpi Tarsis llajtamanca mana ri tucurcacuna.
Notacuna
^ Caitaca “meunitacuna” nishpapishmi traducishcacuna.
^ Caipica mar Muertomantami parlacuj yuyachin.
^ O “Diospaj huasita”.
^ Hebreo rimaipica: “bendiciarcacuna” ninmi.
^ “Beracá” shutica ‘bendición’ nisha ninmi.
^ Hebreo rimaipica: “alto lugarcunataca” ninmi.
