2 Crónicas 21:1-20
21 Qꞌuipaca Jehosafatca huañurcami.* Paitaca Davidpaj Llajtapimi paipaj ñaupa yayacunahuan pambarcacuna. Chai qꞌuipaca paipaj churi Jehorammi catij rey tucurca.
2 Jehorampaj huauquicunaca Jehosafatpaj churicunami carca. Paicunaca Azarías, Jehiel, Zacarías, Azarías, Miguel, Sefatiasmi carca. Tucui paicunaca Israel llajtata mandaj Jehosafatpaj churicunami carca.
3 Paipaj yayaca paicunamanca cullquimanta, oromanta achca regalocunatami cushca carca. Shinallataj valishca cosascunatapish, Judapi caj muyundijta pircashca llajtacunatapishmi curca. Pero mandanataca paipaj punta churi Jehorammanmi curca.
4 Jehoramca paipaj yayapaj randimi tucuita mandai callarirca. Jehoramca paipaj tucui huauquicunata, Israel llajtamanta huaquin mandajcunatami paipaj espadahuan huañuchirca. Chashnami paipaj mandanata sinchiyachirca.
5 Jehoramca 32 huatacunata charishpami rey tucurca. Paica pusaj huatacunatami Jerusalenpi mandarca.
6 Jehoramca Israel llajtamanta reycunapaj ejemplotami catirca. Paica Acabpaj familiapi causajcuna rurashca shinallatajmi rurarca. Acabpaj ushushimi paipaj huarmi tucushca carca. Jehoramca Jehová Diospaj ñaupajpica mana allicunatami ruraj carca.
7 Shinapish Jehová Diosca Davidhuan ari ninacushcamantami* Davidpaj familiamanta cajcunataca mana tucuchirca. Diosca paimanpish, paipaj huahuacunamanpish huiñai huiñaipaj shuj lamparata cuna cashcatami ari nishca carca.
8 Jehoram mandacui punllacunapimi Edompi causajcunaca Judapaj contra jatarishpa paicunapaj propio reyta nombrarcacuna.
9 Chaimi Jehoramca paipaj soldadocunata pushajcunahuan, tucui carretacunahuan Edomman rirca. Edomitacunaca Jehorampaj, carretacunata pushajcunata mandajcunapaj muyundijpimi shayarishcacuna carca. Chaimi Jehoramca tutata jatarishpa edomitacunataca misharca.
10 Edompi causajcuna Judapaj contra jatarishcaca cunancamami catin. Libnapi causajcunapish Jehorampaj contrami chai tiempoca jatarircacuna. Jehoramca paipaj ñaupa yayacunapaj Jehová Diostami saquishca carca.
11 Jehoramca Jerusalenpi causajcuna Diosta saquishpa shujtaj dioscunata adorachunmi* Judá urcucunapi adorana lugarcunata* rurarca. Chashnami Judá llajtapi causajcunataca Diosmanta caruyachirca.
12 Tiempo qꞌuipaca profeta Elías quillcashcatami chasquirca. Chai quillcashcapica: “Cambaj ñaupa yaya Davidpaj Jehová Diosca caitami nin: ‘Canca cambaj yaya Jehosafatpaj, Judá llajtata mandaj rey Asapaj ejemplotaca mana catishcanguichu.
13 Chaipaj randica Israel llajtamanta reycunapaj ejemplotami caticungui. Chashnami Judapi causajcunatapish, Jerusalenpi causajcunatapish Diosta saquichishpa shujtaj dioscunata adorachishcangui. Acabpaj familiapi cajcunapish chashnallatajmi shujtaj dioscunata adorarcacuna. Shinallataj cambaj yayapaj huasimanta caj cambaj propio huauquicunatami huañuchishcangui. Paicunaca canta yalli allicunami carca.
14 Chashna rurashcamantami Jehová Diosca cambaj pueblota, cambaj huahuacunata,* cambaj huarmicunataca castiganga. Shinallataj can tucui charishcacunatapishmi tucuchinga.
15 Canca achca ungüicunatami charingui. Cambaj huijsapi tiyaj tripacunapipishmi ungüita charingui. Cambaj ungüipaj culpamantami cada punlla ashtahuan anchayashpa cambaj huijsamanta tripacunapish llujshinga’ ninmi” nircami.
16 Jehová Diosca etiopecunapaj cꞌuchupi caj filisteocuna, arabecuna Jehorampaj contra tucuchunmi saquirca.
17 Chashnami paicunaca Judá llajtaman yaicushpa paicunata llaquichircacuna. Chaipica reypaj huasimantaca* tucui charishcacunatami aparcacuna. Shinallataj paipaj huahuacunata, paipaj huarmicunatami aparcacuna. Paipaj shujlla churi Jehoacazllami* saquirirca. Paimi último churi carca.
18 Chai qꞌuipaca Jehová Diosca Jehoramtaca paipaj huijsapi tiyaj tripacunapi ungüita charichunmi saquirca. Chai ungüipajca ima jambi mana tiyarcachu.
19 Asha tiempo qꞌuipa, ishqui huatacunapimi chai ungüimanta paipaj tripacunaca llujshirca. Paica cashna ungüita charishcamantami yallitaj sufrishpa huañurca. Paipaj llajtamanta gentecunaca paipaj shutipica ninallatapish mana japichircacunachu. Chaitaca paipaj ñaupa yayacunapajmi rurajcuna carca.
20 Jehoramca 32 huatacunata charishpami rey tucurca. Pusaj huatacunatami Jerusalenpi mandarca. Pai huañujpica ni pi mana llaquirircachu. Davidpaj Llajtapimi paitaca pambarcacuna. Pero reycunapaj pambana jutcupica mana pambarcacunachu.
Notacuna
^ O “paipaj ñaupa yayacunahuanmi samarirca”.
^ “Ari ninacushca” shimita huasha diccionariopi ricui.
^ O “espiritualmente huainayachunmi”.
^ Hebreo rimaipica: “alto lugarcunata” ninmi.
^ Hebreo rimaipica: “churicunata” ninmi.
^ O “palaciomantaca”.
^ Paitaca Ocozías nishpapishmi rijsincuna.
